Paliya Bible
फीलीपीयो 2
ईसु मसीन तेम ह़ुमाळा बणो
कदी मसी ईसु मे कंय सांती, अने मोंग सी हीम्मत अने आत्मा नी ह़ात-ह़ंगात, अने दया हय। ता मारी आहयी खुसी पुरी करो, के एक मन रेवो अने एकीत मोंग, एकीत मन, अने एकीत वीच्यार राखो। वीरोद नीता झुटी बड़ाय ना लेदे कंय ना करो, पण ह़ुमाळा रीन एक-बीजा ने आपणी गेथा वारु ह़मजो हरेक आपणा फायदा नी, पण बीजा ना फायदा नी बी फीकर करे।
मसी नी दया अने बड़ाय
तमु आपणा वीच्यार ने ईसु मसी ना वीच्यार नी ह़रका बणाय लेवो। जे भगवान ना वेह मे हय्न बी
भगवान नी बराबर हयवा
नो वीच्यार नी कर्यो।
पण आह़फा ने ठारलो कर देदो,
अने पावर्या नो वेह धर लेदो,
अने माणेह नी ह़रको बण ज्यो
अने माणेह ना वेह मे उजन्तो हय्न आह़फा ने नानो कर्यो,
अने आञे लग के हुकम पाळ्यो के मरवा, ह़ाचली, होव कुरुस पोर नी मोत बी वेठ लेदो।
एतरे भगवान तीने घणो मोटो बी कर्यो,
अने तीने तीहयु नाम आप्यो जे आखा नामु मे मोटु से।
के जे ह़रग मे अने कळ पोर अने जे कळीन हेटा से;
तीहया आखा ईसु ना नाम पोर मांडा टेके।
अने भगवान बाह नो बड़ाय नी लेदे
आखा माणहु मान लेय के “ईसु मसी मालीक से।”
कळी मे वीजाळुन तेम पपलो
आनी लेदे ए मारा मोंगाळ्ळा भाय अने बेन्या, जीसम तमु हमेसा गेथा हुकम मान्ता आय र्या, हेमेत हाव बी नी नीस्ता मारी ह़ाते रेता जाय्न पण खास करीन हाव मारी सी सेटा रीन बी बीहता अने कापता जाय्न आपणा-आपणा छुटकारा नु काम पुरु करता जावो। काहाके भगवाननेत से, जे आपणु मोंग नु काम पुरु करवा ना लेदे तमारा मन मे वीच्यार नाखे, अने तीनी अनसारे काम करवा नी ताखत बी आपे।
आपणा आखा काम बड़बड़ कर्या वगर अने पाड़ोपाड़्या वगर कर्या करो। के तमु वण-गुनाळ्ळा अने भोळा हय्न वाकला अने हटाळा माणहु ना वच मे भगवान ना वण-गुनाळ्ळा अवल्यात बणीन रेवो, तीमनी वच मे तमु जीवाय नो बोल लीन कळी मे धप्तला दीवा नी तेम देखाय देवो, के मसी ना आव्वा ना दाड़े मने घमंड करवा नो कारण हये के नी मारो दवड़ो अने नी मारी मेहनत करवा नु फाल्तु हयी।
कदी मने तमारा भरहा ना लेदे बादा अने चाकरी ना लेदे मने मारु लोय बी वयाड़वा पड़े ते बी मे घण खुस से, अने तमु आखा ह़ाते घण खुस रेम। ईसमेत तमु बी घण खुस हयो, अने मारी ह़ाते घण खुसी मनावो।
तीमुथीयुस अने ईपफ्रुदीतुस
मने मालीक ईसु मे आह से के मे तीमुथीयुस ने तमारीन्तां छोटोत मोकलही, के तमारा बारा मे ह़मळीन मने सांती जड़हे। काहाके मारी ह़ाते आसवु कोय बी माणेह नी हय, जे खरला मन सी तमारी भलाय नी फीकर करे। काहाके आखा आपणी भलाय नी फीकर करी र्या, ईसु मसी नी भलाय नी फीकर नी करता। पण तीमुथीयुस ने तमु ते पारख्या अने जाणी बी लेदला से के जीसम सोरो बाह ह़ाते काम करतलो, तेमेत तीहयो बी खुस-खबर ने ह़मळाव्वा मे मारी ह़ाते मेहनत कर्यो। एतरे मने आह से के जीसमेत मने मारा बारा मे पतो चालहे के मारी ह़ाते ह़ुं हयवा वाळु से, तीसमेत मे तीने छोटोत तमारीन्तां मोकल देही। अळी मने मालीक पोर पक्को भरहो से के मे आह़फो बी छोटोत आवही।
पण मेत ईपफ्रुदीतुस ने जे मारो भाय, अने ह़ाती अने सीपायड़ान तेम काठो-जीव करन्यो अने तमारो नेवताळो, अने जरुड़ी वातु मे मारी चाकरी करन्यो से, तमारीन्तां मोकलवा जरुड़ी ह़मज्यो। काहाके तीनु मन तमु आखा पोर लागलु हतु, एतरे तीहयो दुखी रेतो हतो काहाके तमु ते तीनी बेमारी ना बारा मे ह़मळला हता। अने ह़ाचली तीहयो घणो मांदलो हतो, आञे लग के मरवा पोर हतो, पण भगवान तीनी पोर दया कर्यो; अने नीस्तो तीनी पोर एतरो नी, पण मारी पोर बी के मने दुख पोर दुख वेठवा नी पड़े। एतरे मेत तीने मोकलवा अळी बी तीयार कर्यो के तीने अळी भेटीन घण खुस हय जावो अने मारो बी दुख कम हय जाय। एतरे तमु मालीक मे रीन तीनी सी घण खुस हय्न भेट करजो, अने आसवा ने ईज्जत कर्या करजो, काहाके तीहयो मसी ना काम ना लेदे आह़फा ना जीव पोर भार उचलीन मोत ना ह़ाते हय जेलो हतो, के जे कमी तमारी भणी गेथी मारी चाकरी मे हयी तीने पुरी करो।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.