Paliya Bible
कुलुस्यो 1
वारला से के
पोलुस भणी गेथी, जे भगवान नी मरजी सी मसी ईसु नो नेवताळो से, अने अमारा भाय तीमुथीयुस भणी गेथी।
कुलुस्या मे रेवा वाळा भगवान ना चोखला अने तीहया भरहो करे एवा भायु ने जे मसी मे एक से: अमारा बाह भगवान भणी गेथी दया अने सांती जड़ती रेय।
घण वारु से केवा नी वीन्ती
आमु तमारी जुगु जत्यार बी वीन्ती करया, ता आपणा मालीक ईसु मसी ना बाह भगवान ने घणो वारु से कीया। काहाके आमु मसी ईसु मे तमारा भरहा अने आखा भगवान ना चोखला माणहु नी लेदे तमारा मोंग ना बारा मे ह़मळला से। जत्यार खरली खबर, खुस-खबर, पेली कावा तमारीन्तां आयी, ता तमु तीहयी आह ना बारा मे ह़मळला के आहयो आपण्यो से, आनीन करते तमारो भरहो अने मोंग तीहयी चीज पोर टेकलो से जीनी तमु हेर करो, जे तमारी जुगु ह़रग मे ह़माळीन मेक मेली। खुस-खबर संयबरकत लाय री अने आखी कळी मे फेल री, तेमेत जेम तमारी वच मे तीहया दाड़े गेथी से; जत्यार तमु पेली कावा भगवान नी गीण ना बारा मे ह़मळला हता अने तीनी सी आहयु मालम पड़्यु के आहयु ह़ाचली से। 1भगवान नी दया ने तमु अमारा मोंगाळ्ळा साजल्या ईपफ्रास नी लारे ह़ीकला से,2 जे अमारी जुगु मसी नो भरहो करे एवो चाकर्यो से। तीहयोत तमारा मोंग ने जे आत्मा मे से अमारी पोर उजन्तो कर्यो।
आनीन करते जे दाड़े गेथा आहयु ह़मळला से, आमु बी तमारी जुगु आहयी वीन्ती अने रावण्या करवा नी सोड़ता के तमु आखी आत्मा नी अक्कल अने ह़मज भेळ भगवान नी हेर नी मरजी नी ओळखाण मे पुरा-पुरा हय जावो। के तमारी चाल-चलण मालीक ने गमे एवी रेवा जोवे, अने तीहयो आखी भाते खुस रेय, अने तमारी मे आखी भाती ना भलाय ना कामु ना फोळ फाले, अने तमु भगवान नी अक्कल मे वदता जावो, तीनी बड़ाय नी सक्ती ना अनसारे आखा भाती नी ताखत सी ताखत वाळा हयता जावो, आञे तक के खुस भेळ आखी भाती नी टणकाय अने धीरज देखाड़ सको, अने बाह ने घणो वारु से केता रेवो, जे आमने आनी लायक बणायो के वीजाळु मे चोखला माणहु नी ह़ाते पंगात मे साजल्या बणया। तीहयोत आमु ने अंदारलु ना कब्जा मे गेथो नीकाळीन आह़फा ना मोंगाळ्ळा सोरा ना राज मे मोकल्यो, 3जीनी मे आमने छुटकारो मतलब पाप नी माफी जड़ली से।4
मसी ना काम अने माणेह
तीहयो ते वण-देख्या भगवान नो सीको अने आखी कळी मे आखा गेथो पेल्नो से। काहाके तीनी लारे आखी चीज बणी, जे ह़रग मे से, अने जे धरती मे से, देखली अने वण-देखली, चाहे राजगादी हय, नीता मालीक हय, नीता मोट्लो हक हय, नीता सक्ती हय: आखी चीज तीना लारे बणावली हती, अने तीनी जुगु। तीहयो आखी चीज गेथो पेल्नो से, अने आखी चीज तीनी मे बणली रेय। 5तीहयोत डील, मतलब मंडळी नु मुंडु से; तीहयोत पेल्नो से, अने मरला मे गेथो जीव उठवा वाळा मे गेथो बी पेल्नो से के तीहयोत आखा मे डायलो ठेरे।6 काहाके बाह नी खुसी आनीत मे से के तीनी मे भगवान नु आखु कंय रेय 7अने तीना कुरुस पोर वयला लोय नी लारे मेळ करीन, आखी चीज नु तीनीत लारे आह़फा ह़ाते मेळ कर लेय, भले तीहयी धरती पोर नी रेय, भले ह़रग मे नी रेय।8
तमु जे पेले नीकाळ्ला हता अने गलत कामु ना कारण सी तमारा मन मे भगवान ना वेरी हता; तीहयो हाव तीना आहयी कळी ना आह़फा ना सोरा ना डील मे मोत नी लारे तमारो बी मेळ कर लेदलो से के तमने तीहयो भगवान नी अगळ वण-गुनाळ्ळा अने पाप वगर ना बणावीन हजुर करे, कदीम तमु भरहा नी नीव पोर वातड़ा बणीन रेवो अने तीहयी खुस-खबर नी आह ने जीने तमु ह़मळला से नी सोड़ो, जीनो परच्यार वादळा नी तळे वाळी पुरी धरती पोर कर्या, अने जीनो मे, पोलुस, चाकर्यो बण्यो।
मंडळी नो चाकर्यो पोलुस
हाव मे तीहयी वेला नी कारण सी खुस हयु, जे तमारी जुगु झेलु अने मसी ना दुख नी कमी तीना डील जुगु, मतलब मंडळी जुगु, आह़फा ना डील मे पुरी करु; जीनो मे भगवान ना तीहया जुगाड़ नी अनसारे चाकर्यो बण्यो जे तमारी जुगु मने ह़ोपलु से, के मे भगवान ना बोलु ने पुरा-पुरा परच्यार करु। मतलब तीहयी वात सुरुवात नी टेम सी ह़तायली री, पण हाव तीना तीहया भगवान ना चोखला माणहु पोर उजन्ती हयी। जीमनी पोर भगवान उजन्तो करवा हींड्यो के तीमने मालम हये के आड़जात्या मे तीहयी ह़तायली वात नी बड़ाय नी कीमत ह़ु से अने तीहयी आहयी से के मसी जे बड़ाय नी आह से तमारी मे रेय। जीनो परच्यार करीन आमु एक-एक माणेह ने चेतावणी आपया अने आखी अक्कल सी एक-एक माणेह ने ह़ीकाड़या, के आमु एक-एक माणेह ने मसी मे नामह़ाद्यो करीन भगवान अगळ हजुर करया। तीनीत जुगु मे तीनी तीहयी सक्ती नी अनसारे जे मारी मे ताखत भेळ बदलाव नाखे तन-मन लगाड़ीन मेहनत बी करु।
Source notes (8)
- Cross-reference कुलुस्यो 4:12; फीलेमोन 1:23
- Cross-reference कुलुस्यो 4:12; फीलेमोन 23
- Cross-reference ईफीसीयो 1:7
- Cross-reference ईफीसीयो 1:7
- Cross-reference ईफीसीयो 1:22,23
- Cross-reference ईफीसीयो 1:22,23
- Cross-reference ईफीसीयो 2:16
- Cross-reference ईफीसीयो 2:16
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.