गीनती 27

सेलोफाद ना सोर्‌या

1ता युसुफ ना सोरा मनस्‌से ना घोराणा ना कुळ मे गेथो सलोफाद, जे हेपेर नो सोरो अने गीलाद ना सोरा नो सोरो अने मनस्‌से ना सोरा माकीर ना सोरा ना सोरा नो सोरो हतो, तीना सोर्‌या जीमनु नाम महला, नोवा, होग्‌ला, मील्‌का, अने तीर्‌सा से तीहया ह़ाते आया। 2अने तीहया मुसा अने एलीयाजार पुंजारा अने मुख्‌या अने आखी मंडळी नी अगळ मेल-मीलाप वाळा तम्‌बु ना झापले उबा हय्‌न केवा बाज ज्‌या, 3“अमारो बाह जंगल मे मर ज्‌यो; पण तीहयो तीहयी मंडळी मे वाळो नी हतो जे कोरह नी मंडळी मे भेसकाय्‌न यहोवा ना वीरोद मे एक्‌ठी हयली हती, तीहयो आह़फा नात पाप का कारण सी मर्‌यो; अने तीनो कोय बी सोरो नी हयो। 4ता अमारा बाह नु नाम तीना घोराणा मे सोरो नी हयवा ना कारण सी काहा मीट जाय? अमारा काकाम नी वचमे आमने बी थोड़ोक जागा नो वाटो पाड़ीन आपो।” 5तीमनी आहयी वीन्‌ती मुसो यहोवा ने ह़मळायो। 6यहोवा मुसा ने केदो, 7“सलोफाद ना सोर्‌या वारु की कर्‌या; एतरे तु ईमना काकाम नी वचमे ईमने बी पक्‌को थोड़ोक जागा नो वाटो पाड़ीन आप, मतलब तीमना बाह नो वाटो तीमना हात मे ह़ोप दे।1 8अने ईस्‌रायलीम ने आहयु के, ‘कदीम कोय माणेह सोरो हया वगर मर जाय, ता तीनो वाटो तीना सोर्‌या ना हात मे ह़ोपजो। 9अने कदीम तीना सोर्‌या बी नी हय, ता तीनो वाटो तीना भायु ने आप देजो। 10अने कदीम तीना भाय बी नी हय, ता तीनो वाटो तीना काकाम ने आप देजो। 11अने कदीम तीना काका बी नी हय, ता तीना कुळ मे गेथा जे आखा गेथा तीनी ह़ाते हय तीमने तीनो वाटो आपजे जे तीहयो तीनो हकदार्‌यो बणे। ईस्‌रायलीम नी जुगु नीयाव नो आहयो नेम ठेरहे, जेम के यहोवा मुसा ने हुकम आपलो।’”

मुसा ना जागा पोर यहोसु

(वेवस्‌थावीवरन 31:1-8)

12अळतेण यहोवा मुसा ने केदो, “आहया अबारीम नाम ना बड़ा पोर चड़ीन तीहया देस ने देख ले जीने में ईस्‌रायलीम ने आपलो से। 13अने जत्‌यार तु तीने देख लीही, ता आह़फा ना भाय हारुन ने तेम तु बी तारा माणहु मे जाय्‌न भेसकाय जही, 14काहाके सीन नाम ना जंगल मे तमु बेम जणा मंडळी झुमायली तीहयी टेमे मारा हुकम ने तोड़ीन मारी ह़ाते कुड़कुड़ कर्‌या, अने मने झोर ने तां तीमनी नींगा मे चोखलो नी ठेराया।” आहयो मरीबा नाम नो झोर से जे सीन नाम ना जंगल ना कादेस मे से।2 15मुसो यहोवा ने केदो, 16“यहोवा, जे आखा जीव नी आत्‌माम नो भगवान से, तीहयो आहयी मंडळी ना माणहु पोर काना अदमी ने टाळ देय, 17जे तीनी अगळ आया जीया करे, अने तीमनी आव्‌वा जवा मे अगवाय करन्‌यो हय; जीनी सी यहोवा नी मंडळी गुवाळ्‌या वगर ना गाडरा-बोकड़ान तेम नी रेय।”3 18यहोवा मुसा ने केदो, “तु नुन ना सोरा यहोसु ने लीन तीनी पोर हात मेक; तीहयो एवो माणेह से जीनी मे मारी आत्‌मा वहली से;4 19अने तीने एलीयाजार पुंजारा अने आखी मंडळी नी अगळ उबो करीन तीमनी अगळ तीने हुकम आप। 20अने तारी बड़ाय मे गेथी थोड़ीक तीने आप, जीनी सी ईस्‌रायली नी आखी मंडळी तीना हुकम मान्‌या करे। 21अने तीहयो एलीयाजार पुंजारा अगळ उबो हया करे, अने एलीयाजार तीनी जुगु उरीम5 ना हुकम पुछ्‌या करे; अने तीहयो ईस्‌रायली नी आखी मंडळी भेळ तीहयो केय तीनी अनसारे जीया करे अने तीहयो केय तीनीत अनसारे आवती बी रीया करे।”6 22यहोवा ना आहया हुकम नी अनसारे मुसो यहोसु ने लीन, एलीयाजार पुंजारा अने आखी मंडळी नी अगळ उबो करीन, 23तीनी पोर आह़फा ना हात मेक्‌यो, अने तीने हुकम आप्‌यो जीसम के यहोवा मुसा नी लारे केदलो हतो।7