Paliya Bible
गीनती 26
ईस्रायली माणहु नी बीजी काव गीणती
मोट्ली गरान अळतेण यहोवा मुसा अने हारुन पुंजारा ना सोरा एलीयाजार ने केदो, “ईस्रायलीम नी आखी मंडळी मे जेतरा वीह साल ना, नीता तीनी गेथा वदु उमर ना हयवा सी ईस्रायलीम नी वचमे झुमायवा नी लायक से, ईमना आड़ा-बुड़ाम ना घोरु नी अनसारे तीहया आखा नी गीनती करो।” ता मुसो अने एलीयाजार पुंजारो यरीहो ह़ेर ने तां यरदन नंदी ना धेड़े मोवाब ना अराबा मे ईमने ह़मजाड़ीन केदो, “वीह साल ना अने तीनी गेथा वदु उमर ना माणहु नी गणती कर, जेम के यहोवा मुसा ने अने ईस्रायलीम ने मीस्र देस गेथा नीकळीन आव्वा नी टेमे हुकम आपलो हतो।”
रुबेन जे ईस्रायल नो आखा गेथो मोट्लो सोरो हतो; तीना आहया सोरा हता; मतलब हनोक, जीनी सी हनोक माणहु नो कुळ चाल्यो; अने पल्लु, जीनी सी पल्लु माणहु नो कुळ चाल्यो; हेस्रोन, जीनी सी हेस्रोन माणहु नो कुळ चाल्यो; अने कर्मी, जीनी सी कर्मी माणहु नो कुळ चाल्यो। रुबेनीम नो कुळ आहयोत हतो; अने ईमनी मे गेथा जीमने गण्या तीहया तीरतालीस हजार ह़ात ह़ो तीस अदमी हता। अने पल्लु नो सोरो एलीआब हतो। अने एलीआब ना सोरा नमुएल, दातान, अने अबीराम हता। आहया तीहयात दातान अने अबीराम से जे ईस्रायलीम नी लारे टाळला हता; अने जे टेमे कोरह नी मंडळी यहोवा ह़ाते झगड़ो करली हती, तीहयी टेमे तीहयी मंडळी मे भेसकाय्न तीहया बी मुसा अने हारुन ह़ाते झगड़ो करला हता; अने जत्यार तीहया ढाय ह़ो माणहु आक्ठु मे धपीन खत्तम हय जवा सी तीहयी मंडळी मीट जी, तीहयीत टेमे धरती मोडु उगाड़ीन कोरह भेळ ईमने बी गळ जी; अने तीहया एक चेतावणी नी सेलाणी बण ज्या। पण कोरह ना सोरा नी मर्या।
सीमोन ना सोरा जीमनी सी ईमनो कुळ बण्यो तीहया आहया हता; मतलब नमुएल, जीनी सी नमुएल माणहु नो कुळ बण्यो; अने यामीन, जीनी सी यामीन माणहु नो कुळ बण्यो; अने याकीन, जीनी सी याकीन माणहु नो कुळ बण्यो; अने जेरह, जीनी सी जेरह माणहु नो कुळ बण्यो, अने साउल, जीनी सी साउल माणहु नो कुळ बण्यो। सीमोन वाळो कुळ आहयोत हतो; ईमनी मे गेथा बावीस हजार बे ह़ो अदमी ने गण्या। गाद ना सोरा जीमनी सी ईमनो कुळ बण्यो तीहया आहया हता; मतलब सपोन, जीनी सी सपोन माणहु नो कुळ बण्यो; अने हाग्गी, जीनी सी हाग्गी माणहु नो कुळ बण्यो; अने सुनी, जीनी सी सुनी माणहु नो कुळ बण्यो; अने ओजनी, जीनी सी ओजनी माणहु नो कुळ बण्यो; अने एरी, जीनी सी एरी माणहु नो कुळ बण्यो; अने अरोद, जीनी सी अरोदी माणहु नो कुळ बण्यो; अने अरेली, जीनी सी अरेली माणहु नो कुळ बण्यो। गाद ना घोराणा नो कुळ आहयोत हतो; आमनी मे गेथा साड़ी चाळीह हजार अदमी ने गण्या।
यहुदा ना एर अने ओनान नाम ना बे सोरा ते हया, पण तीहया कनान देस मे मर ज्या। अने यहुदा नो जे सोरा सी तीनो कुळ नीकळ्यो तीहया आहया हता; मतलब, सेला, जीनी सी सेली माणहु नो कुळ बण्यो; अने पेरेस, जीनी पेरेस माणहु नो कुळ बण्यो; अने जेरह, जीनी सी जेरह माणहु नो कुळ बण्यो। अने पेरेस ना सोरा आहया हता; मतलब हेस्रोन, जीनी सी हेस्रोन माणहु नो कुळ बण्यो; अने हामुल, जीनी सी हामुली माणहु नो कुळ बण्यो। यहुदी माणहु नो कुळ आहयोत हतो; अने आमनी मे गेथा साड़ी छीयोत्तर हजार अदमी ने गण्या। ईस्साकार ना सोरा जीमनी सी ईमनो कुळ बण्यो तीहया आहया हता; मतलब तोला, जीनी सी तोली माणहु नो कुळ बण्यो; अने पुव्वा, जीनी सी पुव्वी माणहु नो कुळ बण्यो; अने यासुब, जीनी सी यासुबी माणहु नो कुळ बण्यो; अने सीम्रोन, जीनी सी सीम्रोनी माणहु नो कुळ बण्यो। ईस्साकारीयो नो कुळ आहयोत हतो; आमनी मे गेथा चोवसट हजार तीन ह़ो माणहु ने गण्या।
जबुलुन ना सोरा जीमनी सी ईमनो कुळ बण्यो तीहया आहया से; मतलब सेरेद, जीनी सी सेरेदी माणहु नो कुळ बण्यो; अने एलोन जीनी सी एलोनी माणहु नो कुळ बण्यो; अने यहलेल जीनी सी यहलेली माणहु नो कुळ बण्यो। जबुलुनी नो कुळ आहयोत हतो; ईमनी मे गेथा साड़ी साट हजार माणहु ने गण्या। युसुफ ना सोरा जीमनी मे तीमनो कुळ बण्यो तीहया मनस्से अने एप्रेम हता। मनस्से ना सोरा आहया हता; मतलब माकीर, जीनी सी माकीरी माणहु नो कुळ बण्यो; अने माकीरी सी माकीर नो सोरो गीलाद पयदा हयो; अने गीलाद सी गीलादी माणहु नो कुळ बण्यो। गीलाद ना सोरा आहया हता; मतलब ईयजेर। जीनी सी ईयजेरी माणहु नो कुळ बण्यो; अने हेलेक, जीनी सी हेलेकी माणहु नो कुळ बण्यो अने अस्रीयल, जीनी सी अस्रीयली माणहु नो कुळ बण्यो; अने सेकेम, जीनी सी सेकेमी माणहु नो कुळ बण्यो; अने समीदा, जीनी सी समीदी माणहु नो कुळ बण्यो; अने हेपेर, जीनी सी हेपेरी माणहु नो कुळ बण्यो। अने हेपेर ना सोरा सलोफाद ना सोरा नी हया, पण सोर्या एतरात हया, तीमनु नाम से, महला, नोवा, होग्ला, मील्का, अने तीर्सा से। मनस्से वाळो कुळ ते आहयोत हतो; अने ईमनी मे गेथा जीमने गण्या तीहया बावन हजार ह़ात ह़ो अदमी हता।
एप्रेम ना सोरा जीमनी सी ईमनो कुळ बण्यो तीहया आहया हता; मतलब सुतेलह, जीनी सी सुतेलही माणहु नो कुळ बण्यो; अने बेकेर, जीनी सी बेकेरी माणहु नो कुळ बण्यो; अने तहन, जीनी सी तहनी माणहु नो कुळ बण्यो। अने सुतेलह नो आहयो सोरो हयो; मतलब एरान, जीनी सी एरानी माणहु नो कुळ बण्यो। एप्रेमी नो कुळ आहयोत हतो; आमनी मे गेथा साड़ी बत्तीस हजार अदमी ने गण्या। आह़फाम ना कुळ नी अनसारे युसुफ ना घोराणा ना माणहु आहयात हता।
बीन्यामीन ना सोरा जीमनी सी ईमनो कुळ बण्यो तीहया आहया हता, मतलब बेला जीनी सी बेली माणहु नो कुळ बण्यो; अने असबेल, जीनी सी असबेली माणहु नो कुळ बण्यो; अने अहीराम, जीनी सी अहीरामी माणहु नो कुळ बण्यो; अने सपुपाम, जीनी सी सपुपामी माणहु नो कुळ बण्यो; अने हुपाम, जीनी सी हुपामी माणहु नो कुळ बण्यो। अने बेला ना सोरा अर्द अने नामान हता; अने अर्द सी अर्दी माणहु नो कुळ, अने नामान सी नामानी माणहु नो कुळ बण्यो। आह़फाम ना घोराणा नी अनसारे बीन्यामीनी माणहु आहयात हता; अने आमनी मे गेथा जीमने गण्या तीहया पेतालीस हजार छो ह़ो अदमी हता।
दान नो सोरो जीनी सी ईमनो कुळ बण्यो तीहयो आहयो हतो; मतलब सुहाम, जीनी सी सुहामी माणहु नो कुळ बण्यो। अने दान नु घोराणु आहयु हतु। अने सुहामी घोराणा मे गेथा जीमने गण्या तीमनी मे आखा मेळीन चोवसट हजार च्यार ह़ो अदमी हता। आसेर ना सोरा जीमनी सी ईमनो कुळ बण्यो तीहया आहया हता; मतलब यीम्ना, जीनी सी यीम्ना माणहु नो कुळ बण्यो; यीस्री, जीनी सी यीस्री माणहु नो कुळ बण्यो; बरीवा, जीनी सी बरीवा माणहु नो कुळ बण्यो। अळतेण बरीवा ना आहया सोरा हया; मतलब हेबेर, जीनी सी हेबेरी माणहु नो कुळ बण्यो; अने मल्कीएल, जीनी सी मल्कीयली माणहु नो कुळ बण्यो। अने आसेर नी सोरी नु नाम सेरह से। आसेरी माणहु नो कुळ आहयोत हतो; आमनी मे गेथा तीरपन हजार च्यार ह़ोव माणहु अदमी ने गण्या।
नप्ताली ना सोरा जीमनी सी ईमनो कुळ चाल्यो तीहया आहया हता; मतलब यहसेल, जीनी सी यहसेली माणहु नो कुळ बण्यो; अने गुनी, जीनी सी गुनी माणहु नो कुळ बण्यो: येसेर, जीनी सी येसेरी माणहु नो कुळ बण्यो; अने सील्लेम, जीनी सी सील्लेमी माणहु नो कुळ बण्यो। आह़फाम ना कुळ नी अनसारे नप्ताली नो कुळ आहयोत हतो; अने आमनी मे गेथा जीमने गण्या तीहया पेतालीस हजार च्यार ह़ो अदमी हता। आखा ईस्रायली मे गेथा जीमने गणला हता तीहया आहयात हता; मतलब छो लाख एक हजार ह़ात ह़ो तीस अदमी हता।
अळतेण यहोवा मुसा ने केदो, “आमने, आमनी गणती नी अनसारे, तीहयो जागो ईमनो हीस्सो हयवा करीन वाट देय। मतलब जे कुळ मे जादा हय तीमने जादा वाटो, अने जीनी मे कम हय तीमने कम वाटो आपजे; आखा कुळ ने ईमनो वाटो ईमना गणला माणहु नी अनसारे आपे। ते बी देस ने चीट्ठी नाखीन वाटजे; ईस्रायल ना आड़ा-बुड़ाम ना एक-एक कुळ नु नाम, जेम-जेम नीकळे तेम-तेम आह़फा-आह़फाम नो वाटो लेय। भले जादा नो वाटो हय के भले कम नो हय, जे-जे वाटो वाटे तीहयो चीट्ठी नाखीन वाटे।”1
अळतेण लेवीम नी मे गेथा जे आह़फाम ना कुळ नी अनसारे गण्या तीहया आहया से; मतलब गेर्सोनीयो मे गेथो नीकळलो गेर्सोनीयो नो कुळ; कहात सी नीकळलो कहातीयो नो कुळ; अने मारारी मे गेथो नीकळलो मरारीयो नो कुळ। लेवीम नो कुळ आहयो से; मतलब लीब्नीयो नो, हेब्रोनीयो नो, महलीयो नो, मुसीयो नो, अने कोरहीयो नो कुळ। अने कहात अम्राम ने पयदा करलो हतो। अने अम्राम नी लाडी नु नाम योकेबेद हतु, तीहयी लेवीम ना कुळ मे वाळी हती जे लेवी ना कुळ मे मीस्र देस मे पयदा हयली हती; अने तीहयी अम्राम ना बे सोरा हारुन अने मुसा ने अने एक तीमनी बेनेह मरीयम ने बी पयदा करी। अने हारुन ना च्यार सोरा हया नादाब, अबीहु, एलीयाजार, अने ईतामार।2 पण नादाब अने अबीहु तीहयी टेमे मर जेला हता जत्यार तीहया यहोवा ने, अवरे नी एवु आक्ठु चड़ावला हता।3 आखा लेवी मे गेथा जीमने गण्या, मतलब जेतरा अदमी एक मयना ना नीता तीनी गेथा वदु उमर ना हता, तीहया तेवीस हजार हता; तीहया ईस्रायलीम नी वचमे आनीन करते नी गणाया, काहाके ईमने देस नो कानो बी वाटो नी आपला हता।
मुसो अने एलीयाजार पुंजारो जे मोवाब ना अराबा मे यरीहोन्तां नी यरदन नंदी ना काठे ईस्रायलीम ने गण लेदा, ईमना गणला माणहु आतरात हता। पण जे ईस्रायलीम ने मुसो अने हारुन पुंजारो सीने ना जंगल मे गणला हता, तीमनी मे गेथा एक बी अदमी आहयी टेमे ना गणला मे नी हता। काहाके यहोवा तीमना बारा मे केदलो हतो, “तीहया पक्का जंगल मे मर जहे।” करीन यपुन्ने ना सोरा कालेब, अने नुन ना सोरा यहोसु ने छोड़ीन, ईमनी मे गेथु एक बी माणेह नी बच्यु।4
Source notes (4)
- Cross-reference गीनती 34:13; यहोसु 14:1,2
- Cross-reference गीनती 3:2
- Cross-reference लेव्यवेवस्था 10:1,2; गीनती 3:4
- Cross-reference गीनती 14:26-35
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.