Paliya Bible
गीनती 25
ईस्रायली माणहु नु छीनाळु
जत्यार ईस्रायली सीत्तीम ह़ेर मे रेता हता, अने तीहया माणहु मोवाबी सोर्या ह़ाते छीनाळु करवा बाज ज्या। अने जत्यार तीहया बयरा तीहया माणहु ने आह़फाम ना देवताम नी बादा नु खाणु मे नेवतु आप्या, ता तीहया माणहु खाय्न तीमना देवता ने वांदवा बाज ज्या। आसम करीन ईस्रायली बालपोर देवता ने पुंजवा बाज ज्या। ता यहोवा ने ईस्रायलीम नी पोर रीह लागी; अने यहोवा मुसा ने केदो, “ईस्रायली माणहु ना आखा मुख्या ने धरीन यहोवा जुगु तोप मे टांग दे, जीनी सी मने लागली रीह ईस्रायलीम नी पोर गेथी सेटी हय जाय।” ता मुसो ईस्रायली अदीकार्या ने केदो, “तमारा जे-जे अदमी बालपोर देवता ह़ाते भेसकाय जेला से तीमने मार देवो।”
जत्यार ईस्रायली नी आखी मंडळी मेल-मीलाप वाळा तम्बु ना झापले रड़वा बाज री हती, ता एक ईस्रायली माणेह मुसा अने आखा माणहु ना डोळा अगळ एक मीद्यानी बयर ने आह़फा नी ह़ाते तीना भायुन्तां ली आयो। आहयु देखीन एलीयाजार नो सोरो पीनहास, जे हारुन पुंजारा ना सोरा नो सोरो हतो, तीहयो मंडळी मे गेथो उठीन हात मे एक भालो लेदो, अने तीहया ईस्रायली माणेह ने पड़ावा मे जवा दीन तीहयो बी मोय ज्यो, अने तीहया अदमी अने तीहयी बयर बेम ना पेट मे भालो गोप देदो। आनी सी ईस्रायली मे जे मोट्ली गरा फेल जेली हती तीहयी थांग जी। अने गरा सी चोवीस हजार माणहु मर ज्या।
ता यहोवा मुसा ने केदो, “हारुन पुंजारा ना सोरा ना सोरा एलीयाजार नो सोरो पीनहास, जीने ईस्रायलीम नी वचमे मारीन तेम रीह लागी, तीहयो मारी रीह ने तीमनी पोर गेथी आञे तक सेटी करलो से, के मे खीजवाय्न ईमने खत्तम नी कर्यो। करीन तु ईने की दे के में ईनी ह़ाते सांती नो वायदो करु;1 अने तीहयो तीनी जुगु, अने तीनी अळतेण तीनी पीड़ी जुगु, जलम नो पुंजारा ना जागा नो वायदो रेहे, काहाके ईने आह़फा ना भगवान जुगु रीह लागी, अने तीहयो ईस्रायली जुगु पछतावो कर्यो।”
जे ईस्रायली अदमी ने मीद्यानी बयर ह़ाते मार नाखला, तीनु नाम जीम्री हतु, तीहयो साल नो सोरो अने सीमोनीयो मे गेथो आह़फा ना आड़ा-बुड़ा ना घोराणा नो मुख्यो हतो। अने जे मीद्यानी बयर ने मार नाखला तीनु नाम कोजबी हतु, तीहयी सुर नी सोरी हती, जे मीद्यानी कुळ ना एक घोराणा ना माणहु नो मुख्यो हतो।
अळतेण यहोवा मुसा ने केदो, “मीद्यानीम ने वेला पाड़, अने ईमने ठोक; काहाके पोर ना बारा मे अने कोजबी ना बारा मे तमने चलाकी करीन वेला पाड़ला।” कोजबी एक मीद्यानी मुख्या नी सोरी अने मीद्यानीम ना घोराणा नी बेनेह हती, अने गरा ना दाड़ा मे पोर नी पुजा ना कारण फेलली गरा मे मरली।
Source notes (1)
- Footnote मुल मे, मे ईने मारी सांती वाळो वायदो आपु
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.