गीनती 24

1आहयु देखीन के यहोवा ईस्‌रायलीम ने बरकतेत अपाड़वा हींड र्‌यो, करीन बीलाम कानी बी भाती ना जादु-टोना नो वापर करीन तीने बदलवा नी चाह्‌यो। पण तीहयो आह़फो जंगल भणीन वळ ज्‌यो। 2अने बीलाम नजर नाख्‌यो, अने ईस्‌रायलीम ने आह़फा-आह़फाम ना कुळ नी अनसारे वहला देख्‌यो। अने भगवान नी आत्‌मा तीनी पोर उतरी। 3ता तीहयो आह़फा नी अगी हयवा वाळी वात सुरु कर्‌यो, अने केवा बाज ज्‌या, “बोर ना सोरा बीलाम नी आहयी खबर से, जे अदमी ना डोळा मीचायला हता तीनीत आहयी खबर से, 4भगवान ना बोलु ने ह़मळवा वाळो, जे वांदवा करीन पड़्‌यो तीहयो उगड़ला डोळा वेर जोरभर्‌या नो दरसन देखे, तीनीत आहयी खबर से: के 5ए याकुब, तारा पड़ावा, अने ए ईस्‌रायल, तारी रेवा नी जागा केतरा घटाळी से! 6तीहया ते घाटीन तेम अने नंदी नी धेड़े ना बगीचाम नी तेम आसम फेल्‌ला से, जीसम के यहोवा ना चोपला अगर ना झाड़, अने पाणी नी धेड़े ना देवदारु ना झाड़ रेय। 7अने तीमना डोसरा मे गेथु पाणी उबराया करहे अने तीनो बीज घणा ढेरका पाणी वाळा खेतर मे पड़हे, अने तीनो राजो अगाग गेथो बी वारु रेहे, अने तीनु राज्‌य बड़तुत जहे। 8आने मीस्‌र मे गेथो भगवानेत नीकाळीन ली आय र्‌यो; तीहयो ते जंगली ह़ांड्‌यान तेम ताखत राखे, राज्‌य-राज्‌य ना माणहु जे ईना वीरोदी से तीमने तीहयो खाय जहे, अने तीमना हाटका ने टुकड़ा-टुकड़ा करहे, अने आह़फा ना बीलखा आर-पार कर देहे। 9तीहयो होगो हय्‌न तकाय्‌न बह र्‌यो, तीहयो नाहर नीता नाहरनीन तेम ह़ुय जेलो से; हाव तीने कोय वत्‌लावहे?1 जे कोय तने संयबरकत आपे तीहयो बरकत हात करे, अने जे कोय तने सराप देय तीहयो सरापीत हये।”2

10ता बालाक ने बीलाम पोर रीह लाग आयी; अने तीहयो हात पोर हात मेकीन बीलाम ने केदो, “में तने मारा दुस्‌मन ने सराप आपवा करीन बोलावलो, पण तु तीमने तीन काव बरकतेत बरकत आपलो से। 11एतरे तु हाव तारा जागा पोर नाह जा; में ते सोचलो के तारो घणो आव-भाव करही, पण हाव यहोवा तने आव-भाव हात करवा सी रोक र्‌यो।” 12बीलाम बालाक ने केदो, “जे दुत तु मारीन्‌तां मोकल्‌लो, ह़ु में तीमने बी नी केदो, 13के भले बालाक आह़फा ना घोर ने ह़ोनु-चांदी वेर भरीन मने आपे, ते बी में यहोवा ना हुकम ने तोड़ीन मारा मन सी नी ते भलु कर सकु अने नी गलत; जे कंय यहोवा केहे तीहयुत में केही?

बीलाम नु आखरी वार अगी हयवा वाळी वात केणु

14“हाव ह़मळ, में मारा माणहुन्‌तां पासो जाम; पण में पेले तने देखाड़ देम के आखरी ना दाड़ा मे तीहया माणहु तारा माणहु ह़ाते ह़ु-ह़ु करहे।” 15अळतेण तीहयो आह़फा नी अगी हयवा वाळी वात सुरु करीन केवा बाज ज्‌यो, “बोर ना सोरा बीलाम नी आहयी खबर से, जे माणेह ना डोळा मीचायला हता तीनीत आहयी खबर से, 16भगवान ना बोलु ने ह़मळवा वाळो, अने आखा गेथा मोटा ना ग्‌यान ने जाणवा वाळो, जे वांदवा करीन पड़लो उगड़ला डोळा सी आखा मे जोरभर्‌या नो दरसन देखे, तीनो आहयो बोल से: 17में यहोवा ने देखही ते खरो, पण हमणे नी; अने में तीनी पोर नींगा नाखु ते खरो, पण ह़ाते रीन नी: याकुब मे गेथो एक तारो उगहे, अने ईस्‌रायल मे गेथो एक राज डंड उठहे; जे मोवाब नी काकड़ ने खत्‌तम कर देहे, अने सेत ना आखा दंगो करवा वाळा ने पाड़ देहे। 18ता एदोम अने सेईर बी, जे तीना दुस्‌मन से, बेमोव ईना हक मे हय जहे, अने ईस्‌रायल ताकत देखाड़तु जहे। 19अने याकुब मेत गेथो एक राज करन्‌यो आवहे अने राज करहे, अने ह़ेर मे गेथा बचला ने बी खत्‌तम कर देहे।” 20अळतेण तीहयो अमालेकी पोर नींगा नाखीन आह़फा नी अगी हयवा वाळी वात सुरु कर्‌यो, अने केवा बाज ज्‌यो, “अमालेकी बीजा माणहु मे वारु ते हता, पण तीमनु आखरी मे खत्‌तम हयणुत से।” 21अळतेण तीहयो केनीयो पोर नींगा नाखीन आह़फा नी अगी हयवा वाळी वात सुरु कर्‌यो, अने केवा बाज ज्‌यो, “तारो रेवा नो जागो घणो मजबुत ते से, अने तारो रेवास चाफर्‌या पोर ते से; 22ते बी केन माणहु नु राज्‌य उजड़ जहे। अने आखरी मे अस्‌सुर तने बांदीन लीजहे।” 23अळतेण तीहयो आह़फा नी अगी हयवा वाळी वात सुरु कर्‌यो, अने केवा बाज ज्‌यो, “गरा आय पड़े जत्‌यार भगवान आहयु करहे ता कोय जीवत्‌लु बचहे? 24ते बी कीत्‌तीयोन्‌तां3 गेथा ढुंड्‌या वाळा आवीन अस्‌सुर ने अने एबेर ह़ेर ने बी वेला पाड़हे; अने आखरी मे तीहया बी खत्‌तम हय जहे।”

25ता बीलाम चाल पड़्‌यो, अने तीना जागा पोर जत र्‌यो; अने बालाक बी आह़फा नी वाट्‌ये चाल पड़्‌यो।