Paliya Bible
गीनती 23
बीलाम नु पेल्ली वार भगवान वगे गेथी वात केणु
ता बीलाम बालाक ने केदो, “आञे मारी जुगु ह़ात वेदी बणाव, अने आहयात जागे ह़ात वाछड़ा अने ह़ात गाडरा तीयार कर।” ता बालाक बीलाम ने केदो तीनी अनसारे कर्यो; अने बालाक अने बीलाम मेळीन हरेक वेदी पोर एक वाछड़ु अने एक गाडरो चड़ाया। अळतेण बीलाम बालाक ने केदो, “तु आह़फा नी होम बादान्तां उबो रे, अने में जाम; कंय माय्न यहोवा मने भेटवा आवे; अने जे कंय तीहयो मारी पोर उजन्तु करहे तीहयुत में तने देखाड़ही।” तत्यार तीहयो उजाड़ी बड़ा पोर ज्यो। अने भगवान बीलाम ने भेट्यो; अने बीलाम तीने केदो, “में ह़ात वेदी तीयार करलो से, अने हरेक वेदी पोर एक वाछड़ु अने एक गाडरो चड़ावलो से।” यहोवा बीलाम ने आहयी वात देखाड़्यो अने केदो, “बालाक ने तां जत रे अने आसम केजे।” अने तीहयो तीनीन्तां पासो आवती र्यो, अने देख्यो के बालाक अने तीहया आखा मोवाबी अदीकार्या तीमनी होम बादान्तां उबा हय र्या। ता बीलाम आह़फा नी अगी हयवा वाळी वात ने सुरु कर्यो, अने केवा बाज ज्यो, “बालाक मने अराम सी, मतलब मोवाब नो राजो मने उगवणा ना बड़ा मे गेथो बोलावो मोकल्यो: आव, मारी जुगु याकुब ने सराप दे, आव, ईस्रायलीम नो वाक काड! पण जीमने भगवान सराप नी देदो तीमने में काहा सराप देम? अने जीमनो यहोवा वाक नी काड्यो तीमनो में कीकम वाक काडु? चाफर्या नी चोट्ली पोर रीन तीहया मने देखाव पड़े, बड़ा पोर रीन में ईमने देखु; तीहया एवु राज्य से जे एखलु वहलु रेहे, अने बीजा राज्य सी अलग गीणायहे! याकुब नी, गीणाय नी एतरी अवल्यात ने कोय गीण सके? नीता ईस्रायल नी चवथा हीस्सा नी गीनती कोय कर सके? भलु हये के मारी मोत वण-गुनाळ्ळा माणेह ने तेम हये! मारु खत्तम हयणु बी तीमनीन तेम हये!”
ता बालाक बीलाम ने केदो, “तु मारी ह़ाते ह़ु कर्यो? में तने मारा दुस्मन ने सराप देवा करीन बोलावलो हतो, पण तु तीमने बरकतेत- बरकत आपलो से।” तीहयो केदो, “जे वात यहोवा मने ह़ीकाड़्यो ह़ु मने तीनेत चेतीन रीन नी केवा जोवे?”
बीलाम नु बीजी काव भगवान वगे गेथी वात केणु
बालाक तीने केदो, “मारी ह़ाते बीजा जागे चाल, जां रीन तीहया तने देखाव पड़े; तु तीहया आखा ने ते नी, पण बाहर वाळा ने एतरो देख सकही; तां रीन तीमने तु मारी जुगु सराप दे।” ता तीहयो तीने सोपीम नाम ना मेदान मे पीसगा नी चोट्ली पोर लीज्यो, अने तां ह़ात वेदी बणावीन आखी वेदी पोर एक वाछड़ु अने एक गाडरो चड़ायो। ता बीलाम बालाक ने केदो, “तारी होम बादान्तां आञेत उबो रे, अने में एथो जाय्न यहोवा ने भेटु।” अने यहोवा बीलाम ने भेट्यो, अने तीहयो बीलाम ने एक वात केदो, “बालाक ने तां पासो जा, अने आसम केजे।” अने तीहयो तीनीन्तां ज्यो, अने देख्यो के तीहयो मोवाबी अदीकार्या भेळ आह़फाम नी होम बादान्तां उबो हय र्यो। अने बालाक पुछ्यो, “यहोवा ह़ु केदो?” ता बीलाम आह़फा नी अगी हयवा वाळी वात सुरु कर्यो, अने केवा बाज ज्यो, “ए बालाक, मन लगाड़ीन ह़मळ, ए सीप्पोर ना सोरा, मारी वात पोर कान्टा लगाड़ीन ह़मळ: भगवान माणेह नी हय के झुट मेके, अने नी तीहयो अदमी हय के आह़फा नी ईच्छा बदले। ह़ु जे कंय तीहयो केदो तीने तीहयो नी करे? ह़ु तीहयो वायदो करीन तीने पुरो नी करे? देख, बरकतेत आपवा नो हुकम में हात करलो से: तीहयो बरकत आप देदलो से, अने में तीने नी बदल सकतो। तीहयो याकुब नी अवल्यात मे कंय बी बुराय नी देख्यो; अने नी ईस्रायली मे वेला पाड़नु देख्यो। तीनो भगवान यहोवा तीनी ह़ाते से, अने तीहयो तीमनो राजो से। तीमनी मे राजा नी जय-जयकार हये। ईमने मीस्र मे गेथा भगवानेत नीकाळ लीन आय र्यो, तीहयो ते जंगली ह़ांड्यान तेम ताखत राखे। पक्कुत याकुब ना कुळ ना वीरोद मे कर सके एवु कानु बी जादु-टोना नी हय; पण याकुब अने ईस्रायल ना बारा मे हाव माणहु केहे, देखो भगवान ह़ु करलो से! ह़मळ, तीहयो टोळो नाहरनीन तेम उठहे, अने नाहर ने तेम उबो हयहे; तीहयो जत्यार तक आह़फा नु सीकार ने नी खाय लेय, अने मारलु नु लोय नी पी लेय, तां तक नी ह़ुवे।”
ता बालाक बीलाम ने केदो, “ईमने नी ते सराप देजे, अने नी बरकत आपजे।” बीलाम बालाक ने केदो, “ह़ु में तने नी केदो के जे कंय यहोवा मने केहे, तीहयुत मने करवा पड़हे?”
बीलाम नु तीसरी काव भगवान वगे गेथी वात केणु
बालाक बीलाम ने केदो, “चाल, में तने एक अळी जागे लीन जाम; हय सके के भगवान नी ईच्छा हय ता तु तां रीन तीमने मारी जुगु सराप देय।” ता बालाक बीलाम ने पोर बड़ा नी चोट्ली पोर ली ज्यो, जां गेथु उजाड़ी देस देखाव पड़े। अने बीलाम बालाक ने केदो, “आञे मारी जुगु ह़ात वेदी बणाव, अने आञे ह़ात वाछड़ा अने ह़ात गाडरा तीयार कर।” बीलाम केदो तीनी अनसारे बालाक आखी वेदी पोर एक वाछड़ु अने एक गाडरो चड़ायो।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.