Paliya Bible
गीनती 22
राजा बालाक नी लारे बीलाम ने मोकलनु
ता ईस्रायली अगा बड़ीन यरीहोन्तां यरदन नी उगवणी धेड़े मोवाब ना अराबा ह़ेर मे पड़ावो नाख्या।
सीप्पोर नो सोरो बालाक देख्यो के ईस्रायली एमोरीयो ह़ाते ह़ु-ह़ु करला से। करीन मोवाब आहयु जाणीन, के ईस्रायली घणा ढेरका से, तीहया माणहु सी घण-जबर बीही ज्यो; आञे तक के मोवाब ईस्रायलीम ना कारण सी घण-जबर चींता मे पड़ ज्यो। ता मोवाब वाळा, मीद्यान वाळा माणहु ना डायलाम ने केदा, “हाव तीहया टोळो अमारी च्यारो-मेर ना आखा माणहु ने आसम खाय जहे, जीसम बोळद्यो खेतर ना लील्ला चारा ने खाय जाय।” तीहयी टेमे सीप्पोर नो सोरो बालाक मोवाब नो राजो हतो; अने तीहयो पतोर ह़ेर मे, जे मोट्ली नंदी फरात ना काठे बोर नो सोरो बीलाम1 ना ह़गाय-ह़ाय वाळा नो जागो हतो, तां बीलाम ने तां दुत मोकल्यो के तीहया आहयु कीन तीने बोलावे, “ह़मळ, एक टोळो मीस्र मे गेथो नीकळ आवलो से, अने जागा तीमनी सी ढकाय जेली से, अने हाव तीहया मारी अगळेत आवीन रेवा बाज जेला से। करीन आव, अने तीहया माणहु ने मारी जुगु सराप दे, काहाके तीहया मारी करते जादा ताखत वाळा से; ता हय सके के में ईमने हराय देम, अने आमु आखा आमने अमारा देस मे गेथा ठोकीन बारा नीकाळ दीया; काहाके आहयु में जाणु के जीने तु बरकत आपे तीहयो जुगाळो हय जाय, अने जीने तु सराप आपे तीहयो सरापीत हये।”
ता मोवाब ना अने मीद्यानी माणहु ना डाहला भगवान वगे गेथी वात केवा ना बदले आपवा नु ह़मान लीन चाल पड़्या, अने बीलाम ने तां पुगीन बालाक नी वात की देदा। तीहयो तीमने केदो, “आज रात आञे री जावो, अने जे वात यहोवा मने केहे, तीनीत अनसारे में तमने जपाप आपही।” ता मोवाब ना पुडार्या बीलाम ने तां री ज्या। ता भगवान बीलाम ने तां आवीन पुछ्यो, “तारीन्तां आहया माणहु कोय से?” बीलाम भगवान ने केदो, “मोवाब नो राजो सीप्पोर नो सोरो बालाक मारीन्तां आहयु की मोकल्लो से, ‘ह़मळ, जे टोळो मीस्र मे गेथो नीकळ आवलो से तीनी सी जागा ढकाय जेली से; एतरे आवीन मारी जुगु तीमने सराप दे; ता मे पक्को आमनी ह़ाते झुमाय्न ईमने बाहर नीकाळ सकही।’” भगवान बीलाम ने केदो, “तु आमनी ह़ाते ना जाय; हीय्या माणहु ने सराप ना देय, काहाके हीय्या बरकत हात कर लेदला से।” ह़वारे उठीन बीलाम बालाक ना पुडार्या ने केदो, “तमु तमारा देस मे जत रेवो; काहाके यहोवा मने तमारी ह़ाते जवा नो हुकम नी आपतो।” ता मोवाब ना डाहला जत र्या अने बालाक ने तां जाय्न केदा, “बीलाम अमारी ह़ाते आव्वा करीन नी की देदो।”
ता बालाक अळी डाहला ने मोकल्यो, जे पेले गेथा नामह़ाद्या अने गीनती मे ढेरका बी हता। तीहया बीलाम ने तां आवीन केदा, “सीप्पोर नो सोरो बालाक आसम केय, ‘मारीन्तां आव्वा करीन काना बी कारण सी नीकारो ना करे; काहाके में पक्को तारो घणो आव-भाव करही, अने जे कंय तु मने केय तीहयु में करही; एतरे आव, अने हीय्या माणहु ने मारी जुगु सराप दे।’” बीलाम, बालाक ना अदीकार्या ने जपाप आप्यो, “भले बालाक आह़फा ना घोर ने ह़ोनु-चांदी वेर भरीन मने आप देय, ते बी में मारा यहोवा ना हुकम ने नी पलट सकु, के तीने जादा नीता कम मानु। एतरे हाव तमु आज रात आञेत री जावो, के में जाण लेम के यहोवा मने अळी ह़ु केय।” भगवान राते बीलाम ने तां आवीन केदो, “कदी हीय्या माणहु तने बोलाव्वा आय र्या, ता उठीन ईमनी ह़ाते जा; पण जे वात में तने केम तीनीत अनसारे करजे।”
बीलाम अने तीनी गदड़ी
ता बीलाम ह़वारे उठ्यो, अने आह़फा नी गदड़ी पोर काठी बांदीन, मोवाब ना अदीकार्या ह़ाते चाल पड़्यो। अने तीना जवा ना कारण सी भगवान ने रीह लाग आयी, अने यहोवा नो दुत तीनो वीरोद करवा करीन वाट रोकीन उबो हय ज्यो। तीहयो आह़फा नी गदड़ी पोर बहीन जवा बाज र्यो हतो, अने तीनी ह़ाते तीना बे चाकर्या बी हता। अने तीहयी गदड़ी ने यहोवा नो दुत हात मे तलवार नीकाळीन वाटे उबो हय रेलो देखाव पड़्यो; ता गदड़ी वाट छोड़ीन खेतर मे जत री; ता बीलाम गदड़ी ने ठोकवा बाज ज्यो के तीहयी गदड़ी पासी वाटे आवती रेय। ता यहोवा नो दुत अंगुर नी वाड़ीन वचे नी गळी मे, जीनी बेम ह़ोड़ वाड़ी नु भीतड़ु हतु, उबो हयो। यहोवा ना दुत ने देखीन गदड़ी भीतड़े आसम चीपक जी के बीलाम नो पोग दीवाल मे चमदाय ज्यो; ता तीहयो गदड़ी ने अळी ठोक्यो। ता यहोवा नो दुत अगो बड़ीन एक ह़कड़ा जागा पोर जाय्न उबो हयो, जां ह़ारीक नी ते जमणी ह़ोड़ सेटा हयवा नो जागो हतो अने नी डखरी ह़ोड़। ता यहोवा ना दुत ने देखीन गदड़ी बीलाम ने लीनेत बह जी; अळतेण बीलाम ने घणी रीह लाग आयी, अने तीहयो गदड़ी ने लाकड़ी वेर ठोक्यो। ता यहोवा गदड़ी नु मोडु उगड़ देदो, अने तीहयी बीलाम ने केवा बाज जी, “में तारु ह़ु करली से के तु मने तीन काव ठोक्यो?” बीलाम गदड़ी ने केदो, “आहयु के तु मारी ईज्जत खराब करी। कदीम मारा हात मे तलवार रेती ता में तने हमणेत मार नाखतो।” गदड़ी बीलाम ने केदी, “ह़ु में तारी तीहयी गदड़ी नी हय जीनी पोर तु पयदा हयलो तां गेथो आज तक बहतो आय र्यो? ह़ु में तारी ह़ाते कारु बी आसम करत्ली?” तीहयो केदो, “नी।” ता यहोवा बीलाम ना डोळा उगड़ देदो, अने यहोवा नो दुत हात मे तलवार नीकळीन वाटे उबो हय रेलो देखाव पड़्यो; ता तीहयो ढुंगो वळ ज्यो, अने मोडा ना भरहे पड़ीन वांद्यो। यहोवा नो दुत तीने केदो, “तु तारी गदड़ी ने तीन काव काहा ठोक्यो? ह़मळ, तारो वीरोद करवा मेंत आवलो से, आनीन करते के तु मारी अगळ उलटी चाल चाली र्यो; अने आहयी गदड़ी मने देखीन मारी अगळ गेथी तीन काव सेटी हय जी। कदीम तीहयी मारी अगळ गेथी सेटी नी हयती, ता में तने पक्को हमणे तक मार देतो, पण गदड़ी ने छोड़ देतो।” ता बीलाम यहोवा ना दुत ने केदो, “मे पाप करलो से; में नी जाणतो हतो के तु मने रोकवा करीन मारी अगळ वाटे उबो हय र्यो। एतरे हाव कदीम तने गलत लागे, ता में पासो जत रेम।” यहोवा नो दुत बीलाम ने केदो, “आहया माणहु ह़ाते तु जत रे; पण तु तीहयीत वात केजे जे में तने केम।” ता बीलाम बालाक ना अदीकार्या ह़ाते जत र्यो।
बालाक नी लारे बीलाम नो आव-भाव
आहयु ह़मळीन के बीलाम आव्वा बाज र्यो, बालाक तीने भेटवा करीन मोवाब ना तीहया ह़ेर तक ज्यो जे तीहया देस नी अर्नोन नंदी नी काकड़ पोर से। बालाक बीलाम ने केदो, “ह़ु में तने घणी आह़ भेळ बोलाव्वा नी मोकल्यो? ता तु मारीन्तां काहा नी आयो? ह़ु में आनी लायक नी हय के ह़ाचलीन तारो वारु आव-भाव कर सकु?” बीलाम बालाक ने केदो, “देख, में तारीन्तां आय ते र्यो! पण हाव ह़ु में तने कंय की सकु? जे वात भगवान मने केहे तीहयीत वात में केही।” ता बीलाम बालाक नी ह़ाते-ह़ाते चाल्यो, अने तीहया कीर्यथुसोत ह़ेर तक आया। अने बालाक बोळद्या अने गाडरा-बोकड़ा ने बादा चड़ायो, अने मांह ने बीलाम अने तीनी ह़ाते ना अदीकार्यान्तां ली मोकल्यो।
ह़वारे बालाक बीलाम ने बामोतबाल ह़ेर नी उची जागे चड़ाय ली ज्यो; अने तां रीन तीने आखा ईस्रायली माणहु देखाव पड़्या।
Source notes (1)
- Cross-reference गीनती 31:8; 2 पतरस 2:15,16; युहन्ना 11
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.