गीनती 21

कनानी राजा सी जीकणु

1तत्‌यार अराद नो कनानी राजो, जे नेगेब ना दखणाव देस मे रेतो हतो, आहयु ह़मळीन के जे वाटे माय्‌न देस ना बारा मे जानकारी लेवा वाळा माणहु आवला हता तीहयीत वाटे माय्‌न हाव ईस्‌रायली आव्‌वा बाज र्‌या,1 तीमनी ह़ाते झुमायो, अने तीमनी मे गेथो थोड़ाक ने बांद लेदो। 2ता ईस्‌रायली यहोवा पांह आहयी मान्‌ता मांग्‌या, “कदीम तु ह़ाचलीन आहया माणहु ने अमारा हक मे कर देय, ता आमु ईमना ह़ेरु ने खत्‌तम कर देहु।” 3ईस्‌रायली नी आहयी वात ह़मळीन यहोवा कनानीम ने तीमना हक मे कर देदो; अने तीहया तीमना ह़ेर भेळ तीमने बी खत्‌तम कर देदा; आहया कारण सी तीहया जागा नु नाम होर्‌मा2 पाड़्‌या।

पीतळ नो गड़हो

4अळतेण तीहया होर बड़ान्‌तां गेथा अगा बड़ीन रात्‌ली दर्‌या नी वाटे चाल पड़्‌या के एदोम देस गेथा बारा-बारा फीरीन जीया;3 अने माणहु नु मन वाट ना कारण सी घणु दुखी हय ज्‌यु। 5करीन तीहया भगवान ना वीरोद मे वात करवा बाज ज्‌या, अने मुसा ने केदा, “तमु आमने मीस्‌र देस मे गेथा जंगल मे मरवा करीन काहा ली आवला से? आञे नी रोट्‌लो हय, अने नी पाणी, अने अमारो जीव आहया रोट्‌ला खाय खाय्‌न बगड़ो हय जेलो से।” 6ता यहोवा तीहया माणहु मे जेहर वाळा गड़हा मोकल्‌यो, जे तीमने चाव्‌वा बाज ज्‌या, अने ढेरेत ईस्‌रायली माणहु मर ज्‌या।4 7ता माणहु मुसान्‌तां जाय्‌न केवा बाज ज्‌या, “आमु पाप करला से काहाके आमु यहोवा अने तारा वीरोद मे वात करला से; यहोवा पांह वीन्‌ती कर के तीहयो गड़हा ने अमारीन्‌तां गेथा सेटा करे।” ता मुसो तीमनी जुगु वीन्‌ती कर्‌यो। 8यहोवा मुसा ने केदो, “एक गड़हा नी मुरती बणावीन खम्‌बा पोर टांग दे; ता जीने जेहर वाळो गड़हो चावहे, तीहयो तीहयी मुरती ने देख लेहे ता तीहयो नी मरे।” 9अने मुसो पीतळ नो एक गड़हो बणावीन खम्‌बा पोर टांग्‌यो; ता गड़हो चावला मे गेथा जे-जे तीहया पीतळ ना गड़हा भणीन भाळ्‌या तीहया जीवत्‌ला री ज्‌या।5

होर गेथा मोवाब भणीन यात्‌रा

10अळतेण ईस्‌रायली अगा बड़ीन ओबोत मे पड़ावो नाख्‌या। 11अने ओबोत गेथा अगा बड़ीन अबारीम मे उजाड़ी जागा मे पड़ावो नाख्‌या, जे उगवणी ह़ोड़ मोवाब ना ह़ामने ना जंगल मे से। 12तां गेथा अगा बड़ीन तीहया जेरेद नाम नी घाटी मे पड़ावो नाख्‌या। 13तां गेथा अगा बड़ीन तीहया अर्‌नोन नंदी, जे जंगल मे वये अने एमोरीयो ना देस मे गेथी नीकळे, तीनी एथरली धेड़ पड़ावा नाख्‌या; काहाके अर्‌नोन मोवाब अने एमोरी नी वच मे हय्‌न मोवाब देस नी काकड़ ठेरली से। 14आहया कारण सी यहोवा नी संग्‌राम नाम नी कीताप मे आहयी रीते लीखलु से: “सुपा मे बाहेब ह़ेर, अने अर्‌नोन नी घाटी, 15अने तीहयी घाटी नी ढाळ जे आर नाम नु ह़ेर भणी से, अने जे मोवाब नी काकड़ पोर से।”

16अळतेण तां गेथा अगा बड़ीन तीहया बेर तक ज्‌या; तां तीहयोत कुवो से जीना बारा मे यहोवा मुसा ने केदलो हतो, “तीहया ने माणहु ने एकठा कर, अने मे पाणी आपही।” 17तीहयी टेमे ईस्‌रायली आहयु गीत गाया: “ए कुवा उबराय आव, तीहया कुवा ना बारा मे गीत गावो! 18जीने अदीकार्‌या खोद्‌या, जीने माणहु ना नेता आह़फा-आह़फाम ना राजडंड वेर, आह़फा-आह़फाम नी लाकड़ी वेर खोदला हता।” अने तीहया जंगल मे गेथा मत्‌ताना देस मे ज्‌या, 19अने मत्‌ताना गेथा नहनीएल ज्‌या, अने नहनीएल गेथा बामोत ज्‌या, 20अने बामोत गेथा अगा बड़ीन तीहयी घाटी तक जे मोवाब ना मेदान मे से, अने पीसगा ना तीहया मुंडे तक बी जे यसीमोन भणीन वहलु से पुग ज्‌या।

सीहोन अने ओग राजा नु हारनु

(वेवस्‌थावीवरन 2:26–3:11)

21ता ईस्‌रायली माणहु एमोरीयो ना राजा सीहोन ने तां दुतु ने केवाड़ मोकल्‌या। 22“आमु ने तमारा देस मे हय्‌न जवा दे; आमु एथान एथा वळीन काना खेतर मे नीता अंगुर नी वाड़ी मे नी जीया; अने नी काना कुवा नु पाणी पीया; अने जत्‌यार तक तारा देस गेथा बारा नी नीकळ जीया तांह तक वाटेत चालीन जत रेहु।” 23ते बी सीहोन ईस्‌रायलीम ने आह़फाम ना देस मे हय्‌न जवा नी दीया; अने आह़फा ना आखी सेना ने एक्‌ठी करीन ईस्‌रायली ह़ाते झुमायवा करीन जंगल मे नीकळ आयो, अने यहस नाम नी जागा मे आवीन तीमनी ह़ाते झुमायो। 24ता ईस्‌रायली तीने तलवार वेर मार नाख्‌या, अने अर्‌नोन गेथा यब्‌बोक नंदी तक, जे अम्‌मोनीयो नी काकड़ हती, तीना देस ना हकदार्‌या बण ज्‌या; पण अम्‌मोनीयो नी काकड़ ते मजबुत हती। 25एतरे ईस्‌रायली एमोरीयो ना आखा ह़ेर ने ली लेदा, अने तीनी मे, मतलब हेसबोन अने तीना आड़े-धेड़े ना ह़ेर मे रेवा बाज ज्‌या। 26हेसबोन एमोरीयो ना राजा सीहोन नु ह़ेर हतु; तीहयो मोवाब ना पेल्‌ना राजा ह़ाते झुमाय्‌न तीनु आखु देस अर्‌नोन तक तीनी पांह गेथु हापकी लेदलो हतो। 27आहया कारण सी वारता करन्‌या गावे, “हेसबोन मे आवो, सीहोन नु ह़ेर वहाड़ो, अने मजबुत करो। 28काहाके हेसबोन मे गेथु आक्‌ठु, मतलब सीहोन ना ह़ेर मे गेथी आच नीकळी; जीनी सी मोवाब देस नु आर ह़ेर, अने अर्‌नोन ना उचा जागे वाळा मालीक खत्‌तम हय ज्‌या। 29ए मोवाब, तारी पोर गरा आय पड़े! कमोस देवता ना माणहु खत्‌तम हय ज्‌या, तीहयो आह़फा ना सोरा ने नाहण्‌या, अने आह़फा ना सोर्‌या ने एमोरी राजा सीहोन ना पावर्‌याण बणाय देदो।6 30आमु तीमने मार नाखला से, हेसबोन दीबोन तक खत्‌तम हय जेला से, अने आमु नोपह तक अने मेदबा तक बी उजाड़ देदला से।”

31आहयी रीते ईस्‌रायली एमोरीयो ना देस मे रेवा बाज ज्‌या। 32ता मुसो याजेर ह़ेर ना बारा मे जानकारी लेवा करीन मोकल्‌यो; अने ईस्‌रायली तीमना गामु पोर अदीकार जमाड़ लेदा, अने तां वाळा एमोरीयो ने तीहया देस मे गेथा नीकाळ देदा।

33ता तीहया अगा ज्‌या अने बासान नी वाटे माय्‌न जवा बाज ज्‌या; अने बासान नो राजा ओग तीमनी ह़ाते झुमायो, मतलब झुमायवा करीन आह़फा ना आखा टोळा भेळ एद्‌रेई मे नीकळ आयो। 34ता यहोवा मुसा ने केदो, “तीनी सी ना बीहे; काहाके मे तीने आखी सेना अने देस भेळ तारा हात मे ह़ोप देम; अने जेम तु एमोरीयो ना राजा हेसबोन मे रेवा वाळा सीहोन ह़ाते कर्‌यो, तेमेत ईमनी ह़ाते बी करजे।” 35ता तीहया तीने, अने तीना सोरा ने अने तीना आखा माणहु ने आसम मार्‌या के तीनु कोय बी नी बच्‌यु; अने तीहया तीना देस ना हकदार्‌या हय ज्‌या।