Paliya Bible
गीनती 20
चाफर्या मे गेथु पाणी नीकळनु
(नीरगमन 17:1-7)
पेल्ला मयना मे आखी ईस्रायली मंडळी ना माणहु सीन नाम ना जंगल मे आवती र्या, अने कादेस मे रेवा बाज ज्या; अने तां मरीयम मर जी, अने तांत तीने वगे कर देदा। तां मंडळी ना माणहु जुगु पाणी नी जड़्यु; करीन तीहया माणहु मुसा ना अने हारुन ना वीरोद मे एक्ठा हया। अने माणहु आहयु कीन मुसा ह़ाते झुमायवा बाज ज्या, “भलु रेतु के आमु तीहयी टेमेत मर जता जत्यार अमारा भायु यहोवा अगळ मर जेला! अने तमु यहोवा नी मंडळी ने आहया जंगल मे काहा लाय र्या के आमु अमारा ढुरु भेळ आञे मर जीया? अने तमु आमने मीस्र देस मे गेथा नीकाळीन काहा आहयी वेला वाळा जागा मे लाय र्या? आञे ते अन, अंजीर, अंगुर अने अनार ने हेम कंय बी नी हय, आञे तक के पीवा करीन थोड़ुक बी पाणी नी हय।” ता मुसो अने हारुन मंडळी नी अगळ गेथा मेल-मीलाप वाळा तम्बु ना झापले जाय्न आह़फाम ना मोडा ना भरहे पड़्या। अने यहोवा नु वीजाळु तीमने देखाव पड़्यु। ता यहोवा मुसा ने केदो, “ह़ेली लाकड़ी ने ले, अने तु तारा भाय हारुन भेळ मंडळी ने एक्ठी करीन तीमनी देखणते ह़ेली ढाट ह़ाते वात कर, ता तीहयी आह़फी नु पाणी आपहे; आहयी रीते तु चाफर्या मे गेथु तीमनी जुगु पाणी नीकाळीन मंडळी ना माणहु अने तीमना ढुरु ने पाणी पीवाड़।” यहोवा ना आहया हुकम नी अनसारे मुसो तीनी अगळ गेथी लाकड़ी ने ली लेदो।
मुसो अने हारुन मंडळी ने तीहया चाफर्या अगळ एक्ठी कर्यो, अने मुसो केदो, “ए दंगो करवा वाळा, ह़मळो; ह़ु आमु ने तमारी जुगु आहया चाफर्या मे गेथु पाणी नीकाळवा पड़हे?” ता मुसो हात उचो करीन लाकड़ी चाफर्या पोर बे काव देदो; अने तीनी मे गेथु घण-जबर पाणी नीकळ आयु, अने मंडळी ना माणहु तीमना ढुरु भेळ पीवा बाज ज्या।
पण मुसा ने अने हारुन ने यहोवा केदो, “तमु जे मारी पोर भरहो नी कर्या, अने मने ईस्रायलीम नी नींगा मे चोखलो नी ठेराया, करीन तमु आहयी मंडळी ने तीहया देस मे पुगाड़ी नी सको जीने मे ईमने आपलो से।” तीहया झोर नु नाम मरीबा पड़्यु, काहाके ईस्रायली माणहु यहोवा ह़ाते झगड़ो करला हता, अने तीने तीमनी वचमे वीटळ्ळो ठेरावला हता।
एदोम ना राजा नु वाट नी आपणु
अळतेण मुसो कादेस गेथो एदोम ना राजान्तां नेवताळा मोकल्यो, “तारा भाय-बेटा ईस्रायली आसम केय: अमारी पोर जे दुख आवला से तीहया तु जाणतो हहे; मतलब आहयु के अमारा डाह-डाहा मीस्र देस मे जेला हता, अने आमु मीस्र मे घणा दाड़ा र्या; अने मीस्री माणहु अमारा डाह-डाहा ह़ाते अने अमारी ह़ाते बी गलत वेहवार कर्या; पण जत्यार आमु यहोवा ने आड़्या ता तीहयो अमारी ह़मळ लेदो, अने एक दुत ने मोकलीन आमु ने मीस्र देस मे गेथो नीकाळ लावलो से; करीन हाव आमु कादेस ह़ेर मे से जे तारी काकड़ पोरेत से। अने आमने तारा देस मे हय्न जवा दे। आमु काना खेतर मे नीता अंगुर नी वाड़ी मे हय्न नी चालया, अने कुवाम नु पाणी नी पीया; वाट्ये-वाट्ये हय्न जत रेहु, अने जत्यार तक तारा देस गेथा बारा नी हय जीया, तांह तक नी जमणी ह़ोड़ वळया नी डाखरी ह़ोड़ वळया।” पण एदोमी नो राजा जपाप आप्यो, “तु मारा देस मे हय्न ना जाय, नीता मे तलवार लीन तारी ह़ाते झुमायवा करीन नीकळीन आवही।” ईस्रायली तीनीन्तां अळी की मोकल्या, “आमु वाट्ये-वाट्येत चालहु, अने कदीम आमु नीता अमारा जानवर तारु पाणी पीया, ता तीनी कीमत आपहु, आमने जादा कंय नी जोवतु, आमने चालीन एतरोत नीकळ जवा दे।” पण तीहयो केदो, “तमु आञे हतीन नी जाय सकता।” अने एदोमी ताखत वाळो मेळो लीन अने ताकत वाळी सेना लीन तीनी ह़ाते झुमायवा नीकळ आयो। आहयी रीते एदोमी नो राजा ईस्रायली माणहु ने आह़फाम ना देस मे हतीन जवा सी रोक देदो; एतरे ईस्रायली माणहु तीमनी भणी गेथा बीजी ह़ोड़ माय्न बीजी वाटे वळीन जत र्या।
हारुन नी मोत
ता ईस्रायलीम नी आखी मंडळी कादेस गेथी अगी बड़ीन होर नाम ना बड़ान्तां पुगी। अने एदोम देस नी काकड़ पोर होर बड़ा मे यहोवा मुसा ने अने हारुन ने केदा, “हारुन आह़फा ना आड़ा-बुड़ा मे जाय्न भेसकाय जहे; काहाके तमु बेम जणा जे मरीबा नाम ना झोर ने तां मारु केणु नी मानीन मारी ह़ाते झगड़ो करला हता, करीन तीहयो ते देस मे जाय नी सके जीने में ईस्रायली माणहु ने आपलो से। एतरे तु हारुन अने तीना सोरा एलीयाजार ने होर बड़ा पोर लीन चड़; अने हारुन ना लुगड़ा काडीन तीना सोरा एलीयाजार ने पेराव; ता हारुन तांत मरीन आह़फा ना आड़ा-बुड़ा मे जाय्न भेसकाय जहे।” यहोवा ना आहया हुकम नी अनसारे मुसो कर्यो; अने तीहया आखी मंडळी नी देखणते होर बड़ा पोर चड़ ज्या। ता मुसो हारुन ना लुगड़ा काडीन तीना सोरा एलीयाजार ने पेरायो1 अने हारुन तांत बड़ा नी चोट्ली पोर मर ज्यो।2 ता मुसो अने एलीयाजार बड़ा पोर गेथा उतर ज्या। अने जत्यार ईस्रायलीम नी आखी मंडळी देखी के हारुन मर जेलो से, ता ईस्रायलीम ना आखा घोरु ना माणहु तीनी जुगु तीस दाड़ा तक दुखी हयता र्या।
Source notes (2)
- Cross-reference नीरगमन 29:29
- Cross-reference गीनती 33:38; वेवस्थावीवरन 10:6
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.