गीनती 28

दाड़ीक नी बादा

(नीरगमन 29:38-46)

1अळतेण यहोवा मुसा ने केदो, 2ईस्‌रायलीम ने आहयो हुकम ह़मळाव, मारो चड़ावो, मतलब मने वारु गंदायण्‌यो गंद आपवा वाळु आक्‌ठु मे ह़ोपलु मारु खाणु, तमु मारी जुगु संय टेम पोर चड़ाव्‌वा करीन फोम राखजो। 3अने तु ईमने के: जे-जे तमने यहोवा जुगु चड़ाव्‌वा नु से तीहयु आहयु से; मतलब लगातार नी होम बादा जुगु एक-एक साल ना बे वण-गुनाळ्‌ळा गाडरा ना नर बच्‌चा दाड़ीक चड़ाया करजो। 4अने एक बच्‌चु ने ह़वारे अने बीजु ने ह़ांतली टेमे चड़ावजो; 5अने गाडरु नु बच्‌चु पसळ कुटीन नीकाळलु बे लीटर तेल भेसकायलो एक कीलो मेदो अनबादा मे चड़ावजो। 6आहयी लगातार नी होम बादा से, जे सीने बड़ा पोर यहोवा ना वारु गंद जुगु वारु गंद वाळा हवन जुगु ठेरावली से। 7अने तीनी रेचव्‌वा नी बादा आखा गाडरा ना बच्‌चा भेळ बे लीटर अंगुर नो रोह रेहे; अंगुर ना रोह नी रेचव्‌वा नी बादा यहोवा जुगु चोखला जागा मे चड़ावजो। 8अने बीजु बच्‌चु ने ह़ांतली टेमे चड़ावजो; अनबादा अने रेचव्‌वा नी बादा भेळ ह़वारे नी होम बादान तेम तीने यहोवा ने वारला गंद जुगु वारु गंद आपवा वाळो हवन करीन चड़ावजे।

अराम ना दाड़ा नी बादा

9अळतेण अराम ना दाड़े वण-गुनाळ्‌ळा बे गाडरा ना एक साल ना नर बच्‌चा, अने अनबादा जुगु तेल मे मीलावलो बे कीलो मेदो, अने तीनी रेचव्‌वा नी बादा भेळ चड़ावजो। 10अने दाड़ीक नी होम बादा अने तीना रेचव्‌वा नी बादा ने छोड़ीन आखा अराम ना दाड़ा नी आहयीत होम बादा ठेरली से।

मयना डीट नी बादा

11अळतेण आह़फाम ना मयना नी सुरुवात मे मयना डीट यहोवा जुगु होम बादा चड़ावजो; मतलब बे वाछड़ा, एक गाडरु, अने एक-एक साल ना वण-गुनाळ्‌ळा गाडरा ना ह़ात नर बच्‌चा; 12अने एक वाछड़ु पछळ तेल मे मीलावलो ढाय कीलो मेदो; अने गाडरा नी ह़ाते अनबादा नी लेदे तेल मे मीलावलो बे कीलो मेदो, 13अने एक-एक गाडरु नु बच्‌चु पछळ तेल मे मीलावलो एक कीलो मेदो। तीने वारु गंद जुगु वारु गंद नी अनबादा जुगु यहोवा नी लेदे हवन ठेरहे। 14अने तीमनी ह़ाते आहयी रेचव्‌वा नी बादा रेवा जोवे; मतलब वाछड़ु पछळ साड़ी तीन लीटर अंगुर नो रोह, अने गाडरु ह़ाते ढाय लीटर अंगुर नो रोह, अने एक-एक गाडरु ह़ाते बे लीटर अंगुर नो रोह। आहयु साल ना आखा मयना मे गेथा आखा मयना नी आहयीत होम बादा ठेरे। 15अने एक बोकड़ो पापबादा करीन यहोवा जुगु चड़ावे; आहयी हमेसा नी होम बादा अने तीने रेचव्‌वा नी बादा ने छोड़ीन चड़ावे।

फसह ना तीवार नी बादा

(लेव्‌यवेवस्‌था 23:5-14)

16अळतेण पेल्‌ला मयना ना चोवदवा दाड़े यहोवा नो फसह तीवार हया करे।1 17अने तीहयात मयना ना पंदरवा दाड़े तीवार हया करे; ह़ात दाड़ा तक खमीर वगर ना रोट्‌ला खाया करे। 18पेल्‌ला दाड़े चोखली सबा रेय; अने तीहया दाड़े मेहनत नु कानु बी काम नी करे; 19तीनी मे तमु यहोवा ने होम बादा चड़ावजो; अने बे वाछड़ा, एक गाडरो, अने एक-एक साल ना ह़ात गाडरा ना नर बच्‌चा रेवा जोवे; आहया आखा वण-गुनाळ्‌ळा रेय; 20अने तीनी अनबादा तेल वेर मीलावला मेदा नी रेवा जोवे; एक-एक वाछड़ु पसळ ढाय कीलो मेदो, अने गाडरा ह़ाते बे कीलो मेदो रेय। 21अने ह़ातोव गाडरु ना बच्‌चा मे गेथा आखा बच्‌चा पछळ एक कीलो तेल मीलावलो मेदो चड़ावजे। 22अने एक बोकड़ो बी पापबादा करीन चड़ावजो, जीनी सी तमारी जुगु पछतावो हये। 23ह़वारे नी होम बादा जे दाड़ीक नी होम बादा ठेरली से, तीने छोड़ीन आने चड़ावजो। 24आहयी रीते तमु तीहया ह़ातोव दाड़ा मे बी हवन नु खाणु चड़ावजो, जे यहोवा ने वारु गंद जुगु वारलो गंद आपवा करीन रेवा जोवे; आहयी हमेसा नी होम बादा अने तीनी रेचव्‌वा नी बादा ने छोड़ीन अळी चड़ाव्‌वा जोवे। 25अने ह़ातवा दाड़े बी तमारी चोखली सबा रेय; अने तीहया दाड़े मेहनत नु कानु बी काम नी करजो।

वाडणी ना तीवार नी बादा

(लेव्‌यवेवस्‌था 23:15-22)

26अळतेण पेल्‌ली मेर ना दाड़ा मे, जत्‌यार तमु तमारी वाडणी ना तीवार मे यहोवा जुगु नवली अनबादा चड़ावो, ते बी तमारी चोखली सबा हये; अने मेहनत नु कानु बी काम नी करजो। 27अने एक होम बादा चड़ावजो, जीनी सी यहोवा जुगु वारु गंदायवा जुगु वारलो गंद हये; मतलब बे वाछड़ा, एक गाडरो अने एक-एक साल ना ह़ात गाडरा ना नर बच्‌चा; 28अने तीमनी अनबादा तेल मे मीलावला मेदा नी रेय; मतलब वाछड़ु पछळ ढाय कीलो, अने गाडरा ह़ाते बे कीलो, 29अने ह़ातोव गाडरा ना बच्‌चा मे गेथा एक-एक बच्‌चु पछळ एक कीलो तेल मीलावलो मेदो चड़ावजो। 30अने एक बोकड़ो बी चड़ावजो, जीनी सी तमारी जुगु पछतावो हये। 31आहया आखा वण-गुनाळ्‌ळा रेवा जोवे; अने हमेसा नी होम बादा अने तीनी अनबादा ने बी अने अळी तीमनी रेचव्‌वा नी बादा भेळ आमने बी चड़ावजो।