Paliya Bible
लुका 24
ईसु नु पासु जीवतु हयणु
हप्ता ना पेल्ना दाड़े ह़वारे परगण फाटे मड़ाट्या मे आया। तीहया, ते गंदाण्यो मसाला ने ली ज्या, जे ईसु ना धोड़ पोर लगाड़वा करीन बणावला हता। जत्यार तीहया मड़ाट्यान्तां आया, ता तीहया देख्या के मड़ाट्या वाळा चाफर्या ना दोर पोर देदलो दगड़ो, ढबळीन एक धेड़्यो हय र्यो हतो। अने मोय ज्या ता मालीक ईसु नो धोड़ तां नी जड़्यो! आहयु देखीन तीहया बयरा वहराय्न वीच्यार मे पड़ ज्या। ता उचकाहलात बे माणहु देखाव पड़्या, अने तीमनी ह़ाते उबा हय ज्या। तीमना लुगड़ा धोळासप हता अने पपली र्या हता। तीहया बयरा बीही ज्या अने तीमनु मुंडु हेटु करीन भोयमेत भाळ र्या। तत्यार तीहया माणहु ते बयरा ने केदा, “जे जीवत्लो से, तीने मरला माणहु ना मड़ाट्या मे काहा ह़ोद र्या? 1तीहयो आंया नी हय, काहाके तीहयो जीवतो हय जेलो से। जत्यार तीहयो गलील ह़ेर मे हतो, ता तमने तीहयो ह़ु केदलो? तीहयी वात फोम करो! तीहयो केदलो हतो ‘मे माणेह ने सोरो, पापी माणहु ना हात मे ह़ोप देहे। तीहया पापी माणहु मने कुरुस पोर चड़ावहे। पण तीसरा दाड़े जीवतो हय जहे।’”
तत्यार बयरा ईसु केदलो तीहयी वात फोम कर्या, अने मड़ाट्या मे गेथा पासा जत र्या। अने ईसु ना ग्यारे चेला ने अने बीजा आखा ने, जे देखला अने ह़मळला तीहयु आखु की देदा। तीहया बयरा ना नाम हता, मरीयम मगदलीनी, योन्ना, अने याकुब नी आय्ह़ मरीयम अने थोड़ाक बीजा बयरा बी हता। पण ईसु ना चेला ने आहयी वात रीकामीत लागी। अने तीहया तीमनी वात पोर भरहो नी कर्या। तत्यार एक चेलो पतरस नाम नो मड़ाट्या भणी दवड़ी पड़्यो। जत्यार तीहयो तां पुग्यो, अने ढुंगो वळीन मड़ाट्या मे मोय भाळ्यो, अने लेफड़्या लुगड़ा एतरात पड़ रेला देख्यो, जीनी मे धोड़ वीटावलु हतु। पण अळी तां कंय नी देख्यो। एतरे तीहयो वहरायतोत पासो आवती र्यो।
ईम्माउस ह़ेर मे जाण्या चेला ने ईसु देखाव पड़े
(मरकुस 16:12-13)
तीहयात दाड़े बे चेला ईम्माउस नाम ना गाम भणी जाय र्या हता। तीहयु यरुसलेम ह़ेर गेथु ह़ात मील सेटु हतु। तीहया बे जणा जे हयली ते वात ना बारा मे आंबा-सांबा वात-वीच्यार करता-करता जाय र्या हता। जत्यार तीहया वात करवा बाज र्या हता, तीहयीत टेमे ईसु आह़फोत आवीन, तीमनी ह़ाते-ह़ाते चाल पड़्यो, चेला ईसु ने देख्या, पण तीहया तीने नी ओळख्या। ईसु ते चेला ने केदो, “तमु वाट्ये चालता-चालता कानी वात ना बारा मे वात-वीच्यार कर र्या?” तीहया उबा री ज्या। अने घणा उदास हता। तीमनी माय्न एक जणो कलीयुपास नाम नो हतो, तीहयो जपाप आप्यो, “यरुसलेम ह़ेर मे आव्वा-जवा वाळा माय्न तुत एवो अंजाण्यो से ह़ु, जे आहयु नी जाणे के आहया दाड़ा मे ह़ु-ह़ु हयलु से?”
ईसु तीमने केदो, “तां ह़ु हयलु से?” तीहया केदा, “आहयी ईसु नासरी नी वात से। तीहयो माणेह भगवान नी अने आखा माणहु नी नींगा मे, काम अने वात मे, भगवान वगे गेथी वात केण्यो जोरभर्यो माणेह हतो। अने डायला पुंजारा अने अमारी पोर हक जमाड़न्या पुडारी तीने धराय देदा; अने मोत नो डंड अपाड़्या अने कुरुस पोर खुटा ठोकीन चड़ाय मांग्या। आमु ते घणी मोटी आह कर र्या हता, की आहयोत ईस्रायल देस नो छुटकारो करवा वाळो से। आहयी आज गेथा तीन दाड़ान पेल्नी वात से। अमारी माय्न थोड़ाक बयरा आमने घणा वहराड़ देदा; तीहया ह़वारे वेगा-वेगात मड़ाट्यान्तां जेला। तीमने ईसु नो धोड़ नी जड़्यो। तीहया तां गेथा पासा आवीन आमने केदा, के आमने ह़रगदुत देखाव पड़्या, तीहया आहयु केदा के ईसु जीवत्लो से। आहयी वात ह़मळीन अमारी माय्न थोड़ाक ह़ाती मड़ाट्यान्तां ज्या, अने जेम बयरा तीमने केदला, तेमेत आखु तीमने देखाव पड़्यु; पण तीहया ईसु ने नी देख्या।”
ता ईसु तीमने केदो, “ए वण-अकल्या! तमु भगवान वगे गेथा केण्या माणेह नी वात पोर, भरहो करवा मे एतरा कम अकल्या कीकम बण ज्या! मसी ईसु ने दुख झेलीन, तीना ह़ेक मे पासु भरायवा ताले नी हतु ह़ु?” अने ईसु मुसा नी लीखली सास्तर मे गेथो, अने भगवान वगे गेथा केण्या माणेह नी सास्तर मे गेथो, अने सुरु करीन आखा खरला सास्तर मे गेथु आह़फा ना बारा मे जे कंय लीखलु से, तीहयु आखु तीमने ह़मजाड़्यो।
अने अळतेण चालता-चालता, तीहया गाम मे पुग ज्या, जां तीहया जाय र्या हता। मालीक ईसु ने देखीन आसम लागतु हतु, के ईसु अळी अगो जवा ना वीच्यार मे हतो। तीहया चेला ईसु ने रावण्या करीन रोक्या, के “तु अमारी ह़ाते री जा। काहाके हाव ह़ांतु हय ज्यु, अने दाहड़ु बी घणु ढळ जेलु से।” अने ईसु तीमनी ह़ाते रेवा करीन घोर मे ज्यो। जत्यार ईसु तीमनी ह़ाते खाणु खावा करीन बह्यो, ता तीहयो रोट्लो हात मे धर्यो, अने भगवान ने तु घणो वारु से कीन चेला ने भांगी-भांगीन आप देदो। तीहयीत टेमे चेला ना डोळा उगड़ी ज्या, अने तीहया ईसु ने ओळखी लेदा, बाखीन ईसु तीमनी देखणतेत उलुप हय ज्यो। ता चेला आंबा-सांबा आहयु केदा, “जत्यार तीहयो वाट्ये चालतो जाय्न अमारी ह़ाते वात करतो हतो, अने खरला सास्तर नी वात देखाड़तो हतो, ता आपणु मन घण-जबर खुस नी हयु ह़ु?”
ते चेला तत्यारुत तां गेथा उठीन यरुसलेम ह़ेर भणी पासा ज्या। तां पुगीन तीहया ग्यारे चेला ने अने तीमना बीजा ह़ाती ने भेळा हय रेला देख्या। तीहया आहयु केवा बाज र्या हता, “मालीक ईसु ह़ाचलीन पासो जीवतो हय जेलो से, अने तीहयो सीमोन पतरस ने देखाव पड़लो से।”
तत्यार तीहया बेम जणा वाट्ये जे हयु तीहयु आखु की देदा अने आहयु बी की देदा के ईसु रोट्लो भांगीन आप्यो, ता आमु तीने ओळखी लेदा।
ईसु चेला ने देखाव पड़े
(मत्ती 28:16-20; मरकुस 16:14-18; युहन्ना 20:19-23; नेवताळा ना काम 1:6-8)
मालीक ईसु जीवतो हय जेलो से करीन चेला वात करवा बाज रेला हता, तत्यार ईसु तीमना वच मे आवीन उबो हय ज्यो। अने तीमने आखा ने केदो, “तमने सांती जड़े!”
पण तीहया घण-जबर बीही ज्या, अने तीहया ह़मज्या के आमु काना भुतड़ा ने देख र्या। तत्यार ईसु तीमने अळी केदो, “तमु काहा घबराय र्या? अने तमु मन मे संण्का काहा कर्या? मारा हात ने अने पोग ने देखो, के मे ह़ाचलीन तीहयोत ईसु से। मने छीमीन देखो, काहाके मरला माणहु नु माह अने हाटका नी रेय। पण तमने ते देखाय र्यु, के मारी मे माह अने हाटका से।”
तत्यार ईसु आहयी वात केतो जाय्न तीमने आह़फा ना हाते ना अने पोग ना घाव देखाड़्यो। तीहया एतरा जबर खुस हय ज्या के तीहया वहराय्न हाव बी भरहो नी कर्या। काहाके आहयु आखु तीमनी ह़मज मे नी आयु। ईसु चेला ने केदो, “आंया तमारी पांह खावा नु कंय से?” तीहया ईसु ने भुंजला माछला नो एक टुकड़ो आप्या। अने तीहयो ते माछली ना टुकड़ा ने धर लेदो अने तीमनी अगळ खाय ज्यो।
ईसु तीमने अळी केदो, “मारी आहयी वात, तीहयी वात से, जे मे तमने सुरु गेथोत केतो आय र्यो, के मुसा नी लारे लीखला सास्तर मे वाळी वात अने भगवान वगे गेथा केण्या माणहु नी वात, अने भजन सास्तर मे लीखली वात पुरी हयवात हती, जे मारा बारा मे लीखली से।”
अळतेण ईसु खरला सास्तर ह़मजवा करीन तीमना मन ना ढाकणा उगाड़ देदो। अने तीमने केदो, “आसम लीखलु से के मसी दुख भुगतहे, अने तीसरे दाड़े मर्या-ह़र्या मे गेथो जीवतो हय जहे। आहयी खुस-खबर पेले आंया यरुसलेम मे माणहु ने ह़मळावहे अने अळतेण आखा देस ना माणहु ने ह़मळावहे अने पाप भणी गेथु मन फीरवीन भगवान वगे वळवा नु परच्यार तीनात नामे हयहे। अने तमु आहयी आखी वात ना गवा से। 2अने देखो, जे चोखली आत्मा ना बारा मे मारो बाह तमने आपवा नो वायदो करलो से। तीने मे तमारी उपर ह़रगे गेथो उतारही अने जत्यार लगण तमु ह़रगे गेथी सक्ती हात नी करे, तांह तक तमु आञेत यरुसलेम ह़ेर मे रेजो।”
ईसु नु ह़रगे जाणु
(मरकुस 16:19-20; नेवताळा ना काम 1:9-11)
अळतेण ईसु आह़फा ना चेला ने ह़ेर गेथो बारथो बेतन्या गाम ने तां ली ज्यो। जत्यार तीहया तां पुग्या, ईसु आह़फा ना हात उचा करीन संयबरकत आप्यो। जत्यार तीहयो तीमने संयबरकत आप र्यो हतो, ता तीहयो ईसु तीमने सोड़ीन ह़रग मे उचलाय ज्यो। अने चेला मांडा टेकवीन ईसु ने वांद्या अने अळतेण तीहया खुस हय्न यरुसलेम ह़ेर पासा जत र्या। तां तीहया भगवान ना मंदीर मे हजुर हय्न आखी टेम भगवान नी बड़ाय करता र्या।
Source notes (3)
- Cross-reference मत्ती 16:21; 17:22,23; 20:18,19; मरकुस 8:31; 9:31; 10:33,34; लुका 9:22; 18:31-33
- Cross-reference नेवताळा ना काम 1:4
- Cross-reference नेवताळा ना काम 1:9-11
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.