Skip to content
BibleKenya

Paliya Bible

लुका 23

पीलातुस अगळ ईसु ने लावे

(मत्‌ती 27:1,2,11-14; मरकुस 15:1-5; युहन्‌ना 18:28-38)

अळतेण आखी बठक ना माणहु उठीन उबा हय ज्‌या; अने तीहया ईसु ने पीलातुस ने तां ली ज्‌या। तीहया माणहु पीलातुस अगळ ईसुन वाक काडीन केवा बाज ज्‌या, “तीहयो अमारा युहदी माणहु ने भड़कावत्‌लो, अने तमु रोमी राजा ने फाळो ना आपो केतलो ह़मळ्‌ळा से, अने आह़फा ने मे मसी राजा से, केतलो ह़मळ्‌ळा से।”

पीलातुस ईसु ने पुछ्‌यो, “तु युहदी माणहुन राजा से ह़ु?” ईसु जपाप आप्‌यो, “होव, जेम तु केदो।”

अळतेण पीलातुस डायला पुंजारान अने भीड़ ने केदो, “मार नींगा मे, आहया माणेह मे कंय बी गुनो नी जड़्‌यो।”

पण तीहया जोर दीन केवा बाज ज्‌या, “आहयो गलील जीला सी लगाड़ीन आञे तक, ‘यहुदा जीला मे आखे लड़ाय करजो’ करीन माणहु ने ह़ीकापण आपतो आय र्‌यो।” आहयु ह़मळीन पीलातुस पुछ्‌यो, “आहयो माणेह गलील जीला मे रेण्‌यो से ह़ु?” जत्‌यार तीने मालम हयु के ईसु गलील वाळो से, ता पीलातुस ईसु ने गलील ना राजा हेरोद नी तां मोकली देदो, तीहयो तीनी टेम मे यरुसलेम मे हतो।

हेरोद अगळ ईसु

हेरोद ईसु ने देखीन घणो खुस हय ज्‌यो। तीहयो ईसुन बारा मे घण ढेरकी वात ह़मळी र्‌यो हतो अने ढेरेत कावा तीने देखवा बी हींडतो हतो। तीहयो ईसुन हात ना घणा कामु देखवा नी हेर करतो हतो, एतरे हेरोद ईसु ने ढेरेत सवाल पुसतो र्‌यो, पण ईसु तीमने कंय जपाप नी आप्‌यो। डायला पुंजारा अने युहदी-धरम ना मास्‌तर्‌या तां हता। अने तीहया पुरु मन अने जोर लगाड़ीन ईसु पोर गुनो लगाड़ता र्‌या। एतरे हेरोद अने तीना सीपायड़ा ईसुन हाही उड़ाया अने तीनी नामबद्‌दी कर्‌या। अने ईसु ने घटाळ्‌ळा लुगड़ा पेराया अने पासा पीलातुस ने तां मोकली देदा। तीनी टेमे गेथा हेरोद अने पीलातुस दोस्‌तीदार बण ज्‌या। अने आनी गेथा पेले तीमनी मे झगड़ो हतो।

पीलातुस ईसु ने मोत नो डंड आपे

(मत्‌ती 27:15-26; मरकुस 15:6-15; युहन्‌ना 18:39–19:16)

हाव पीलातुस डायला पुंजारा ने अने हक करन्‌या ने अने बीजा माणहु ने बोलायो; अने तीमने केदो; “तमु आहया माणेह ने माणहु ने भड़काव्‌वा वाळा ह़मजीन मार पांह लावला से, अने देखो, हाव मे तमारी अगळ आने पारखी लेदो, पण जीनी वात पोर तमु गुनो लगाड़ र्‌या, तीहयी वात ना बारा मे कानो बी गुनो नी कर्‌यो। अने राजा हेरोद ने बी मालम पड़ ज्‌यु के ईसु वण-गुनाळ्‌ळो से। एतरे तीहयो आने पासो मोकली देदो। आहयो माणेह कानु बी गळत काम नी कर्‌यो, अने आहयो मोत नो डंड आपे एवो नी हय। एतरे मे तीने ठोकाड़ीन सोड़ देत्‌लो से।” पीलातुस राजा पेले गेथोत फसह तीवार ना दाड़े, युहदी माणहु ने खुस करवा करीन एक केदड़ा ने जेल मे गेथो सोड़ देत्‌लो।

तत्‌यार आखा मेळीन आड़ी पड़्‌या, “ईने मार दे, अने अमारी वाटु बरब्‌बा ने सोड़ दे।” आहया बरब्‌बा ने जेल मे कुंड देदला हता, काहाके तीहयो आह़फा ना ह़ाती ह़ाते मेळीन दंगो करलो हतो। तीहयो थोड़ाक माणहु ने मारी बी नाखलो हतो।

पण पीलातुस राजा ईसु ने सोड़वा हींडतो हतो पण एक कावा अळी माणहु ने ह़मजाड़्‌यो। पण गड़दी मे वाळा माणहु पासा आड़ीन केदा, “आने कुरुस पोर चड़ावो आने कुरुस पोर चड़ावो!”

पीलातुस तीसरी कावा तीनी गड़दी मे वाळा माणहु ने केदो, “काहा? आहयो माणेह कानो गुनो करलो से? मने आनी मे मोत नो डंड आपे एम कंय बी गुनो नी देखायतो। एतरे मे आने ह़ड़का देवाड़ीन सोड़ देही।”

पण तीहयो मेळो अळी ज्‌योरेत आड़वा बाज ज्‌यो के ईसु ने कुरुस पोर चड़ावो। सेल्‌ली वार मे, तीमनु आड़नु मान लेदो, अळी पीलातुस राजा वीन्‌ती करीन केदो, ईसु ने मोत नो डंड आपवा करीन तीयार हय ज्‌यो। पीलातुस, तीना माणहुन तां, ज्‌यो बीजा माणहु ह़ाते लड़ाय करतो हतो, अने जेल मे नाख देदला हता, तीने सोड़ देदो अने तीमने केदो “तमुने जेम करवा लागे तेम करो।” आहयु कीन ईसु ने गड़दी मे गेथा अळी सीपायड़ा ना हात मे ह़ोप देदो।

ईसु ने कुरुस पोर चड़ाव्‌वा

(मत्‌ती 27:32-44; मरकुस 15:21-32; युहन्‌ना 19:17-19)

जत्‌यार तीहया सीपायड़ा ईसु ने कुरुस पोर चड़ाव्‌वा करीन ह़ेर मे गेथा बारथा लाया। तत्‌यार तीमने वाट्‌ये कुरेन देस मे रेण्‌यो सीमोन नाम नो एक अदमी भेट्‌यो। तीहयो तीने टेमे गाम मे गेथो ह़ेर मे आव्‌वा बाज रेलो हतो। तीहया सीपायड़ा तीने जबराण धर पाड़्‌या अने तीने ईसु नो कुरुस उचलीन ईसु पसळ-पसळ चाल्‌यो।

अने माणहु नो घणो मोटो मेळो ईसु पसळ चाल र्‌यो हतो। अने तां ह़ारीक घणा ढेरका बयरा बी हता, तीहया बयरा छाती ठोकी-ठोकीन ईसु वाटु रड़ता हता। ईसु तीने भणी वळीन केदो, “ए यरुसलेम ना सोर्‌या! मार वाटु ना रड़ो, पण तमारी वाटु अने तमारा सोरा वाटु रड़ो! काहाके देखो, तीहया दाड़ा आवत्‌ला से, तीमने माणहु केहे, ‘जुगाळा से तीहयी बयर जे वांजाय से अने तीहयी भारेपोगे जे नी जाणे, अने तीहयी धाय तीहया दुद नी पीवाड़्‌या।’ 1तीहयी टेमे तीहया बड़ा ने केहे के अमारी पोर पड़ो, अने बड़ा ने केहे के ‘आमने ढाक लेवो।’ काहाके जत्‌यार तीहया लील्‌ला झाड़ ह़ाते ईसम केतला से, ता ह़ुकला झाड़ ह़ाते कंय नी करवा जोवे?”

तीहया सीपायड़ा ईसु भेळता बीजा बे गुनाळ्‌ळा ने बी कुरुस पोर मार नाखवा करीन ह़ाते-ह़ाते ली जाय र्‌या हता। जत्‌यार तीहया ते जागा ने जीने टोबरु केय, तां पुग्‌या। तीहया ईसु ने तांत कुरुस पोर चड़ाया। अने बे गुनेगार्‌या ने एक ने ईसुन डाखरी ह़ोड़ बीजा ने जमणी ह़ोड़ कुरुस पोर चड़ाया। तत्‌यार ईसु केदो, “ए बाह, आमने माफी आप, काहाके आहया माणहु नी जाणता के आमु ह़ु कर र्‌या।” अने अळतेण तीहया सीपायड़ा ने चीट्‌ठी नाखीन ईसु ना लुगड़ा वाट लेदा। तां ढेरेत माणहु उबा रीन देख र्‌या हता, ता युहदी-पुडार्‌या ईसु नी हाही उडाड़ता जाय्‌न केदा, “हीय्‌यो बीजा ने घणो बचाड़्‌यो। आहयो ह़ाचलीन भगवान ना लारे टाळलो मसी हय, ता आह़फा ने बचाड़ ले।”

सीपायड़ा बी तीनी हाही उड़ाया। तीहया ईसुन्‌तां आया अने तीने बगड़लो अंगुर नो रोह आप्‌या, “अने केदा कदीम तु ह़ाचलीन मे युहदी नो राजा हय, ता आह़फा ने बचाड़ ले।”

ईसु ना मुंडा गेथो उपर कुरुस पोर एक लाकड़ा नी पट्‌टी ठोकली हती, तां लीखलु हतु “आहयो युहदी माणहु नो राजा से।”

ईसु ह़ाते कुरुस पोर टांगला गुनेगार्‌या माय्‌न एक ईसु नी नामबद्‌दी करतो जाय्‌न पुछ्‌यो “तु मसी नी हय ह़ु? हय ता आह़फा ने अने आमने बचाड़ ले।”

पण बीजो गुनेगार्‌यो पेल्‌ना ने वडीन केदो, “तने भगवान सी थोड़ीक बी बीक नी लागती ह़ु? तु बी ते तीहयोत डंड भुगतवा बाज र्‌यो। अने आपणु ते डंड जड़े एवात से, जे आपणु कर्‌या तीनो फोळ आपणु ने जड़ र्‌यो; पण आहयो माणेह कंय गुनो नी कर्‌यो, अने वगर गुना नो नीयाव नो डंड झेल र्‌यो।” अळतेण तीहयो ईसु ने केदो, “ए ईसु! जत्‌यार तु राजा ना वेह़ मे राज करे ता मारी फोम राखजे।”

ईसु तीने पासो केदो, “मे तने ह़ाचली केम, तु आजेत मार ह़ाते ह़रग मे रेही।”

ईसु नु कुरुस पोर मरनु

(मत्‌ती 27:45-56; मरकुस 15:33-41; युहन्‌ना 19:28-30)

अने माथेक दाड़े गेथु मांजणीक दाड़े लग। आखा देस मे अंदारु हय ज्‌यु। अने दाहड़ु भबळवा बंद हय ज्‌यु तत्‌यार मंदीर मे वाळो पड़दो फाटीन बे टुकड़ा हय ज्‌यो। तत्‌यार ईसु ज्‌योरेत आड़ीन केदो, “ए बाह! हाव मे मारो आत्‌मा तारा हात मे ह़ोप दम।” आहयु कीन ईसु मर ज्‌यो।

सीपायड़ा नो एक डायलो जे हयु तीहयु आखु देखीन भगवान नी बड़ाय करतो जाय्‌न केदो, “ह़ाचलीन आहयो एक धरमी माणेह हतो।”

जत्‌यार तां उबा हय रेला माणहु, जे हयु तीहयु देख्‌या, अने आह़फाम नी छाती ठोकता-ठोकता पासा घोर जत र्‌या। 2गलील जीला मे रेण्‌या ईसु ने जाणता हता तीहया, अने तीमनी मे बयरा बी हता, ईसु पसळ-पसळ गलील गेथा आवता हता। तीहया बी सेटात उबा रीन जे हयु तीहयु आखु देख र्‌या हता।

ईसु ने वगे करे

(मत्‌ती 27:57-61; मरकुस 15:42-47; युहन्‌ना 19:38-42)

युसुफ नाम नो एक माणेह हतो, जे यहुदा जीला ना अरीमीतीया ह़ेर वाळो हतो। तीहयो एक वारलो माणेह हतो अने युहदी-धरम ना कायदा ने पाळवा मे ईमानदार हतो। तीहयो अरीमीतीया युहदी-धरम नी खास बठक नो मेहमर हतो, ते बी तीहयो ईसु ने डंड आप्‌या करीन राजी नी हतो। तीहयो बी तीहया दाड़ा नी वाट जोय र्‌यो हतो, जत्‌यार भगवान राजा ना वेह़ मे राज करहे। तीहयो राजा पीलातुस ने तां ज्‌यो अने ईसु नो धोड़ मांग्‌यो। ता अळतेण तीहयो कुरुस पोर गेथो ईसु नो धोड़ उतार्‌यो, अने तीहया धोड़ ने एक लेफड़्‌या लुगड़ु वेर गुचवी देदो, अने एक मड़ाट्‌या मे मेल देदो। तीहयु मड़ाट्‌यु वातड़ला चाफर्‌या मे खोदीन बणावला हता। आनी पेले आहया मड़ाट्‌या मे कोयने बी नी गाड़्‌या हता। आहयो तीयारी नो दाड़ो हतो अने युहदी नो अराम नो दाड़ो सुरु हयवा वाळो हतो।

ईसु ह़ाते गलील ह़ेर मे गेथा आवला बयरा युसुफ ह़ाते-ह़ाते मड़ाट्‌यान तां ज्‌या अने देख्‌या के ईसुन धोड़ ने कीकम मड़ाट्‌या मे मेक मेल्‌यु। अळतेण तीहया घोर ज्‌या अने धोड़ पोर लगाड़वा करीन गंदाण्‌यो मसालो, अने वारलु ईत्‌तर तीयार कर्‌या। पण अराम ना दाड़े कायदान अनसारे अराम कर्‌या।

Source notes (2)
  1. Cross-reference परकासीतवाक्‌य 6:16
  2. Cross-reference लुका 8:2,3

Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.