Paliya Bible
लुका 16
पय्हा टका नो हीसाब राखण्या नो दाखलो
अळी ईसु आह़फा ना चेला ने बी केदो, “काना मालदार अदमी नो एक पय्हा टका नो हीसाब राखण्यो पावोर हतो। माणहु तीहया मालदार माणेह ने तां जाय्न तीहया पय्हा टका नो हीसाब राखण्या पावोर पोर गुनो लगाड़्या के आहयो पावोर तारु धन वापरवा बाज र्यो।” एतरे तीहयो पावोर ने बोलावीन केदो, “आहयु मे तारा बारा मे ह़ु ह़मळवा बाज र्यो। तारा पय्हा टका ना हीसाब नी कीताप देखाड़, काहाके तु हमणे गेथो पय्हा टका नो हीसाब करवा नी पावराय मे गेथो सेटो हय जा।” ता तीहयो पय्हा टका नो हीसाब-कीताप करन्यो होगो-होगो वीच्यारतो जाय्न आहयु केदो, “मे हाव ह़ु करु? मारो मालीक मने आहयी पावराय गेथो सेटो करवा बाज र्यो। ता हाव ह़ु करु, काहाके कादो खोदवा नो मारी मे दम नी हय; अने माणहु पांह पय्हा टका उगराव्वा मे मने लाज आवे। जत्यार मे पय्हा टका ना हीसाब-कीताप नी पावराय गेथो सेटो हय जही, ता माणहु मने आह़फाम ना घोर मारो आव-भाव करीन आसरो आपवा जोवे। ह़मज मे आयु के मने ह़ु करवा जोवे।”
ईसम वीच्यार करीन तीहयो आह़फा ना मालीक ना करजा वाळा माणहु ने एक-एक जणा ने बोलायो। अने पेल्ना माणेह ने पुछ्यो, तारी पोर मारा मालीक नो केतरो करजो से? तीहयो करजा वाळो माणेह केदो, “तीन हजार लीटर जेतुन नु तेल” ते पय्हा टका नो हीसाब-कीताप करन्यो पावोर केदो, “तारा बही खाता नी कीताप तारा हात मे ले, अने बहीन छोटोत पन्दरे ह़ोव लीटर लीख दे।” अळी तीहयो बीजा ने पुछ्यो, “तारी पोर मारा मालीक नो केतरो करजो से?” तीहयो करजा वाळो माणेह केदो, “ह़ोव कंटोल गम।” तत्यार पय्हा टका नो हीसाब-कीताप करन्यो पावोर केदो; “तारा खाता नी कीताप हात मे ले, अने बहीन छोटोत अस्सी कंटोल लीख दे।”
मालीक तीहया लुच्चा पय्हा टका नो हीसाब-कीताप करन्या पावोर ने घणो वारु केदो काहाके तीहयो घणी चतराये काम कर्यो; अने आहयी कळी ना माणहु नी अवल्यात आह़फा ना लेण-देण मे वीजाळु नी अवल्यात गेथा जादा कदर्या से।
“अने ईसु तीमने केदो, आहयी कळी नी धन-दवलत नी लारे आह़फा नी जुगु दोस्तीदार्या बणाय लेवो, जीनी सी जे धन-दवलत खत्तम हय जहे, ता तीहया बीजा जलम नी कळी मे तमारु आव-भाव करे। जे नानी गेथी बी नानी वात मे ईमानदार रेय, तीहयो मोट्ली वात मे बी ईमानदार से, अने जे नानी गेथी बी नानी वात मे वण-धरमी से, तीहयो मोट्ली वात मे बी वण-धरमी से। कदीम तमु वण-धरम ना धन-दवलत मे ईमानदार नी र्या, ता तमारी पोर भरहो करीन, तमने ह़ाचली नु धन-दवलत कोय आपहे? अने तमु पारका नु धन-दवलत मे ईमानदार नी रेय, ता तमने, तमारुत धन-दवलत कोय आपहे? 1
“काना बी गुलाम पावर्या ने बे मालीक नी चाकरी नी कराये; काहाके तीहयो एक मालीक सी ह़ीगी करहे अने बीजा मालीक ने मोंग करहे; नीता एक मालीक ह़ाते मेळीन रेहे अने बीजा मालीक नो वाक काडहे। तमने भगवान नी अने धन-दवलत नी बेम नी सेवा नी कराये।”
ईसु नी थोड़ीक ह़ीकापण
(मत्ती 11:12-13; 5:31-32; मरकुस 10:11-12)
फरीसी माणहु, पय्हा टका ना हयाळ्ळा हता, एतरे तीहया आहयी वात ह़मळीन माणहुम नी अगळ ईसु नी हाही उडाड़ता हता। एतरे ईसु तीहया फरीसी माणहु ने केदो, “तमु माणहु अगळ ते धरमी बणवा नो ढोंग करो; पण भगवान ते तमारा मन ने जाणे। काहाके जे वात माणहु नी नींगा मे घणी वारु से, तीहयी वात भगवान नी नींगा मे ह़ीगी आवे एवी से। 2
“भगवान ना कायदा नी सास्तर अने भगवान वगे गेथा केण्या माणहु युहन्ना नी टेमे लग हता, पेले गेथुत भगवान ना राज नु खुस-खबर नु नेवतु आखा ने जबर जड़ र्यु। अने माणहु आहया राज मे मनवाय्न घण छोटा भरायवा बाज र्या। 3ह़रग अने धरती टळ जहे, पण भगवान ना कायदा ना आकड़ा नो नानोह टीपको बी पुरो हया वगर नी टळे।” 4
ईसु अगो केतो ज्यो, “जे कोय आह़फा नी घोरवाळी ने सोड़ीन, कानी बीजी बयर ह़ाते वेवा करे, तीहयो छीनाळु करे; अने जे कोय बी तीहयी छुट्ली बयर ह़ाते वेवा करे, तीहयो बी छीनाळु करे।”
मालदार माणेह अने गरीब लाजर नो दाखलो
ईसु एक दाखलो अळी केदो, “एक घण मालदार माणेह हतो, तीहयो घणा मोगा जामण्या लुगड़ा अने लेफड़्या लुगड़ा पेरतो हतो, अने दाड़ीन वारु सुख सी रीन मजा करतो हतो। तीहया मालदार माणेह ना झापला पोर एक लाजर नाम नो एक गरीब पड़ र्यो हतो, तीने आखा डीले फोड़ा नीकळी र्या हता। अने तीहयो गरीब माणेह मालदार माणेह खायलीन उठ जाय अने एठ्लु खाणु री जाय, तीहयु खाणु खायलीन पेट भरलेही करीन हेर करतो हतो; अने कुतरा लग आवीन तीना डील पोर वाळा फोड़ा चाटता हता।”
“अने अळतेण तीहयो गरीब लाजर मर ज्यो, अने ह़रगे वाळा दुत तीहया लाजर ने ह़रग मे ली जाय्न अब्राहम नी धेड़े बहाड़ देदा। अने अळतेण तीहयो मालदार माणेह बी मर ज्यो, अने तीने डाट्या। अने तीहयो नरक मे घणो वेला करतो जाय्न उपर भाळ्यो, घण नाम्बे रीन अब्राहम नी धेड़े लाजर ने देख्यो।” तीहयो मालदार माणेह आड़ीन केदो, “बाह अब्राहम! मारी पोर गीण कर, अने लाजर ने मारीन्तां मोकली दे, एम करीन के तीहयो आह़फा नी आंगळी नो सींडो पाणी मे भीगवीन मारी जीप ने टाडी करे, काहाके मे आहयी आच मे घणी वेला करीन फपड़ी र्यो!”
अब्राहम तीहया मालदार माणेह ने केदो, “सोरा तु धरती पोर वाळी जीवाय ने फोम कर, के धरती पोर वाळी जीवाय मे सुकेत-सुक जड़्यो हतो, अने लाजर ने दुखेत-दुख जड़्यो हतो; हाव हीने आञे सुक जड़ र्यो, अने तीहयात हीसाबे तने वेला करीन फपड़वा पड़ र्यु। अने आहयी वात ने सोड़ीन आहयी बी से अमारी अने तारी वच मे घण मोटो खाडो से; एतरे कदीम कोय तारीन्तां आव्वा बी हीन्डे, ते बी तीने नी जवाये; अने कदीम कोय हीय्या गेथु आहयी धेड़े आव्वा बी हीन्डे, ता तीने हीय्या गेथु नी अवाये।” तीहयो मालदार माणेह केदो, “ए अब्राहम बाह! मे तारी सी वीन्ती करु, के तु लाजर ने मारा बाह ना घोर मोकली दे” तां मारा पांच भाय से, अने लाजर मारा घोर जाय्न आञे ह़ारकीन जे हये तीहयी वात नी गवा देहे, अने तीमने आहयी वात कीन चेताय देहे। नीता कदीम तीमनी जुगु बी आसम हय जाय अने तीहया बी आहया वेला ना जागा मे आवती रेय।
अब्राहम तीहया मालदार माणेह ने केदो, “मुसा नी अने भगवान वगे गेथा वात केण्या माणहु नी कीताप तारा भायु पांह से, तीमने तीमनी ह़मळवा जोवे।” तीहयो मालदार माणेह अब्राहम ने केदो, “ए बाह अब्राहम! तीहया तीमनी वात ने नी ह़मळे; पण कदीम मरला माणहु माय्न कोय जीवतो हय्न तीमनीन्तां जाय, ता तीहया पाप भणी गेथु मन बदलीन भगवान वगा वळ जहे।” पण अब्राहम तीहया मालदार माणेह ने केदो, “जत्यार तीहया मुसा नी अने भगवान वगे गेथा केण्या माणहु नी लीखली वात नी ह़मळता, ता कदीम मरला माय्न कोय बी जीवतो हय्न तीमनीन्तां जाय्न केहे ते बी तीहया तीनी वात नी माने।”
Source notes (4)
- Cross-reference मत्ती 6:24
- Cross-reference मत्ती 11:12,13
- Cross-reference मत्ती 5:18
- Cross-reference मत्ती 5:32; 1 कुरन्थी 7:10,11
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.