Paliya Bible
लेव्यवेवस्था 27
मान-बादा नो नेम
अळी भगवान मुसा ने केदो, ईस्रायली माणहु ने कीदे के जत्यार कोय खास मान्ता मान लेय, ता मान्ता मान लेदलु जानवर तारा केणा नी अनसारे भगवान नु रेहे; करीन कदी तीहयो अदमी हय अने तीनी उमर वीह़ सी जादा अने साट साल सी कम हय, ता चोखला जागा ना लारे तीनी कीमत पचाह सेकेल रेहे। अने कदी तीहयी बयर हय ता तीनी जुगु कीमत तीस सेकेल रेहे। पण कदी तीनी उमर पांच साल सी वीह साल तक हय, ता सोरा जुगु ते वीह़ सेकेल, अने सोरी जुगु दह सेकेल रेहे। कदी तीनी उमर एक मयना सी जादा अने पांच साल सी कम हय, ता सोरा जुगु ते पांच सेकेल, अने सोरी जुगु तीन सेकेल रेहे। पण कदी तीनी उमर साट साल नीता जादा हय, अने अदमी हय, ता तीना पंदरे सेकेल, अने बयर हय, ता दह सेकेल रेहे। पण कदी कोय गरीब हय अने तीहयो पुंजारा नी ठेरावली कीमत नी आप सके, ता तीने पुंजारा नी अगळ लाव्वा जोवे, अळतेण पुंजारो तीनी कीमत ठेरावे, जेतरु तीहयो आपी सके तेतरुत पुंजारो ठेराव्वा जोवे। अळतेण जे जानवर मे गेथा माणहु भगवान ने चड़ावो चड़ावला से, अने ईमनी मे गेथु कोय बादा लेय, ता जे जानवर कोय भगवान ने चड़ावे तीहयु चोखलु ठेरहे। बादा चड़ाव्वा वाळो माणेह तीने नी बदल सके, अने तीहयो नी ते बुरा ना बदले वारलु, अने नी ते वारलु ना बदले बुरु आपे; अने कदी तीहयो ते जानवर ना बदला मे बीजु जानवर आपे, ता तीहया बेम चोखला ठेरहे। अने जे जानवरु मे गेथा माणहु भगवान ना लेदे चड़ावो नी चड़ावे, तीमनी मे गेथु तीहयु हय, ता तीहयो तीने पुंजारान्तां उबु कर देय, ता पुंजारो जानवर वारलु से के नी वारलु बेम ने वीचारीन तीनी कीमत ठेरावे; अने जेतरी पुंजारो ठेरावे तीनी कीमत तेतरीत रेहे। पण कदी कानो मान्ता लेण्यो तीने छोड़ावे ता जे कीमत पुंजारो ठेरायो हय तीहयी कीमत मे पांचवो वाटो बड़ाय्न आप देय। पण कदी कानो आह़फा ना घोर ने भगवान ना लेदे चोखलु रेवा नी मान-बादा लेय, ता पुंजारो तीने वारलु से के नी वारलु बेम ने वीचारीन तीनी कीमत ठेरावे; अने जेतरी पुंजारो ठेरावे तीनी कीमत तेतरीत ठेरे। अने घोर ने चोखु करवा वाळो तीने छोड़ाव्वा हींडे, ता जेतरा रुप्या पुंजारो तीनी कीमत ठेरायो हहे तीने मे तीहयो पांचवो भाग अळी बड़ाय्न आपे ता तीहयु घोर तीनुत रेहे। अळी कदी आह़फा खुद नी जागा नो कानो वाटो यहोवा भगवान ना लेदे चोखलो ठेराव्वा हींडे, ता तीनी कीमत तीना हीसाब सी ठेरहे के ते जागा मे केतरु बीज पड़हे; जेतरी जागा मे होमर1 भरीन जळगम पड़े तेतरी जागा नी कीमत पचाह सेकेल ठेरहे कदी तीहयो आह़फा नु खेतर जुबली ना साल मेत चोखलु ठेरावे ता तीनी कीमत तारा ठेराव्वा ना अनुसार ठेरहे। पण कदी तीहयो तीना खेतर ने जुबली ना साल नी बाद चोखलु ठेरावे, ता जेतरा बीजा जुबली ना साल ना बचला रेय तीमना हीसाब सी पुंजारो तीनी लेदे रुप्या नो हीसाप करे, ता जेतरा हीसाप मे आवे तेतरा पुंजारान ठेरावला मे गेथा कम हये। पण कदी खेतर ने चोखलु ठेराव्वा वाळो तीने छोड़ाव्वा हींडे, ता जे कीमत पुंजारो ठेरावलो हय तीनी मे तीहयो पांचवो वाटो अळी बड़ाय्न आपे, ता खेतर तीनुत रेहे। पण कदी तीहयो खेतर ने छोड़ाव्वा नी हींडे, नीता तीहयो तीने बीजा ने वेचलो हय, ता खेतर पासु कदी नी छोड़ाय सके। पण जत्यार तीहयु खेतर जुबली ना साल मे छुटे, ता पुरी रीते ह़ोपलु खेतर ने तेम यहोवा भगवान ना लेदे चोखलु ठेरे, मतलब तीहयु पुंजारा नु खुद नु खेतर हय जाय। अळी कदी कोय आह़फा नु वेचातु लेदलु खेतर, जे तीमनी खुद नी जागा मे नु नी हय, यहोवा भगवान ना लेदे चोखलु ठेरावे। ता पुंजारो जुबली ना साल तक नो हीसाप करीन तीहया माणेह ना लेदे जेतरु ठेरावे तेतरुत तीहयो यहोवा भगवान नी लेदे चोखलु जाणीन तीहयात दाड़े आप देय। जुबली ना साल मे तीहयु खेतर तीनुत पासु हय जहे जीनी पांह वेचातु लेदलु हहे, जीनी तीहयी खुद नी जागा हहे तीनी पासी हय जहे। जे-जे चीज नी कीमत पुंजारो ठेरावे तीनी कीमत चोखला जागा ना सेकेल ना हीसाब सी ठेरे: एक सेकेल वीह गेरा नु ठेरे। पण पाळन्या जानवरु नु पेल्नु बच्चु, जे पेल्लु बच्चु हयवा ना कारण सी यहोवा नु ठेरे, तीने कोय चोखलु नी ठेरावे; तीहयु भले वाछड़ु हय के गीदल्यु हय, नीता गाडरा नु बच्चु हय तीहया यहोवा नात से। पण कदी तीहयु वीटळ्ळु जानवर हय, ता तीने चोखलु ठेराव्वा वाळो तीने पुंजारा नी ठेरावली कीमत ना हीसाप सी तीनो पांचवो वाटो अळी बड़ाय्न तीने छोड़ाय सके; अने कदी तीहयो नी छोड़ावे, ता पुंजारा नी ठेरावली कीमत पोर वेच देहे। पण आह़फा नी आखी चीजु मे गेथी जे कंय कोय यहोवा ना लेदे ह़ोपे, भले माणेह हय नीता जानवर, नीता भले तीनी खुद नी जागा नु खेतर हय, आसवी कानी बी ह़ोपली चीज ने नी ते तीने वेची सके अने नी ते छोड़ाय सके; जे कंय ह़ोपे तीहयु यहोवा ना लेदे चोखली ठेरे। माणेह मे गेथो जे कोय मोत ना डंड ना लेदे ह़ोप देय, तीने छोड़ाय नी सके तीने पक्को मार नाखे। “जागा नी पाक नो आखो दसवो वाटो, भले तीहयो जागा नो बीज हय, नीता झाड़का नु फोळ हय, तीहयु यहोवा नुत से; तीहयु यहोवा ना लेदे चोखलु ठेरे। कदी कोय आह़फा ना दसवा वाटा मे कंय पासो छोड़ाव्वा हींडे, ता पांचवो वाटो बड़ाय्न तीने छोड़ावे। अने गाय-बोळद्या अने गाडरा-बोकड़ा अने जे-जे जानवर गीणवा ना लेदे लाकड़ी तळे गेथा नीकळ जवा वाळा से तीमनो दसवो वाटो मतलब दह-दह ना पछळ एक-एक जानवर यहोवा ना लेदे चोखलु ठेरे। कोय बी तीमने वारला से के बुरा नी वीच्यारे, अने नी तीमने बदले; अने कदी कोय तीने बदल बी लेय, ता तीहयु अने तीनु बदल्लु बेम चोखलु ठेरे; अने तीने कदी छोड़ाय नी सके।” जे हुकम यहोवा ईस्रायली माणहु ना लेदे सीने बड़ो पोर मुसा ने आपलो हतो तीहया आहयात से।
Source notes (1)
- Footnote होमर सी. एल. अनुसार, एक होमेर ह़ोव कीलो बीज बराबर
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.