Paliya Bible
गीनती 1
ईस्रायली माणहु नु पेल्ली काव गीनती हयणु
ईस्रायली माणहु नु मीस्र देस मे गेथा नीकळ जवान बीजा साल ना बीजा मयना ना पेल्ला दाड़े, यहोवा सीने ना जंगल मे, मळवा ना तम्बु मे, मुसा ने केदो, “ईस्रायली नी आखी मंडळी ना कुळ अने बाहु ना घोराणा नी अनसारे, एक-एक अदमी नी गीनती नाम लीन करजे; जेतरा ईस्रायली वीह साल नीता तीनी गेथा जादा उमर ना हय, अने जे झुमायवा नी लायक हय, तीहया आखा ने तीमना टोळा नी अनसारे तु अने हारुन तीमने गण ले। अने तमारी ह़ाते हरेक कुळ नो एक-एक अदमी बी हय जे आह़फा ना बाहु ना घोराणा नो मुख्यो अदमी हय। जे तमारी मदत करहे तीहया माणहु ना नाम आहया से, मतलब, रुबेन ना कुळ मे गेथो सदेउर नो सोरो एलीसुर; सीमोन ना कुळ मे गेथो सुरीसद्दे नो सोरो सलुमीएल; यहुदा ना कुळ मे गेथो अम्मीनादाब नो सोरो नहसोन; ईस्साकार ना कुळ मे गेथो सुवार नो सोरो नतनेल; जबुलुन ना कुळ मे गेथो हेलोन नो सोरो एलीयाब; युसुफ ना सोरा मे गेथा आहया से, मतलब एप्रेम ना कुळ मे गेथो अम्मीहुद नो सोरो एलीसामा, अने मनस्से ना कुळ मे गेथो पदासुर नो सोरो गम्लीएल; बीन्यामीन ना कुळ मे गेथो गीदोनी नो सोरो अबीदान; दान ना कुळ मे गेथो अम्मीसद्दे नो सोरो अहीएजेर; आसेर ना कुळ मे गेथो ओक्रान नो सोरो पगीएल; गाद ना कुळ मे गेथो दुएल नो सोरो एल्यासाप; नप्ताली ना कुळ मे गेथो एनान नो सोरो अहीरा।” मंडळी मे गेथा जे अदमड़ा आह़फा-आह़फाम ना बाहु ना कुळ ना मुखी हय्न बोलावला से तीहया आहयात से, अने आहया ईस्रायल ना बीजा मंडळ्या मे मुख्या माणहु हता।
जे अदमड़ा ना नाम उपर लीखला से तीमने ह़ाते लीन, मुसो अने हारुन बीजा मयना ना पेल्ला दाड़े आखी मंडळी ने एक्ठी कर्या, ता ईस्रायली आह़फा-आह़फाम ना कुळ अने आह़फा-आह़फाम ना आड़ा-बुड़ा ना घोराणा नी अनसारे वीह साल नीता तीनी सी वदु उमर वाळा ना नामु नी गीनती करावीन आह़फा-आह़फाम नी अवल्यात ना नामु ने लीखाड़्या। जे रीते यहोवा मुसा ने हुकम आपलो हतो तीनीत अनसारे तीहयो सीने ना बड़ा मे तीमनी गीनती कर्यो। ईस्रायल ना आखा गेथा पेल्ला पयदा हयला रुबेन नी पीड़ी ना जेतरा अदमड़ा आह़फाम ना कुळ अने आह़फाम ना घोराणा नी अनसारे वीह साल नीता तीनी गेथा जादा उमर ना हता अने जे झुमायवा ना लायक हता, तीहया आखाम ने आह़फा-आह़फाम ना नाम सी गण्या: अने रुबेन ना कुळ ना गणला अदमी साड़ी छीयालीस हजार हता। सीमोन नी पीड़ी ना जेतरा अदमी खुद ना कुळ अने आह़फाम बाहु ना घोराणा नी अनसारे वीह साल नीता तीनी गेथा जादा उमर ना हता, अने जे झुमायवा नी लायक हता तीहया आखाम ने आह़फा-आह़फाम ना नाम सी गण्या: अने सीमोन ना कुळ ना गणला अदमी उनसट हजार तीन ह़ो हता। गाद नी पीड़ी ना जेतरा अदमी खुद ना कुळ अने आह़फाम बाहु ना घोराणा नी अनसारे वीह साल नीता तीनी गेथा जादा उमर ना हता, अने जे झुमायवा नी लायक हता तीहया आखाम ने आह़फा-आह़फाम ना नाम सी गण्या: अने गाद ना कुळ ना गणला अदमी पेतालीस हजार साड़ी छो ह़ो हता। यहुदा नी पीड़ी ना जेतरा अदमी खुद ना कुळ अने आह़फाम बाहु ना घोराणा नी अनसारे वीह साल नीता तीनी गेथा जादा उमर ना हता, अने जे झुमायवा नी लायक हता तीहया आखाम ने आह़फा-आह़फाम ना नाम सी गण्या: अने यहुदा ना कुळ ना गणला अदमी चोहत्तर हजार छो ह़ो हता। ईस्साकार नी पीड़ी ना जेतरा अदमी खुद ना कुळ अने आह़फाम बाहु ना घोराणा नी अनसारे वीह साल नीता तीनी गेथा जादा उमर ना हता, अने जे झुमायवा नी लायक हता तीहया आखाम ने आह़फा-आह़फाम ना नाम सी गण्या: अने ईस्साकार ना कुळ ना गणला अदमी चोवन हजार च्यार ह़ो हता। जबुलुन नी पीड़ी ना जेतरा अदमी खुद ना कुळ अने आह़फाम बाहु ना घोराणा नी अनसारे वीह साल नीता तीनी गेथा जादा उमर ना हता, अने जे झुमायवा नी लायक हता तीहया आखाम ने आह़फा-आह़फाम ना नाम सी गण्या: अने जबुलुन ना कुळ ना गणला अदमी सत्तावन हजार च्यार ह़ो हता। युसुफ ना सोरा मे गेथा एप्रेम नी पीड़ी ना जेतरा अदमी खुद ना कुळ अने आह़फाम बाहु ना घोराणा नी अनसारे वीह साल नीता तीनी गेथा जादा उमर ना हता, अने जे झुमायवा नी लायक हता तीहया आखाम ने आह़फा-आह़फाम ना नाम सी गण्या: अने एप्रेम ना कुळ ना गणला अदमी चाळीह हजार पांच ह़ोव हता। युसुफ ना सोरा मनस्से नी पीड़ी ना जेतरा अदमी खुद नी कुळ अने आह़फाम बाहु ना घोराणा नी अनसारे वीह साल नीता तीनी गेथा जादा उमर ना हता, अने जे झुमायवा नी लायक हता तीहया आखाम ने आह़फा-आह़फाम ना नाम सी गण्या: अने मनस्से ना कुळ ना गणला अदमी बत्तीस हजार बे ह़ो हता। बीन्यामीन नी पीड़ी ना जेतरा अदमी खुद ना कुळ अने आह़फाम बाहु ना घोराणा नी अनसारे वीह साल नीता तीनी गेथा जादा उमर ना हता, अने जे झुमायवा नी लायक हता तीहया आखाम ने आह़फा-आह़फाम ना नाम सी गण्या: अने बीन्यामीन ना कुळ ना गणला अदमी पंयतीस हजार च्यार ह़ो हता।
दान नी पीड़ी ना जेतरा अदमी खुद ना कुळ अने आह़फाम बाहु ना घोराणा नी अनसारे वीह साल नीता तीनी गेथा जादा उमर ना हता, अने जे झुमायवा नी लायक हता तीहया आखाम ने आह़फा-आह़फाम ना नाम सी गण्या: अने दान ना कुळ ना गणला अदमी बासट हजार ह़ात ह़ो हता। आसेर नी पीड़ी ना जेतरा अदमी खुद ना कुळ अने आह़फाम बाहु ना घोराणा नी अनसारे वीह साल नीता तीनी गेथा जादा उमर ना हता, अने जे झुमायवा नी लायक हता तीहया आखाम ने आह़फा-आह़फाम ना नाम सी गण्या: अने आसेर ना कुळ ना गणला अदमी ईकतालीस हजार पांच ह़ोव हता। नप्ताली नी पीड़ी ना जेतरा अदमी खुद ना कुळ अने आह़फाम बाहु ना घोराणा नी अनसारे वीह साल नीता तीनी गेथा जादा उमर ना हता, अने जे झुमायवा नी लायक हता तीहया आखाम ने आह़फा-आह़फाम ना नाम सी गण्या: अने नप्ताली ना कुळ ना गणला अदमी तीरपन हजार च्यार ह़ो हता। आहयी रीते मुसो अने हारुन अने ईस्रायल ना बारे मुख्या, जे आह़फा-आह़फाम ना बाहु ना घोराणा ना मुखी हता, तीहया आखा ने गण लेदा अने तीमनी गणती आहयीत हती। एतरे जेतरा ईस्रायली वीह साल नीता तीनी गेथा जादा उमर ना हयवा ना कारण सी झुमायवा नी लायक हता तीमने आह़फाम ना बाहु ना घोराणा नी अनसारे गण्या, अने तीहया आखा गणला अदमी भेसकीन छो लाख तीन हजार साड़ी पांच ह़ो हता।
आमनी मे लेवीम ने आह़फाम ना बाहु ना घोराणा नी अनसारे नी गण्या। काहाके यहोवा मुसा ने केदलो हतो, “लेवी कुळ नी गणती ईस्रायलीम नी ह़ाते नी करजे; पण तु लेवी माणहु ने गवा ना तम्बु पोर, अने तीनु आखु ह़मान पोर, मतलब जे कंय तीनी ह़ाते जोड़ायली से तीनी पोर हक आपजे; अने आखु ह़मान भेळ तम्बु ने तीहयात उचल्या करे, अने तीहयात तीनी मे सेवा-चाकरी बी कर्या करे, अने तम्बु नी आड़े-धेड़े तीहया पड़ावो नाख्या करे। अने जत्यार-जत्यार तम्बु ने अगा लीजवा नु हय ता-ता लेवी पड़ावा ने ओदार देय, अने जत्यार-जत्यार तम्बु ने उबु करवा नु हय ता-ता लेवी माणहुत तीने उबु करे; अने बीजु कोय ह़ाते आवे ता तीने मार नाखवा जोवे। ईस्रायली आह़फा-आह़फाम ना पड़ावा आह़फा-आह़फाम ना टोळा मे अने आह़फा-आह़फाम ना झंडा नी ह़ाते उबा कर्या करे; पण लेवी आह़फाम ना पड़ावा गवा ना तम्बुन्तां च्यारो-मेर उबा कर्या करे, कंय माय्न आसम नी हये के ईस्रायली नी मंडळी पोर मारी रीह आय पड़े; अने लेवी गवा ना तम्बु नी रखवाळी कर्या करे।” जे हुकम यहोवा मुसा ने आपलो ईस्रायली तीनीत अनसारे कर्या।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.