Paliya Bible
गीनती 2
टोळा मे कुळ नु लायनबंद काम
अळतेण यहोवा मुसा ने अने हारुन ने केदो, ईस्रायली मळवा ना तम्बु नी च्यारो-मेर अने तीनी अगळ आह़फा-आह़फाम ना झंडा अने आह़फा-आह़फाम ना आड़ा-बुड़ा नी सेलाणी नी ह़ाते आह़फाम ना पड़ावा उबा करे। जे आह़फाम नी उगवणी ह़ोड़ आह़फा-आह़फाम ना टोळा नी अनसारे पड़ावो उबो कर्या करे, तीहया यहुदा ना टोळा ना झंडा वाळा माणहु रेहे, अने तीमनो मुख्यो अम्मीनादाब नो सोरो नहसोन रेहे, अने तीमना टोळा ना गणला अदमी चोहत्तर हजार छो ह़ो से। तीमनी ह़ाते जे पड़ावो उबो कर्या करे तीहया ईस्साकार ना कुळ ना रेय अने तीमनो मुख्यो सुवार नो सोरो नतनेल रेहे, अने तीमना टोळा ना गणला अदमी चोवपन हजार च्यार ह़ो से। अने तीमनी धेड़े जबुलुन ना कुळ वाळा रेहे, अने तीमनो मुख्यो हेलोन नो सोरो एलीयाब रेहे, अने तीना टोळा ना गणला माणहु सत्तावन हजार च्यार ह़ो से। आहयी रीते यहुदा ना टोळा मे जेतरा आह़फा-आह़फाम ना टोळा नी अनसारे गणला तीहया आखा ने भेसकीन एक लाख छीयासी हजार च्यार ह़ो से। पेले तीहयात अगा बड़्या करे।
दखणाव भणी रुबेन ना टोळा ना झंडा ना माणहु आह़फा-आह़फाम ना टोळा नी अनसारे रेय, अने तीमनो मुख्यो सदेउर नो सोरो एलीसुर रेहे, अने तीमना टोळा ना गणला अदमी साड़ी छीयालीस हजार से। तीमनी धेड़े जे पड़ावा उबा कर्या करे तीहया सीमोन ना कुळ ना रेहे अने तीमनो मुख्यो सुरीसद्दे नो सोरो सलुमीएल रेहे, अने तीमना टोळा ना गणला अदमी उनसट हजार तीन ह़ो से। अने तीमनी धेड़े गाद ना कुळ वाळा रेय, अने तीमनो मुख्यो रुएल नो सोरो एल्यासाप रेहे, अने तीमना टोळा ना गणला अदमी पेतालीस हजार साड़ी छो ह़ो से। रुबेन ना टोळा मे जेतरा आह़फा-आह़फाम ना टोळा नी अनसारे गण्या तीहया आखा मेळीन एक लाख ईक्कावन हजार साड़ी च्यार ह़ो से। बीजी काव अगा आहया बड़े।
तीमनी पसळ अने आखा टोळा नी वचा-वच लेवीम ना पड़ावा भेळ मेल-मीलाप वाळा तम्बु अगा बड़्या करे; जे रीते तीहया तम्बु उबा कर्या तीहयीत रीते तीहया आह़फा-आह़फाम ना जागा पोर आह़फा-आह़फाम ना झंडान्तां जाय। “बुडणली ह़ोड़ एप्रेम ना टोळा ना झंडा ना माणहु आह़फा-आह़फाम ना टोळा नी अनसारे रेय, अने तीमनो मुख्यो अम्मीहुद नो सोरो एलीसामा रेहे, अने तीमना टोळा ना गणला अदमी चाळीह हजार पांच ह़ोव से। तीमनी ह़ाते मनस्से ना कुळ ना रेय, अने तीमनो मुख्यो पदासुर नो सोरो गम्लीएल रेहे, अने तीमना टोळा ना गणला अदमी बत्तीस हजार बे ह़ो से। अळतेण बीन्यामीन ना कुळ ना रेय, अने तीमनो मुख्यो गीदोनी नो सोरो अबीदान रेहे, अने तीमना टोळा ना गणला अदमी पंयतीस हजार च्यार ह़ो से। एप्रेम ना पड़ावा मे जेतरा आह़फा-आह़फाम ना टोळा नी अनसारे गण्या तीहया आखा मेळीन एक लाख आंठ हजार एक ह़ो अदमी से। तीसरी काव आहया अगा बड़े। दखवरी ह़ोड़ दान ना टोळा ना माणहु आह़फा-आह़फाम ना टोळा नी अनसारे रेय, अने तीमनो मुख्यो अम्मीसद्दे नो सोरो अहीएजेर रेहे, अने तीमना टोळा ना गणला अदमी बासट हजार ह़ात ह़ो से। अने तीमनी ह़ाते पड़ावा उबा करे तीहया आसेर ना कुळ ना रेय, अने तीमनो मुख्यो ओक्रान नो सोरो पगीएल रेहे, अने तीमना टोळा ना गणला अदमी साड़ी ईकतालीस हजार से। अळतेण नप्ताली ना कुळ ना रेय, अने तीमनो मुख्यो एनान नो सोरो अहीरा रेहे, अने तीमना टोळा ना गणला अदमी तीरपन हजार च्यार ह़ो से। अने दान ना टोळा मे जेतरा गणला हता तीहया आखा मेळीन एक लाख सत्तावन हजार छो ह़ो से। आहया आह़फा-आह़फाम झंडान ह़ाते-ह़ाते हय्न आखा सी पसळ चाल्या करे।”
ईस्रायली मे गेथा जे आह़फा-आह़फाम ना आड़ा-बुड़ा ना घोराणा नी अनसारे गणला से तीहया आहयात से; अने आखा टोळा ना जेतरा अदमी आह़फा-आह़फाम ना टोळाम नी अनसारे गणला तीहया आखा मेळीन छो लाख तीन हजार साड़ी पांच ह़ो से। पण यहोवा मुसा ने जे हुकम आपलो तीनी अनसारे लेवी ते ईस्रायली मे नी गण्या। आहयी रीते जे-जे हुकम यहोवा मुसा ने आपलो हतो ईस्रायली तीहया हुकम नी अनसारे आह़फा-आह़फाम ना कुळ अने आह़फा-आह़फाम ना बाहु ना घोराणा नी अनसारे, आह़फा-आह़फाम ना झंडान ह़ाते पड़ावो उबो करता हता अने अगा बी बड़ता हता।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.