Paliya Bible
योना 4
योना नी रीह अने भगवान नी दया
आहयी वात योना ने घणी बुरी लागी, अने तीहयो घणो खीजवाय ज्यो। तीहयो यहोवा सी आहयु कीन वीन्ती कर्यो, “ए यहोवा, जत्यार में मारा देस मे हतो ता आहयी वात नी केदलो हतो ह़ु? आहयात कारण सी में तारो हुकम ह़मळतेत तर्सीस ह़ेर नाह जवा करीन उतवाळ करलो; काहाके में जाणतो हतो के तु मोंग करवा वाळो अने दयाळ्ळो भगवान से, अने धीरो रीन रीह करवा वाळो, दया करवा वाळो से, अने दुख आपवा सी खुस नी हये। आनी लेदे हाव ए यहोवा भगवान, मारो जीव ली ले; काहाके मारी लेदे जीव्वा गेथु मरवा वारु से।” यहोवा केदो, “तने जे रीह लाग री, तीहयी वारु से ह़ु? ता योना तीहया ह़ेर गेथो नीकळीन तीनी उगणली धेड़े रेवा बाज ज्यो; अने तां एक छापरी बणावीन तीना साहळा मे बहीन आहयु देखवा बाज ज्यो के हाव ह़ेर नु ह़ु हयहे? तत्यार यहोवा एक दीवला नु झाड़ उगाड़ीन आसम वदाड़्यो के योना ना मुंडा पोर साहळो हये, जीनी सी तीनो दुख सेटो हये। योना तीहया दीवला ना झाड़ ना कारण घणो खुस हयो। ह़वारे जत्यार परगण फाटवा बाज ज्यु ता भगवान एक कीड़ा ने मोकल्यो, कीड़ो दीवला ना झाड़ ने आसम कातर्यो के तीहयु झाड़ ह़ुकाय ज्यु। जत्यार दाहड़ु उग्यु, ता भगवान उगवणी गेथी झाव चलाड़्यो, अने तोप योना ना मुंडा पोर आसम लाग्यो के तीहयो बेहोस हयवा बाज ज्यो, अने तीहयो आहयु कीन मोत मांग्यो, के मारी लेदे जीव्वा गेथु मरवा वारु से।” भगवान योना ने केदो, “तारी रीह, जे दीवला नु झाड़ नी लेदे लागली से, ह़ु तीहयी वारु से?” तीहयो केदो, “होव, मने जे रीह लागली से तीहयी वारुत से, अने आनी सी मारो जीव बी जाय ते बी वारुत से।” ता यहोवा केदो, “जे दीवला ना झाड़ नी लेदे तु कंय बी मेहनत नी कर्यो, नी तीने वदाड़्यो, जे एकीत रात मे उग्यु, अने एकीत रात मे खत्तम बी हय ज्यु; तीनी पोर तु दया कर्यो। ता आहयु मोट्लु ह़ेर नीनवे, जीनी मे एक लाख वीह हजार गेथा जादा माणहु से जे आह़फाम ना जमणा-डाखर्या हात नी ह़तायली वात नी जाणे, अने घणा ढेरका पाळन्या जानवरु बी तीनी मे रेय, ता ह़ु मे तीनी पोर दया नी करु?”
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.