Paliya Bible
योना 3
योना नु हुकम ने माननु
ता यहोवा भगवान नो आहयो बोल बीजी कावा योनान्तां पुग्यो: उठीन तीहया मोट्ला ह़ेर नीनवे मे जा, अने जे वात में तने केही, तीनो तां परच्यार कर। ता योना यहोवा ना बोल ना अनसारे नीनवे ह़ेर मे ज्यो। नीनवे ह़ेर एक घणु मोटु ह़ेर हतु, तीहयु एक धेड़े गेथु ह़ेली धेड़े तक तीन दाड़ा नी चाल नु हतु। योना ह़ेर मे पुगीन एक दाड़ा नी चाल ने पुरी कर्यो, अने आहयो परच्यार करतो ज्यो, “हमणे गेथा चाळीह दाड़ा वीतवान बाद नीनवे ह़ेर खत्तम हय जहे।” ता नीनवे ह़ेर मे रेण्या माणहु भगवान पोर भरहो कर्या; अने उपाह पाळवा नो परच्यार कर्या अने मोट्ला गेथा नान्ला लग आखा चचर्या ठेला ओड्या। ता आहयी खबर नीनवे ह़ेर ना राजान्तां पुगी; अने तीहयो राजगादी पोर गेथो उठ्यो, आह़फा ना राज ना लुगड़ा नीकाळीन चचर्या ठेला ने ओड लेदो, अने रोखड़ा ना ढेर पोर बह ज्यो। राजो आखा नीनवे ह़ेर मे आहयी डुंडी पीटाड़ी के आखा मुख्या भणी गेथो आहयो हुकम से, माणहु अने गाय-बोळद्या, गाडरा-बोकड़ा, अने बीजा जानवरु कोय कंय बी नी खाय-पीय। माणहु अने जानवरु बेम गोंटो ओडे, अने तीहया भगवान ने रड़ी-रड़ीन आड़े; एक-एक माणेह गलत वाटे गेथा फीरे; अने तीहयी लड़ाय सी जे तीहया करे, पछतावो करे। हय सके, भगवान दया करे अने आह़फा नी ईच्छा बदल लेय, अने तीनी भड़कली रीह ने ठंडी पाड़ लेय अने आपणु खत्तम हयवा सी बच जीया। जत्यार भगवान तीमना कामु ने देख्यो, के तीहया गलत वाटे गेथा फीर र्या, ता भगवान आह़फा नी ईच्छा बदल देदो, अने तीमनु जे नुकसान करवा ठान र्यो हतो, तीने नी कर्यो।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.