Paliya Bible
योना 2
योना नी वीन्ती
तत्यार योना राकस माछली ना पेट मे गेथो आह़फा ना भगवान यहोवा सी वीन्ती करीन केदो, “में खतरा मे पड़ीन यहोवा भगवान ने आड़्यो, अने तीहयो मारी ह़मळी लेदो, में पताळ मे गेथो आड़्यो, अने तु मारी वीन्ती ह़मळी लेदो। तु मने उंडला दर्या मे दर्या ना बुंदे नाख देदलो हतो; अने में धारुम नी वचमे पड़ र्यो हतो, तारी मोकल्ली आखी झलक अने लेहरु मारी उपर माय्न वय जी। ता में केदो, ‘में तारी अगळ गेथो नीकाळ देदलो से; कीसम में तारा चोखला मंदीर भणी अळी नींगा नाखही?’ में पाणी सी आञे तक घेरवायलो हतो के मारो जीव नीकळ जतो हतो उंडली दर्या मारी च्यारो-मेर हती, अने मारा मुंडा मे ह़ेवाळ वीटळायलो हतो। में बड़ा ना मुळ्या तक पुग जेलो हतो; में सदा ना लेदे जागा मे बंद हय जेलो हतो; ते बी ए मारा भगवान यहोवा तु मारा जीव ने मोत ना खाडा मे गेथो चुटलो से। जत्यार मारो जीव हालर-वीलर हय जेलो ता में यहोवा भगवान ने फोम कर्यो; अने मारी वीन्ती तारा चोखला मंदीर मे पुग जी। जे माणहु धोका नी फालतु चीजु पोर मन लगाड़े, तीहया आह़फाम नी पोर दया करवा वाळा भगवान ने छोड़ देय। पण में तीनी बड़ाय ना गीत गावीन मान-बादा चड़ावही; जे मान्ता में लेदलो से तीने पुरी करही। छुटकारो यहोवा भगवान सीत हये।” तत्यार यहोवा भगवान राकस माछली ने हुकम आप्यो अने तीहयी योना ने दर्या नी धेड़े ओगळ देदी।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.