Paliya Bible
योना 1
भगवान ना हुकम ने नी माननु
यहोवा नो आहयो बोल अमीते ना सोरा योनान्तां पुग्यो: “उठीन ह़ेला मोट्ला ह़ेर नीनवे मे जा, अने तीना वीरोद मे परच्यार कर; काहाके तीनी बुराय मारी नींगा मे जादा हय जेली से।” पण योना यहोवान अगळ गेथो तरसीस ह़ेर मे नाह जवान करते उठ्यो, अने याफा ह़ेर मे जाय्न तर्सीस जवा वाळु ढुंड्यु देख्यो; अने भाड़ु आपीन तीनी पोर चड़ ज्यो के तीमनी ह़ाते यहोवा नी अगळ गेथो तर्सीस ह़ेर मे जत रेय।
ता यहोवा दर्या मे एक मोट्ली आंजी चलाड़ देदो, अने दर्या मे मोट्ली आंजी तोफान आय लाग्यो, आञे तक के ढुंड्यु टुटवा वाळु हतु। ता ढुंड्या चलाड़न्या बीहीन आह़फा-आह़फाम ना देवताम ने आड़वा बाज ज्या; अने ढुंड्या मे जे वेपारीम नु ह़मान हतु तीने दर्या मे नाखवा बाज ज्या के ढुंड्यु हळकु हय जाय। पण योना ढुंड्यु ना हेट्ला हीस्सा मे उतरीन भारी नींदर ह़ुय जेलो हतो।
तत्यार ढुंड्यु चलाड़न्यो मुख्यो तीनीन तां आवीन केदो, तु भारी नींदर मे ह़ुका ह़ुय र्यो? उठ, आह़फा ना देवता सी वीन्ती कर, हय सके भगवान ने आपणी पोर दया आय जाय, अने आपणो नास नी हये।
ता तीहया आखा केदा, “आवो, आपणु चीट्ठी नाखीन जाण लेता के गरा आपणी पोर कोयना कारण सी आय री।” तत्यार तीहया चीट्ठी नाख्या अने चीट्ठी योना ना नाम पोर नीकळी। ता तीहया योना ने केदा, “आमने देखाड़ के आहयी गरा अमारी पोर काहा आय री? तारो काम-धंदो ह़ु से? तु कां गेथो आय र्यो? तु काना देस नो अने कानी जाती नो से?”
तीहयो तीमने केदो, में ईब्री जाती नो से; अने ह़रग वाळो भगवान यहोवा जे दर्या अने धरती बेम ने बणावलो से, तीनीत बीक मानु। तत्यार तीहया घणा बीही ज्या, अने तीने केवा बाज ज्या, “तु आहयु ह़ु कर्यो?” तीहया जाण जेला हता के आहयो यहोवा भगवान अगळ गेथो नाहीन आवलो से; काहाके तीहयो खुद तीमने देखाड़ देदलो हतो। ता तीहया तीने पुछ्या, “आमु तारी ह़ाते ह़ु करया जीनी सी दर्या होगी री जाय?” तीहयी टेमे दर्या नी लेहर बड़ती जती हती।
तीहयो तीमने केदो, “मने चुटीन दर्या मे नाख देवो; ता दर्या होगी री जहे; काहाके में जाणु के आहयो भारी आंजी-तोफान तमारी पोर मारा कारण आय र्यो।”
ते बी तीहया घणी मेहनत सी चलाड़ता र्या के तीने काठे पुगाड़े, पण पुग नी सक्या, काहाके दर्या नी लेहरु तीमना वीरोद मे बड़तीत जाय री हती। ता तीहया यहोवा ने आड़ीन केदा, “ए यहोवा आमु वीन्ती करया के आहया माणेह ना जीव ना बदले आमने खत्तम ना करे, अने वण-गुनाळ्ळा माणेह नी हत्या नो गुनो अमारी पोर नी लगाड़जे, काहाके ए यहोवा भगवान जे तारी मरजी हती तीहयु तु कर्यो।” ता तीहया योना ने चुटीन दर्या मे नाख देदा; अने दर्या नी खतरनाक लेहरु थांग जी। ता तीहया माणहु यहोवा नी घणी बीक मान्या, अने तीने भेट चड़ाया अने मान-बादा लेदा।
यहोवा भगवान एक मोट्ली राकस माछली ठेरावलो हतो के योना ने गळ जाय; अने योना राकस माछली ना पेट मे तीन दाड़ा अने तीन रात पड़ र्यो।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.