Paliya Bible
आमोस 9
भगवान नो नीयाव
में मालीक ने वेदी नी उपर उबो हयलो देख्यो, अने तीहयो केदो: “खम्बा ना काना पोर दे जीनी सी पयड़्या हीले, अने तीमने आखा माणहु ना मुंडा पोर पाड़ीन टुकड़ा-टुकड़ा कर, अने जे खत्तम हयवा सी बचे, तीमने में तलवार सी मार देही; तीमनी मे सी एक बी नी नाहे, अने जे आह़फा ने बचाड़े, तीहयो नी बचे। काहाके चाहे तीहया खोदीन पताळ मे उतरी जाय, ता तां गेथो में हात बड़ावीन तीमने लावही, चाहे तीहया ह़रग पोर चड़ जाय, ता तां गेथो में तीमने उतार लावही। चाहे तीहया कार्मेल बड़ा नी चोट्ली मे ह़ताय जाय, पण तां बी मे तीमने ह़ोदी-ह़ोदीन धर लेही, अने चाहे तीहया दर्या ना बुंदे मारी नजर सी आडोळ हय, तां बी में गड़हा ने तीमने चाव्वा नो हुकम आपही। चाहे दुस्मन तीमने गेरीन गुलामी मे ली जाय, तां बी मे हुकम आपीन तलवार सी तीमने मरावही; अने में तीमनी पोर भलाय करवा नी लेदे नी, पण बुरायेत करवा नी लेदे नजर नाखही।” सेनाम ना भगवान यहोवा ना छीमवा सी धरती पीगळे, अने तीनी पोर आखा रेवा वाळा दुखी हये; अने तीहया आखान आखा मीस्र नी नंदीन ह़रका हय जाय, जे बड़े अने लेहर आवे, अने कम हय जाय। जे ह़रग मे आह़फा नु घोर बणावे, अने आह़फा ना आखा ह़रग नी नीव धरती पोर नाखे, अने आह़फा ना हुकम सी दर्या नु पाणी धरती पोर वयाड़ देय, तीनुत नाम यहोवा से। “ए ईस्रायल ना माणहु,” यहोवा ना आहया बोल से, “ह़ु तमु मारी लेदे कुसीयो ह़रका नी हय? ह़ु में ईस्रायल ने मीस्र देस गेथो अने पलीस्तीम ने कप्तोर सी नी नीकाळ्यो? अने अराम मे रेण्या ने कीर गेथो नी लायो? देखो, मालीक यहोवा नी नजर आहया पाप वाळा राज्य पोर लागली से, अने में आने धरती पोर गेथो खत्तम करही; ते बी में पुरी रीती सी याकुब ना घोराणा ने खत्तम नी करु,” यहोवा ना आहयात बोल से।
“मारा हुकम सी ईस्रायल नु घोराणु आखा देसु मे आसम जत रेहे जीसम अन चाळनी मे जाय, पण तीनो एक बी वारलो दाणो भोय्मे नी पड़े। मारा माणहु मे वाळा आखा पापी जे केय, ‘तीहयी गरा अमारी पोर नी पड़े, अने नी आमने घेरवे,’ तीहया आखा तलवार सी मरहे।
ईस्रायल ने पासु बणावणु
“तीहयी टेमे में दावुद नी ओदरली छापरी ने उबी करही, अने तीना वाड़ा ना फाटाम ने ह़ुदारही, अने तीना ओदरला घोरु ने पासु बणावही, अने जीसम तीहयु पेल्ना वारा मे हतु, तीने तेमेत बणाय देही; जीनी सी तीहया बचला एदोम मे रेवा वाळा ने नी पण आखा राज्य ने जे मारा केवाये, आह़फाम ना हक मे लेय,” अने यहोवा जे आहयु काम पुरु करे, तीना आहया बोल से।
यहोवा ना आहया बी बोल से, “देखो, आसवा दाड़ा आवे, होळ जोपवा वाळो वाडवा वाळा ने अने अंगुर ने रंदळवा वाळो बीज वेरवा वाळा ने हात कर लेहे; अने बड़ा मे गेथो अंगुर नो रोह टपकवा बाज जहे, अने आखा बड़्या तीनी मे डुब जहे। में मारा माणहु ईस्रायल ना गुलामी मे वाळा ने पासो ली आवही, अने तीहया उजड़ला ह़ेरु ने पासा ह़ुदारीन तीनी मे रेहे; तीहया अंगुर नी वाड़ी लगाड़ीन अंगुर नो रोह पीहे, अने बगीचो लगाड़ीन तीनो फोळ खाहे। में तीमने, तीमनीत जागा मे वेरही, अने तीहया आह़फाम नी जागा मे गेथा जे में तीमने आपलो से अळी कदी नी उखड़े,” तमारा भगवान नो आहयो बोल से।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.