Paliya Bible
आमोस 8
फोळु सी भरली टोपलीन दरसन
भगवान यहोवा मने आसम देखाड़्यो: के उनाळा ना दाड़ा ना फोळु सी भरली एक टोपली से। यहोवा केदो, “ए आमोस, तने ह़ु देखाव पड़े?” में केदो, “उनाळा ना दाड़ा ना फोळु सी भरली एक टोपली।” तत्यार यहोवा मने केदो, “मारा ईस्रायल ना माणहु नु खत्तम हयणु आय ज्यु; में तीने अळी नी छोड़ु।” भगवान यहोवा ना आहया बोल से, “तीहया दाड़े मंदीर ना गीतु दुख मे बदली जहे, धोड़ु नो मोट्लो ढेर लागहे; अने तीमने आखा जागा मे होगात नाख देहे।”
ईस्रायल नु खत्तम हयणु
आहयु ह़मळो, तमु जे गरीब माणहु ने लुटवा अने देस ना भोळा माणहु ने खत्तम करवा हींड र्या, तमु केवो, “नवलो चांद कत्यार जहे के आमु अन वेच सकया? अराम नो दाड़ो कत्यार जहे, के आमु अन ना मोहट्या खोलीन बाट1 ने नानो अने ताकड़ी2 ने भारी कर दीया, अने धोका ना माप सी ठगीया, के आमु गरीबु ने पय्हा आपीन, अने कमजोर ने एक जोड़ी मोजड़्या नी कीमत मे वेचाता ली लीया, अने तमु बगड़लु अन वेेचे?”
यहोवा, जीनी पोर याकुब ने घमंड करवा वारु से, तीहयो आह़फा नी ह़ाम खाय्न केय, “में तमारा काम ने कदी नी भुलु। ह़ु आहया कारण धरती नी कापे? ह़ु तीनी पोर ना रेवा वाळा रावण्या नी करे? आहयु देस आखुन आखु मीस्र नी नील नंदीन तेम हयहे, जे वदु हये, अने लेहर आवे, अने कम हय जाय।” भगवान यहोवा ना आहया बोल से, “तीहयी टेमे में दाहड़ु ने बोपरी वळे डुबाड़ देही, अने आहया देस ने दीहुत अंदारु कर देही। में तमारा तीवारु नी खुसी ने छेटी करीन वेला करावही, अने तमारा आखा गीतु ने छेटा करीन दुख ना गीतु गवाड़ही; में तमने आखा ने दुख ना लुगड़ा पेरावही, अने तमारा आखा ना मुंडा ने बोड़ावही, अने एवो दुख करावही जेम एक-खोळ्या नी लेदे हये, अने तीनु खत्तम हयणु काठला दुख ना दाड़ान तेम हयहे।”
भगवान यहोवा ना आहया बोल से, “देखो, एवा दाड़ा आवे, जत्यार में आहया देस मे काळ पाड़ही, तीहया काळ मे नी ते अन नी भुक अने नी पाणी नी तहरे लागे, पण यहोवा ना बोलु ने ह़मळवा नीत भुक अने तहरे रेहे। माणहु यहोवा ना बोलु ने ह़ोदवाळ्या एक दर्या गेथा बीजी दर्या लग अने धुराव गेथा उगवणा तक मार्या-मार्या फीरहे, पण तीने नी हात कर सके।
“तीहयी टेमे घटाळा सोर्या अने जुवान अदमी बेम तहरे नी करते झमळाय पड़हे। जे माणहु सामर्या ना पापमुल देवता नी ह़ाम खाय, अने जे केय, दान ना देवता नी ह़ाम खाय, अने बेर्सेबा ना देवता नी ह़ाम खाय, तीहया आखा पड़ जहे, अने पासा नी उठे।”
Source notes (2)
- Footnote बाट एपा
- Footnote ताकड़ी सेकेल
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.