Paliya Bible
आमोस 7
खत्तम हयवा ना तीन दरसन
भगवान यहोवा मने आहयु देखाड़्यो: अने ह़ु देखु के तीहयो पासलो चारो उगवा ना सुरु मे टीड्या पयदा कर्यो; अने तीहयो राजा नी वाडणी नो बाद नो पासलो चारो हतो। जत्यार तीहया चारो खाय लेदा, तत्यार में केदो, “ए भगवान यहोवा, माफ कर! नीता याकुब कीसम टेकलो री सकहे? तीहयो केतरो कमजोर से।”
आना बारा मे यहोवा पसतायो, अने केदो, “आसवी वात हाव नी हये।”
आक्ठु
भगवान यहोवा मने आहयु देखाड़्यो: अने ह़ु देखु के भगवान यहोवा आक्ठु नी लारे मुकदमो लड़वा करीन आड़्यो, अने तीहयु आक्ठु सी मोट्ली दर्या ह़ुक जी, अने देस बी रोखड़ो हयवा बाज ज्यु। तत्यार में केदो, “ए भगवान यहोवा, उबो री जा। नीता याकुब कीसम टेकलो री सकहे? तीहयो केवो कमजोर से।”
आना ना बारा मे बी यहोवा पसतायो; अने भगवान यहोवा केदो, “आसवी वात अळी नी हये।”
सावळ
तीहयो मने आहयु बी देखाड़्यो: में देख्यो के मालीक सावळ लगाड़ीन बणावलु कानु भीतड़ु पोर उबो हय र्यो, अने तीना हात मे सावळ से। यहोवा मने केदो, “ए आमोस, तने ह़ु देखाव पड़े?” में केदो, “एक सावळ,” ता मालीक केदो, “में मारा माणहु ईस्रायल ना वच मे सावळ लगाड़ही। हाव में तीमने डंड आप्या वगर नी छोड़ु। ईसाक ना उचला जागा उजाड़ हय जहे, अने ईस्रायल ना चोखला जागा ह़ुनह़ान हय जहे, अळी में यारोबाम ना घोराणा पोर तलवार लीन हमलो करही।”
आमोस अने अमस्याह
तत्यार बेतेल नो पुंजारो अमस्याह ईस्रायल ना राजा यारोबाम ने तां खबर मोकल्यो, “आमोस ईस्रायल ना घोराणा ना वच मे तमारी सी लड़ाय करवा नी लेदे योजना बणाय र्यो। तीना आखा बोलु ने देस नी वेठ सकतु। काहाके आमोस आसम केदो, ‘यारोबाम ने तलवार सी मार नाखहे, अने ईस्रायल ना माणहु ने बंदी बणावीन तीमना देस गेथा बारा ली जहे।’”
तत्यार अमस्याह आमोस ने केदो, “ए दरसन देखण्या, आञे गेथो नीकळीन यहुदा देस मे नाह जा, अने तांत रेजे अने तांत रोट्ला खाजे, अने तांत भगवान वगे गेथी वात कीया कर; पण बेतेल मे अळी कारु बी भगवान वगे गेथी वात नी करजे, काहाके आहयो राजा नो चोखलो जागो अने ईस्रायल नो मंदीर से।”
आमोस जपाप आपतो जीन अमस्याह ने केदो, “में नी ते भगवान वगे गेथी वात केण्यो हतो, अने नी भगवान वगे गेथी वात केण्या नो सोरो हतो; में ते ढुरु चारवा वाळो गुवाळ्यो हतो, अने में गुलर ना फोळु भेळा करीन वेचतो हतो। अने यहोवा मने गाडरा-बोकड़ाम नी पछळ-पछळ फीरवा सी बोलावीन केदो, ‘जा मारा ईस्रायल ना माणहु ने भगवान वगे गेथी वात के।’ आनीन करते हाव तु यहोवा ना बोल ह़मळ, तु केय, ईस्रायल ना वीरोद मे भगवान वगे गेथी वात ना करे; अने ईस्रायल ना घोराणा ना वीरोद मे वळ-वळीन बोल ना ह़मळावे। आहया कारण सी यहोवा आसम केय: ‘तारी बयर ह़ेर मे रंडी बण जहे, अने तारा सोरा-सोरी ने तलवार वेर मार नाखहे तारी जागा दोरी वेर मापीन वाट लेहे; अने तु वीटळ्ळा देस मे मरही, अने ईस्रायल आह़फा नी जागा मे गेथु पक्कु गुलामी मे जहे।’”
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.