Paliya Bible
मीका 1
यहोवा नो बोल, जे यहुदा देस ना राजा योताम, आहाज अने हीजकीयाह ना राज करवा ना दाड़ा मे मोरेसेत मे रेवा वाळा मीकान्तां पुग्यो, जीने तीहयो सामर्या ह़ेर अने यरुसलेम ना बारा मे देख्यो।1
सामर्या अने यरुसलेम नी लेदे दुख
ए राज्य-राज्य ना आखा माणहु ह़मळो, ए धरती अने धरती पोर रेवा वाळा आखा ध्यान देवो, मालीक यहोवा तमारा वीरोद मे अने मालीक आह़फा ना चोखला मंदीर मे गेथो तमारी गवाय देहे। देख, यहोवा आह़फा ना चोखला जागा मे गेथो बारो नीकळवा बाज र्यो, अने तीहयो उतरीन धरती ना उचा जागा पोर चालहे। ता बड़ा तीनी तळे गळ जहे, जीसम मोमबत्ती आक्ठु सी पीगळ जाय, अने घाट्या मे आसम वयहे जीसम पाणी घाट्या मे गेथु हेटु वये। आहयु आखु याकुब ना गुना अने ईस्रायल ना घोराणा ना पाप ना कारण हये। याकुब नो गुनो ह़ु से? ह़ु सामर्या नी हय? अने यहुदा ना उचा जागा ह़ु से? ह़ु यरुसलेम नी हय? मालीक केदो, “आहया कारण सी में सामर्या मे रेवा वाळा ने मयदान मेना ढेर बणाय देही, अने अंगुर नी वाड़ी लगाड़ही; अने में तीमना दगड़ा ने खोबारा मे गबड़ाय देही, अने तीमनी नीव उखड़ी देही। तीनी आखी बणावली मुरती ने टुकड़ा-टुकड़ा कर देहे; अने जे कंय तीहयो छीनाळु करीन कमायलो से तीने आक्ठु सी धपाड़ीन खत्तम कर देही, अने तीनी आखी मुरती ने चुरा-चुरा कर देही, काहाके छीनाळा नी कमाय सी तीहयो तीने एक्ठु करलो से अने तीहयी अळी छीनाळु नी कमाय ने तेवी हय जहे। ता मीका केदो, में आहया कारण सी दुखी हयही अने कलपही। में मारो दुख उजन्तो करवा करीन चाट्या वगर अने उगाड़लो फीरही। अने में कोल्यान तेम आड़ही अने सुतरमुर्गान तेम रड़ही। सामर्या ना घावु वारु नी हवे अने यहुदा बी तीहयीत रीते दुख झेलहे; गरा यरुसलेम ना झापले लग पुग जेली से, जां मारा माणहु रेय।”
दुस्मन नु यरुसलेम भणी बड़नु
गत ह़ेर मे अमारा दुस्मन ने अमारी हार नी खबर नी करजो; अने ना रड़ो; बेतआपरा ना कादा मे ढबळो। ए सापीर नी रेवा वाळी उगाड़ली हय्न वण-लाज्याण हय्न जत रे; सानान नी रेवा वाळी नी नीकळ सक्ती; बेतेसेल ना रड़वा-कलपवा ना कारण सी तीनो आसरा नो जागो तमारी पांह गेथो ली लेदलो से। काहाके मारोत नी रेवा वाळी वारलु नी वाट जोवती-जोवती घबराय जेली से, काहाके यहोवा भगवान भणी गेथी गरा यरुसलेम ना फाटे तक पुग जेली से। ए लाकीस नी रेवा वाळी आह़फा ना घोड़ागाड्या मे उतवाळ्या चालवा वाळा घोड़ा जोप; तारीन तांत गेथा सीय्योन ना माणहु नो पाप सुरु हयो, काहाके ईस्रायल ना गुना तारीत मे जड़्या। आहया कारण सी तु गत ह़ेर ना मोरेसेत ने दान आपीन सेटु कर देहे; अकजीब2 ना घोर सी ईस्रायल ना राजा धोकोत खाहे। ए मारेसा नी रेवा वाळी मे अळी तारी पोर एक अदीकारी ठेरावही, अने ईस्रायल ना नामह़ाद्या माणहु ने अदुल्लाम नी गुफा मे आव्वा पड़हे। आह़फाम ना मोंगाळ्ळा सोरा जुगु दुख मे आह़फाम ना मुंडे ना नीम्बाळा बोड़ावो अने घुवड़ ने तेम भुमळा कर लेवो काहाके तमारा सोरा तमारीन्तां गेथा धराय्न गुलामी मे जत रेला से।
Source notes (2)
- Cross-reference 2 राजा 15:32–16:20; 18:1–20:21; 2 ईतीहास 27:1-7; 28:1–32:33
- Footnote अकजीब धोको
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.