Paliya Bible
मीका 2
गरीब ने वेला पाड़वा वाळाम नो वाक काडणु
गरा आय पड़े तीमनी पोर, जे खाट्लु पोर पड़ीन बुराय नो वीच्यार करे अने गलत काम नी ईच्छा करे, अने ताखत वाळो हयवा ना कारण सी ह़वारे वेगोत दाहड़ु उगतेत तीहया तीने पुरा करे। तीहया बीजा ना खेतरु नी लालच करीन तीमने हापकी लेय, अने बीजा ना घोरु नी लालच करीन तीमने बी हापकी लेय; अने तीनु घोराणु भेळ अदमी पोर, अने तीना खुद ना वाटा भेळ बीजा माणहु ने दुख देय अने वेला पाड़े। आनी लेदे यहोवा केय, में आहया घोराणा पोर गरा लाव्वा नी योजना बणाय र्यो, अने तमु तीहयी योजना सी बच नी सको। तीहयी टेम काठी रेहे, अने मुंडु उचु करीन चाली नी सको। तीहयी टेमे आहयु घणु दुख नु गीत दाखला नी रीती पोर गावहे: “आमु ते खत्तम हय ज्या; तीहयो मारा माणहु ना वाटा ने बगाड़े; गरा आय पड़े, तीहयो तीने मारी सी केतरो नाम्बे कर देय! तीहयो अमारा खेतरु ने धोको करवा वाळा ने आप देय।” यहोवा नी मंडळी मे चीट्ठी नाखीन अने दोड़ु वेर मापीन जागान वाटवा वाळो कोय नी रेय; अने तमने जागा नो थोड़ोक वाटो बी नी जड़े। तीमना भगवान वगे गेथी वात केवा वाळा माणहु केय के आहयी वात ना बारा मे भगवान वगे गेथी वात ना केवो, काहाके आमने नामबद्दी वेठवा नी पड़े। ए याकुब नु घोराणु, ह़ु आहयु केवा जोवे के यहोवा नी आत्मा धीरज नी धरवा वाळी हय जेली से? ह़ु आहया काम तीनीत जुगु हयला से? ह़ु मारा बोलु सी तीनु भलु नी हये जे ह़ुदाय सी चाले? पण काले नी वात से के मारा माणहु वेरी बणीन मारा वीरोद मे आवला से; तमु भोळा-भाळा वाट्ये चालवा वाळान डील पोर गेथु चादरु हापकी लेवो जे झुमायवा नो वीच्यार नी करीन बेफीकर्या जत रेय। तमु मारा असामी ना बयरा ने सुक-सान्ती रेण्या घोरु गेथा नीकाळ देदला से, अने तीमना सोरा पांह खास चीज ने सदा ना लेदे हापकी लेवो। उठो, जत रेवो! काहाके आहयो तमारो अराम करवा नो जागो नी हय; आनु कारण तीहयु वीटळ्ळु से जे काठला दुख नी ह़ाते तमने खत्तम करहे। कदीम कोय झुटी आत्मा मे चालतो जीन झुटी अने फालतु वात केय अने केय के में तमने हमेसा अंगुर नु ह़रु अने ह़रु नी लेदे परच्यार ह़मळावतो रेही, ता तीहयोत आहया माणहु नो भगवान भणी गेथी वात केवा वाळो ठेरहे। ए याकुब, मे पक्को तमु आखाम ने भेळो करही; में ईस्रायल ना बचलाम ने पक्को एक्ठा करही; अळी बोस्रा ना गाडरा-बोकड़ाम ने तेम भेळा राखही। तीहया टोळान तेम जे वारला चारा मे रेय, तीहया ढेरेत माणहुम नी करते दंगो करहे। तीमनी अगळ-अगळ वाड़ा नो तोड़वा वाळो जेलो से, करीन तीहया बी तीने तोड़ र्या, अने झापले माय्न नीकळ र्या; तीमनो राजा तीमनी अगळ-अगळ ज्यो मतलब यहोवा खुद तीमनो अगवाय करन्यो से।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.