Paliya Bible
मीका 3
मीका ईस्रायल ना अगवाय करन्या नो वाक काडे
में केदो, “ए याकुब ना मुख्या, ए ईस्रायल ना घोराणा ना नीयाव करन्या, ह़मळो! ह़ु नीयाव नी ह़तायली वात जाणवा तमारु काम नी हय? तमु ते भलाय सी ह़ीगी करो अने बुराय सी मोंग करो, तमु मारा जीवत्ला माणहु नी खाल उतारो, अने तीमना हाटका पोर नु माह ने नीखवी लेवो। एतरुत नी पण तमु मारा माणहु नु माह खाय जावो, अने तीमनी खाल उतार लेवो, अने तीमना हाटका भांग नाखो, अने तीमने हांडलु मेनु माह ने तेम झीनु-झीनु कर देवो। तीहयी टेम बी आवहे, के तीहया यहोवा भगवान ने आड़हे, पण तीहयो तीमनु आड़नु ह़मळे नी, पण तीहयी टेमे तीहयो तीमना बुरा कामु ना कारण तीमनी सी आडु भाळ लेहे। यहोवा भगवान नो आहयो बोल से के जे भगवान वगे गेथी वात केवा वाळो माणेह मारा असामी ने भटकाड़ देय, अने जत्यार तक तीमने खावा नु जड़्या करे तत्यार तक तीहया सांती” से केय, अने जत्यार तीमने खावा नु नी जड़े ता तीहया तीमने झगड़ा नी धमकी देय। आना कारण सी तमारी पोर एवी रात आवहे, ता तमने दरसन नी देखाय, अने अंदारला मे तमु अगी हयवा वाळी वात नी देखाड़ सको, भगवान वगे गेथी वात केण्या नु दाहड़ु बुड जहे, तमारा दाड़ा अंदारलु मे बदल जहे। दरसन देखवा वाळा, अने जे अगी हयवा वाळी वात देखाड़न्या तीहया आखा लाजे पड़हे, अने तीहया आखान आखा आह़फाम नु मोडु आनीन करते ढाकहे के भगवान तीमने जपाप नी आपे। पण मने यहोवा भगवान आह़फा नी आत्मा अने सक्ती सी भर देय अने मारी मे नीयाव अने ताखत से अने ईस्रायल ना माणहु ने तीमना पापु ना बारा मे देखाड़वा नी हीम्मत आपे। ए याकुब ना घोराणा ना मुख्या, ए ईस्रायल ना मुख्या, तमु जे नीयाव सी रीह राखो, तमु सच्चाय ने गलत मे बदल देवो, अमारी ह़मळो। तमु सीय्योन ने हत्या सी अने यरुसलेम ने ह़ीगी आवे एवा कामु सी मजबुत करो। ह़ेर ना मुख्या पय्हा लीन राज कर र्या, अने पुंजारा बी पय्हा लीन नेम-कायदा देखाड़ र्या; अने भगवान वगे गेथी वात केवा वाळा पय्हा लीन अगी हयवा वाळी वात केय; ते बी तीहया आहयु कीन यहोवा भगवान पोर भरहो राखे, “यहोवा भगवान अमारी वचमे से” आनी लेदे कोय गरा “अमारी पोर नी आवे।” अने आहयी रीते तारा कारण सी सीय्योन ने खेतर ने तेम जोपहे, यरुसलेम ओदरला ढेरु बण जहे, अने मंदीर ना बड़ा जंगल बण जहे।1
Source notes (1)
- Cross-reference यीरम्या 26:18
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.