Paliya Bible
मीका 4
सांती नु राज्य
(यसाया 2:2-4)
आखरी दाड़ा मे आसम हयहे के यहोवा भगवान ना घोर नो बड़ो आखा बड़ा सी मजबुत हयहे, अने आखा बड़्या गेथो उचो करहे; अने हरेक राज्य ना माणहु नंदीन तेम तीनी भणी आवहे। अने तीहया माणहु आवीन केहे, आवो, आपणु यहोवा भगवान ना बड़ा पोर चड़ीन ईस्रायल ना भगवान ना मंदीर मे जीया। तीहयो आपणु ने तीहयुत ह़ीकाड़हे जे आपणु ने कराव्वा चाही र्यो; आपणु तीना देखाड़ला रोहा पोर चालहु। काहाके यहोवा भगवान नी ह़ीकापण यरुसलेम गेथी आवे तीहयो सीय्योन गेथो आपणा माणहु सी वात करे। तीहयो घणा देसु ना माणहु नो नीयाव करहे, अने नाम्बे-नाम्बे तक ना ताखत वाळा राज्य ना झगड़ा ने खत्तम कर देहे; आनी लेदे तीहया आह़फाम नी तलवार ने ठोकीन होळ ना कोहला बणावहे अने आह़फाम ना भाला ने दातळा बणावहे, ता एक राज्य बीजा राज्य पोर हामलो अळतेण कदी नी करे। अने अळतेण हमला नी तीयारी कदी नी करे।1 तीहया आखा आपणी-आपणी अंगुर नी वाड़ी मे अंजीर ना झाड़ तळे सांती सी बठहे, अळी कोय तीमने नी बीहाड़े; ताखत वाळो यहोवा भगवान आहयो वायदो करलो से।2 आखा राज्य ना माणहु ते आपणा-आपणा देवता नु नाम लीन चाले, पण आपणु आपणा भगवान यहोवा नु नाम लीन सदा चालता रेहु।
गुलामी मे गेथु ईस्रायल नु छुटणु
यहोवा भगवान आहयु केय, “तीहयी टेम आय री,” में असामी ना लंगड़ा ने अने जबराण नीकाळ्ळा ने अने जीमने में दुख देदलो से तीहया आखा ने एक्ठा करही; अने लंगड़ा ने में बचाड़ीन राखही, अने सेटा करला ने एक सक्ती वाळु राज्य बणावही; अने यहोवा भगवान तीमनी पोर सीय्योन बड़ा पोर गेथो सदा राज करतो रेहे। ए एदेर ना गुम्मट, ए सीय्योन ना बड़ा, तने पेलेन तेवु राज जड़हे। अने तने यरुसलेम नु राज्य जड़े। तु एतरा ज्योरे काहा आड़े, तु सोरु पयदा करवा वाळी बयर ने तेम दुख झेल र्यु, आनो कारण आहयो से के तारी पांह राजो नी हय, तने ह़ला आपण्या मर ज्या? ए यरुसलेम ना माणहु, तमु भारेपोगे बयर ने तेम दुख झेल अने कंजार काहाके हाव तमने ह़ेर छोड़ीन चोवगान रेवा पड़हे, तमने बेबीलोन देस मे जवा पड़हे, पण तां तमने यहोवा भगवान तमारा वेरी-दुस्मन सी बचाड़हे। घणा राज्य तमारी पोर हामलो करवा करीन एक्ठा हय र्या, तीहया की र्या के “सीय्योन ने खत्तम कर देवो, आपणु आहया ह़ेर ने उजाड़ देखहु।” पण आहया नी जाणता, के यहोवा भगवान ना मन मे ह़ु से? तीहया आहयी वात नी ह़मजता के तीमने तीनीन तेम डंड आपवा ना लेदे एक्ठा करलो से जीसम खळा मे अन ने महळवा ना लेदे एक्ठु करे। यहोवा भगवान केय, “यरुसलेम ना माणहु, जावो अने आपणा वेरी ने डंड आपो, में तमने लुहड़ा ना ह़ींगड़ा अने पीतळ ना खुर्या वाळा बोळ्द्यान तेम सक्ती वाळा बणावही, तु घणा राज्य ने रोंदळी देही, अने जे धन तीहया लुटला से तीने तमु यहोवा भगवान ने ह़ोप देहु।”
Source notes (2)
- Cross-reference योएल 3:10
- Cross-reference जकर्याह 3:10
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.