Paliya Bible
मीका 5
यरुसलेम ना माणहु, तमारी फोज एक्ठी करो! आपणु ने तीहया घेरवी लेदला से तीहया ईस्रायल ना नीयाव करन्या ना गाल्ये ह़ोटो देहे।
बेतलहम गेथो एक राजा आव्वा नो वायदो
यहोवा भगवान केय, “ए एप्राता नु बेतलहम, तु यहुदा ना आखा ह़ेर गेथु नान्लु से, पण ते बी तारी मे गेथो ईस्रायल ना लेदे एक मुख्यो अदीकारी बणावही, तीहयो ईस्रायल पोर राज करहे तीनु नीकळनु सुरु गेथुत हयतु आय र्यु।”1 आनी लेदे यहोवा भगवान आह़फा ना असामी ने जत्यार तक भारेपोगे बयर सोरा ने पयदा नी करे, तत्यार तक वेरी-दुस्मन ना हात मे छोड़ देहे; ता ईस्रायल ना बचला माणहु आपणा भाय-बेन्या ह़ाते पासा भेसकाय जहे। जत्यार तीहयो आवहे, ता मालीक नी आपली सक्ती सी अने यहोवा भगवान ना मोट्ला नाम सी आपणा माणहु पोर राज करहे। तीहया सुक सी रेहे काहाके हाव तीहयो धरती नी छेव तक मोटो ठेरहे।
छुटकारो अने डंड
तीहयो सांती नो थुड़ रेहे। जत्यार अस्सुरी सेना अमारा देस पोर हामलो करे, अने अमारा राजवाड़ा मे पोग मेके, ता आमु तीमना वीरोद मे ह़ात गुवाळ्या अने आंठ मुख्या माणहु उबा करहु; तीहया हत्यार नी ताखत सी नीम्रोद ना देस अस्सुर ने जीक लेहे अने जत्यार अस्सुरी माणहु अमारा देस पोर हामलो करहे, ता तीहया आमने तीमनी सी बचाड़हे।2 ईस्रायल ना जे माणहु बचला रेहे तीहया मालीक ना लारे घणा राज्य ना लेदे ताबलु पड़लु झाकळुन तेम रेहे अने चारा पोर जीठवड़ी ना पाणीन तेम रेहु, तीहया माणहु पोर नी पण भगवान ना भरहे रेहे। याकुब ना बचला माणहु राज्य मे अने देस-देस ना माणहु नी वच मे आसम रेहे जेम जंगल ना जानवरु मे नाहर, नीता गाडरा-बोकड़ा ना टोळा मे जुवान नाहर रेय, काहाके जत्यार तीहयो तीमनी वच मे माय्न जाय, ता रंदळतो अने फाड़तो जहे, अने कोय बचाड़ नी सके। तारो हात तारा वेरी पोर पड़े अने तीहया आखा ने खत्तम कर देहे। यहोवा भगवान केय, तीहयी टेमे में तमारा घोड़ा ने हापकी लेही अने तमारी घोड़ागाडी ने खत्तम कर देही। में तारा देस ना ह़ेरु ने खत्तम करही, अने तारा कीला ने ओदारी देही। में तारा जादु-टोना ने खत्तम कर देही, अने तारी मे जादु-टोना ने अळी अगो चालीन नी रेय। में तमारा मुरत्या अने तमारी वचे गेथा तमारा पुंजवा ना दगड़ा ने सेटा कर देही। अने तमु अळी कदी तमारा हात वेर बणावली चीज नी भक्ती नी कर सको। में तारी असेरा नाम नी मुरती ने उखड़ी देही, अने तारा ह़ेरु ने खत्तम करही। अने जे राज्य मारो हुकम नी मान्ता, तीमनी सी मे घणी-जादा रीह मे बदलो लेही।
Source notes (2)
- Cross-reference मत्ती 2:6; युहन्ना 7:42
- Cross-reference उबजणाय कीताप 10:8-11
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.