Paliya Bible
मीका 6
ईस्रायल ना वीरोद मे भगवान ना वात-वीच्यार
जे वात यहोवा भगवान केय, तीने ह़मळो! उठो, बड़ाम नी ह़ाते जखड़ी पड़, अने बड़्या बी तारी वात ह़मळवा जोवे। ए बड़ा, अने धरती नी सदा नी नीव, यहोवा भगवान नो वात ह़मळो, काहाके यहोवा भगवान आह़फा ना माणहु पोर गुनो लगाड़ र्यो अने तीहयो ईस्रायल नी ह़ाते वात मे जखड़ी पड़ र्यो। यहोवा भगवान केय, “ए मारा माणहु, मने देखाड़ो, के कानी वात मे, में तमने दुख देदलो से? में तमारु ह़ु बगाड़लो से? में तमने मीस्र देस गेथो नीकाळ लायो, में तमने गुलामी गेथो बचाड़्यो, में तमारी अगवाय करवा ना लेदे मुसा ने, हारुन ने, अने मरीयम ने मोकल्यो।1 ए मारा माणहु, फोम करो के मोवाब नो राजो बालाक तमारी ह़ाते ह़ु करवा नी योजना बणावलो हतो, अने बोर नो सोरो बीलाम तीने ह़ु ह़ला आपलो हतो, बेबीलोन ना सीत्तीम ह़ेर गेथु गीलगाल ह़ेर तक वाट्ये जे कंय हयु तीने फोम करो। जीनी सी तमु यहोवा भगवान ना वारला कामु ने ह़मज सको।”2
भगवान ह़ु चाहे
में हात मे कानी भेट लीन भगवान यहोवा अगळ आवु। अने ह़रग मे रेवा वाळा भगवान ने वांदु? ह़ु में बादा चड़ाव्वा ना लेदे एक साल नु वाछड़ु लीन तीनी अगळ आवु? ह़ु यहोवा भगवान हजारु गाडरा चड़ाव्वा सी नीता जेतुन ना तेल नी लाखु नंद्या नी भेट सी खुस हयहे? ह़ु में आपणा पाप ना पछतावा ना लेदे पेल-खोळ्या सोरा ने बादा चड़ावु। कदी नी, मालीक आमने देखाड़लो से के ह़ु वारु से तीहयो अमारी सी आहयु चाहे के जे करवा जोवे तीहयुत करे, सदा मोंग देखाड़ो, अने आपणा भगवान ह़ाते भोळा रीन चालो। यहोवा भगवान यरुसलेम ह़ेर ने आड़ी र्यो, अक्कल वाळो माणेह यहोवा भगवान ना नाम नी बीक माने, करीन डंड नी वात पोर धीयान देय, जीनी पांह डंड आपवा नो हक से। वेरी माणेह ना घोर मे तीहयु धन रेय जीने तीहया बेमानी करीन हात करला से तीहया झुटा माप-तोल नो वापर करला से आहयी एवी वात से जीनी सी मे ह़ीगी करु। में तीहया माणहु ने कीसम माप कर सकु जे झुटी ताकड़ी अने बाट नो वापर करता हय। तारा पामत्ला माणहु लुट-पाट करे, अने तारा रेवा वाळा झुट मेके अने तीमनी जीप धोको देवा नी वात करे। आनी लेदे में तमने ठोकी-ठोकीन घणो घायल कर देही, अने तमारा पापु ना कारण सी तमने उजाड़ देही। तमु खाहु पण आफरो नी, भुकलात रेहु, तमु आपणु माल-धन चुट लीजहु पण तीने बचाड़ी नी सको; तमु जे कंय बचाड़हु, तीने में तलवार चलाड़न्या ने लुटाड़ देही। तमु वेरहु पण फसल नी वाडो, तमु जेतुन नु तेल ते काडहु पण लगाड़ी नी सको, तमु अंगुर नु ह़रु बणावहु पण कदी पी नी सको। आसम आनी लेदे हयहे के तमु राजा ओमरी अने अहाब ना कामु पोर चालो; अने तमु तीमनी रीती पोर चालो, आनी लेदे में तमने उजाड़ देही, आहया ह़ेर ना रेवा वाळा माणहु तमारा हाही-ठट्टा करहे, अने तमारी मारा माणहु बुराय करहे।3
Source notes (3)
- Cross-reference नीरगमन 4:10-16; 12:50,51; 15:20
- Cross-reference गीनती 22:2–24:25; यहोसु 3:1–4:19
- Cross-reference 1 राजा 16:23-34; 21:25,26
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.