Paliya Bible
मीका 7
ईस्रायल नी नीती नु खत्तम हयणु
गरा मार पोर! काहाके में तीहया माणेह ने तेवो हय ज्यो जे उनाळा ना फोळ तोड़ लेय अने उजड़ जाय, ता जाय, नीता अंगुर ने तोड़ लेय अने उजड़ जाय ता जाय, मने ते पाकला अंजीरु नी हेर हती, पण खावा ना लेदे कोय बी गुच्छो नी र्यो। धरती पोर कोय ईमानदार माणेह नी बच्यु, भगत माणहु खत्तम हय ज्या; तीहया आखान आखा हत्या करवा नो मोखो ह़ोद र्या, हर कोय आपणा भाय ना लेदे जाळ नाख र्या। तीहया आखा बुराय करवा मे माहीर से, अदीकारी अने नीयाव करन्या पय्हा मांगत्ला अने मोटा माणहु तीमने देखाड़े के अदीकारी ने ह़ु जोवे? आनी लेदे तीहया मेळीन योजना बणावे। तीमनी मे गेथा आखा गेथा वारु अने आखा गेथा ईमानदार माणहु बी काटा नी वाड़ गेथा बी फालतु से। तीहयो दाड़ो आय जेलो से जत्यार भगवान माणहु ने डंड आपहे, भगवान वगे गेथा केण्या माणहु ना लारे चेतावणी आपली हती। आपणा ह़ाते वाळा पोर बी भरहो ना करो, आपणा दोस्त पोर बी भरहो ना करो; आञे तक के आपणी लाडी सी बी कंय केवा मे ह़मळीन रेवो। काहाके सोरा बाह नी बेईज्जती करे, अने सोर्या आह्य नो वीरोद करे, अने ववेह ह़ाहु सी झुमाय; तमारा दुस्मन तमारा घोरनात माणहु से।1 पण में यहोवा भगवान भणी देखतो रेही, में मने छुटकारो आपण्या भगवान नी वाट जोवतो रेही; मारो भगवान मारी अवाज ह़मळहे।
छुटकारो भगवान सीत जड़े
ए मारा वेरी मने उजड़वा सी खुस ना हये; काहाके मारो उजाड़ हयो ता पासु बणावहे बी; हमणे में अंदारला मे से, पण मालीक मने वीजाळु आपहे। में मालीक ना वीरोद मे पाप करलो से, करीन में तीनी रीह ने तीहयी टेम तक वेठतो रेही, पण आखरी मे तीहयो अमारी रखवाळी करहे अने अमारी सी जे गलती हयली से तीने ह़ुदारहे। तीहयो आमने वीजाळा मे लावहे आमु तीने आमने बचाड़त्लो देखवा जीवत्ला रेहु। ता अमारा दुस्मन आहयु देखहे अने लाजे पड़हे, तीहयात दुस्मन जे आहयु पुसीन ठटाय करता हता के तमारो भगवान यहोवा कां से? आमु तीमने हारत्ला अने वाट्ये ना कीचड़ ने तेम रंदळत्ला देखहु। ए यरुसलेम ना माणहु, ह़ेर ना भीतड़ा ने पासा बांदवा नो दाड़ो आवहे। तीहया दाड़े तारी काकड़ बड़ावहे। तीहया दाड़े तारा असामी हरेक जागे गेथा उगवणा सी, अस्सुर देस गेथा, दखणाव सी, मीस्र देस गेथा, फरात नंदी भणी गेथा, अने दर्या भणी गेथा, अने बड़ा भणी गेथा पासा आवती रेहे। ते बी धरती पोर रेवा वाळाम ना कारण सी अने तीमना बुरा कामु ना फोळ ना कारण उजाड़ेत रेहे।
ईस्रायल पोर भगवान नी दया
तारा माणहु नी रखवाळी, अने तारा खुद ना वाटा मे जड़ला टोळा नी रखवाळी आह़फा नी लाकड़ी वेर करजे, जे उजाड़ जागा मे से अने वारला चारो उगाड़न्या चरवासा नी वच मे एखला रेय, तीमने पेलेन तेम बासान अने गीलाद ना ईलाका मे चरवा दे। ए मालीक, अमारी लेदे मोटा काम कर, जीसम तु तीहया दाड़ा मे करलो हतो जत्यार तु आमने मीस्र देस गेथो नीकाळ लावलो हतो। बीजा राज्य ना माणहु आहयु देखहे अने आह़फाम नी आखी सक्ती हयवा सी बी आह वगर ना हय जहे, तीहया आह वगर ना हय्न आह़फा नु मोडु बंद कर लेहे, आपणा कान्टा बंद कर लेहे। तीहया गड़हान तेम धुळो चाटहे, तीहया आह़फा ना दोरु मे गेथा कापता अने बीहता जाय्न नीकळहे तीहया अमारा भगवान यहोवा नी बीक मानहे। ए यहोवा भगवान, तारीन तेवो बीजो कोय देवता नी हय; तु तारा माणहु ना पाप माफ करे, अने आह़फा ना बचला माणहु ना पाप ढाक देय, तु सदा खीजवायलो नी रेय, पण आमने तारो लगातार मोंग देखाड़वा मे मजा लेय। तु एक कावा अळी अमारी पोर दया करही, तु अमारा पापु ने पोगु तळे रंदळी देही अने तीमने दर्या नी बुंदे नाख देही। तु याकुब ना बारा मे तीहयी सच्चाय, अने अब्राहम ना बारा मे तीहयी दया पुरी करही, जीसम के तु घणो पेले अमारा आड़ा-बुड़ा सी वायदो करलो हतो।
Source notes (1)
- Cross-reference मत्ती 10:35,36; लुका 12:55
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.