Paliya Bible
युहन्ना 9
ईसु आंदळु जणायलु माणेह ने वारु करे
ईसु जवा बाज रेलो ता एक माणेह ने देख्यो, जे आंदळुत जणायलु हतु। अने ईसु ना चेला तीने पुछ्या, “ए मालीक! कोय पाप कर्यु हहे, के आहयु आंदळु पयदा हयु, आहयो माणेह, के आना आह्य-बाहा पाप कर्या हहे?”
ईसु तीमने जपाप आप्यो, के नी ते आहयो पाप कर्यो, अने नी ते आना आह्य-बाहा पाप कर्या, पण आहयु आनीन करते हयु, के आनी जीवाय मे भगवान ना काम देखाव पड़े। जे मने मोकल्लो से; तीना काम आमने दीहु-दीहु पुरा कर लेवा आपणी जुगु जरुड़ी से: तीहयी रात आव्वा वाळी से तीनी मे कोय काम नी कर सके। 1जत्यार लग मे कळी मे से, तत्यार लग मे कळी ना माणहु जुगु वीजाळु से।
आहयु कीदीन ईसु भोयमे थुप्यो, अने थुपे करीन धुळो कोहणीन आंदळा ना डोळे चोपड़ी देदो। अने तीने केदो; “जा सीलोम नाम ना हळावा मे धोय ले।” सीलोम नाम नु मतलब से मोकल्लो, एतरे तीहयो जाय्न डोळा धोय लेदो, अने देखवा बाज ज्यो, अने पासो आवती र्यो।
ता आनी आड़े-धेड़े वाळा अने जे आने पेले भीक मांगत्ले देखला हता, तीहया देखीन केदा, आहयु तीहयुत आंदळु नी हय ह़ु? जे पेले बहीन भीक मांग्या करतु हतु?
थोड़ाक माणहु केदा, आहयो तीहयोत से, अने थोड़ाक केदा, आहयो तीहयो नी हय, पण तीनीन तेवो से, तीहयो केदो “मे तीहयोत से।”
ता तीहया तीने पुछवा बाज ज्या, तारा डोळा कीसम उगड़ी ज्या?
तीहयो जपाप आप्यो, के ईसु नाम नो एक माणेह थुपे करीन धुळो कोहणीन मारा डोळा पोर चोपड़ी देदो, अने मने केदो, “सीलोम मे जाय्न धोय ले, अने मे जाय्न धोय लेदो, अने देखवा बाज ज्यो।”
तीहया तीने पुछ्या; “तीहयो कां से?”
तीहयो केदो, “मे नी जाणतो।”
फरीस्या नी लारे आरगाय नी जाच पड़ताव
माणहु जे पेले आंदळु हतु तीने फरीसीन तां ली ज्या। जे दाड़े ईसु धुळो कोहणीन आंदळु ना डोळा उगाड़लो, तीहयो अराम नो दाड़ो हतो। अळी फरीसी बी तीने पुछ्या, तु कीसम देखवा बाज ज्यो। तीहयो तीमने केदो, तीहयो मारा डोळा पोर धुळो लगाड़्यो अने अळतेण मे धोय लेदो, अने देखवा बाज ज्यो।
आहयी वात ह़मळीन थोड़ाक फरीसी केदा; ईसु भगवान वगे गेथो आवलो माणेह नी हय, काहाके हीय्यो अराम ना दाड़ा ने नी पाळतो।
अने थोड़ाक जणा केदा, पापी माणेह जुदा-काम नी सेलाणी कीसम देखाड़ सके? एतरे तीमनी मे बेरजाव पड़ ज्यो।
तीहया आंदळा माणेह ने अळी पुछ्या, “जे माणेह तारा डोळा वारु करलो से, तु तीना बारा मे ह़ु केय?” तीहयो केदो, “तीहयो भगवान वगे गेथी वात केण्यो से।”
युहदी ने भरहो नी हयो के आहयो पेले आंदळो हतो अने हाव देखवा बाज र्यो, एतरे तीहया तीना आह्य-बाहा ने बोलाया। अने तीमने पुछ्या, “आहयो तमारो बेटो से ह़ु? आहयो जणायो तार नो आंदळो हतो ह़ु? आंदळो की र्या ता हाव कीसम देखवा बाज ज्यो?”
तीना आह्य-बाहा जपाप आप्या, “आमु जाणये के आहयो अमारो बेटो से, अने आहयो आंदळोत पयदा हयलो। पण आमु नी जाणता के हीय्यो हाव कीसम देखे; अने आहयु बी नी जाणता के आना डोळा कोय वारु कर्यो, हीनेत पुछ लेवो; हीय्यो नान्लो नी हय हीना बारा मे देखाड़ देहे।” आहयी वात तीना आह्य-बाहा आनीन करते केदला काहाके तीहया युहदी सी बीहता हता; काहाके युहदी माणहु एको कर र्या हता, के ईसु ने कोय बी मसी करीन मान लेहे, ता आपणु आपणा भक्ती ना घोर मे गेथो बारो कर देह़ु। एतरे तीना आह्य-बाहा केदला, के हीय्यो नान्लो नी हय; हीनेत पुछ लेवो।
ता तीहया तीहयु माणेह ने जे आंदळु हतु अळी बोलाय्न तीने केदा, नीस्ती भगवान नी बड़ाय कर काहाके आमु जाणये के हीय्यो माणेह पापी से।
तीहयो जपाप देदो, मे नी जाणतो के तीहयो पापी से के नी हय: पण मे आतरुत जाणु के मे आंदळो हतो अने हाव देखु।
तीहया तीने अळी पुछ्या, “तीहयो ह़ु कर्यो? अने तारा डोळा ने कीसम वारु कर्यो?”
तीहयो केदो, “मे तमने पेलेत की देदो, हाव अळी काहा ह़मळवा हींड र्या? तमु बी तीना चेला बणवा हींड र्या ह़ु?”
तत्यार तीहया तीने वडीन केदा, तु तीनो चेलो से; आमु ते मुसा ना चेला से। आमु जाणये के भगवान मुसा ह़ाते वात कर्यो; पण आहया ईसु ने आमु नी जाणता के हीय्यो कां गेथो आवलो से।
तीहयो तीमने केदो, अला! आहयी घणी जुदी वात से, के तमु नी जाणता के कां वाळो से ते बी तीहयो मारा डोळा उगाड़ देदो। आमु जाणये के भगवान पापी माणहु नी, नी ह़मळे, पण तीनीत ह़मळे जे भगवान नी भक्ती करतो हय, अने भगवान नी मरजी पोर चालतो हय। कळ घड़ायी तां गेथु आज लग, आहयु ह़मळवा मे नी आयु, के कोय आंदळो जणायला माणेह ना डोळा उगाड़ीन वारु कर्यो हय। कदी आहयो माणेह भगवान वगे गेथो नी हतो, ता आहयो कंय बी नी कर सकतो।
तीहया तीने केदा, “तु ते पाप मेत पयदा हयलो से, अने आमने ह़ीकाड़वा बाज र्यो” आसम कीन तीहया तीने बारो नीकाळ देदा।
वारु हयलु आंदळु माणेह ईसु पोर पक्को भरहो करे
ईसु ह़मळ्यो के, तीहया तीने बारो कर देदला से, अने अळतेण ईसु तीने भेट्यो ता केदा, “तु मनख्या ना सोरा पोर भरहो करे ह़ु?”
ता तीहयो केदो, “ए मालीक! तीहयो कोय से के मे तीनी पोर भरहो करु।”
ईसु तीने केदो, “तु तीने देखलो बी से, अने जे तार ह़ाते वात करवा बाज र्यो तीहयोत से।”
अने तीहयो ईसु ने केदो, “ए मालीक! मे भरहो करु।” अने तीने वांद्यो।
तत्यार ईसु केदो, “मे आहयी कळी मे माणहु नो नीयाव करवा आवलो से के, जे आंदळा से तीहया देखवा बाज जाय, अने जे देखे तीहया आंदळा हय जाय।”
फरीसी ईसु ह़ाते हता, तीहया आहयी वात ह़मळीन ईसु ने केदा, आमु बी आंदळा से ह़ु?
ईसु तीमने केदो, तमु आंदळा हता, ता तमु पापी नी गणाता, पण हमणे ते तमु की र्या के आमु देखत्ला से, एतरे तमु पापीत गणाय र्या।
Source notes (1)
- Cross-reference मत्ती 5:14; युहन्ना 8:12
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.