Paliya Bible
युहन्ना 10
गुवाळ्यो अने तीना गाडरा
मे तमने ह़ाची-ह़ाची केम, जे कोय गाडरा ना वाड़ा ना झापले माय्न नी भराय, पण कानी बीजी धेड़े सी चड़ जाय, तीहयो चोट्टो अने गुंडो से। पण जे गाडरा ना वाड़ग्या ना झापले माय्न भराय, तीहयो गाडरा नो गुवाळ्यो से। अने तीनी जुगु झापले पेहरो देण्यो झापलु उगाड़ देय। अने गाडरा तीनी बोली ह़मळी लेय, अने तीहयो तीना गाडरा ने एकीक ने नाम धरी-धरीन बोलावे, अने बारा ली जाय। अने जत्यार तीहयो आखा गाडरा ने बारा काड लेय, ता तीहयो तीमनी अगळ-अगळ चाले, अने गाडरा तीनी पसळ-पसळ आवे, काहाके गाडरा तीनी बोली ओळखी लेय। पण गाडरा अंजाण्या पसळ नी जाय, पण तीने देखीन नाह्ह़े, काहाके तीहया अंजाण्या नी बोली ने ओळखे।
ईसु तीमने आहयो दाखलो केदो, पण तीहया ह़मजी नी सक्या, के आहयी ह़ु वात से जे आमने की र्यो।
ईसु वारलो गुवाळ्यो
तत्यार ईसु तीमने अळी केदो, “मे तमने ह़ाची-ह़ाची केम, के गाडरा नु झापलु मे से।” जेतरा बी पेले आया; तीहया आखा चोट्टा अने गुंडा हता। पण गाडरा तीमनी नी ह़मळ्या। झापलु मे से, कदी कोय मारा झापले मोय जहे ता छुटकारो जड़हे अने मोय बारो आया जीया करहे अने चारो जड़हे। चोट्टो नीस्तो चोरी करवा, मारवा, अने खत्तम करवा आवे, पण मे आनीन करते आवलो से, के माणहु जीवाय हात करे, अने पुरीन-पुरी हात करे।
वारलो गुवाळ्यो मे से, वारलो गुवाळ्यो गाडरा ना लेदे आह़फा नो जीव बी आप देय। पावर्यो जे नी गुवाळ्यो हय, अने नी गाडरा नो मालीक हय, तीहयो लेंड्या ने आवत्ला देखीन गाडरा ने नाखीन नाह जाय, अने लेंड्या गाडरा ने धर लेय, अने गाडरा ने रीवण्या-तीवण्या कर देय। पावोर आनीन करते नाह जाय, काहाके तीहयो पावोर से, अने तीने गाडरा नी फीकर नी हय। 1वारलो गुवाळ्यो मे से, जीसम मारो भगवान बाह मने जाणे, अने मे मारा भगवान बाह ने जाणु। तेमेत मे मारा गाडरा ने जाणु, अने मारा गाडरा मने जाणे, अने मे मारा गाडरा जुगु मारो जीव बी आप देम। अने मारा अळी बी गाडरा से, तीहया आहया गाडरा ना वाड़ा ना नी हय; तीमने बी मे लावही, तीहया बी मारी बोली ह़मळहे अने आखा एकीत टोळो बण जहे, अने तीमनो एकीत गुवाळ्यो रेहे।
मारो बाह मने आनीन करते मोंग करे, के मे मारो जीव आप देम, अने पासो बी ली लेम। कोय बी मारा जीव ने हापकी नी सके, पण मे मारा जीव ने आप देम; मने मारा बाह पांह गेथो मारो जीव आपवा नो बी हक जड़लो से, अने पासो मांगवा नो बी हक जड़लो से, आहयो हुकम मने मारा बाह पांह गेथो जड़लो से।
आहयी वात ह़मळीन युहदी माणहु मे अळी बेरजाव पड़ ज्यो। घणा माणहु केता हता, के हीने भुतड़ा लागला से, अने हीय्यो गंडवाय र्यो। तमु हीनी काहा ह़मळो?
पण बीजा माणहु केता हता, के आहयी वात भुतड़ा लागला माणेह नी नी हय, भुतड़ो आंदळा ना डोळा ने वारु कर सके ह़ु?
युहद्या नो वण-भरहो
यरुसलेम मे मंदीर ने भगवान ना हात मे ह़ोपवा नो तीवार आयो। तीहयी टेमे टाड ना दाड़ा हता। अने ईसु मंदीर मे सुलेमान ना मांडवा मे हींडतो हतो। तत्यार युहदी ईसु ने घेरवी लेदा, अने पुछ्या, “तु आमने कत्यार लग भुले पाड़ रेही? कदी तु मसी हय ता आमने ह़ुते देखाड़ दे।”
ईसु तीमने जपाप आप्यो, मे तमने की देदो, पण तमु भरहो नी करता, जे जुदा-कामु मे मारा बाह ना नाम सी कर र्यो, तीहयात मारा गवा से। पण तमु भरहो नी करता, काहाके तमु मारा गाडरा नी हय। मारा गाडरा मारी बोली जाण लेय, अने मे हीमने जाणु, अने हीय्या मारी पसळ-पसळ चाले। अने मे तीमने अमर जीवाय आपु, अने तीहयी कदी जलमकी खुटे नी, अने कोय हीमने मारा हात मे गेथा हापकी नी सके। मारो बाह, जे हीमने मारा सुपरत करलो से, तीहयो आखा गेथो मोटो से, एतरे हीमने बाह ना हात मे गेथा हापकी नी सके। मे अने मारो बाह एक से।
युहदी ईसु ने मारवा करीन अळी दगड़ा चुट्या। ता ईसु तीमने केदो, “मे मारा बाह ना कीया मे घणा ढेरका भला काम देखाड़्यो। तीहया काना काम ना करते मने दगड़ाटीन मारवा हींड र्या?”
तत्यार युहद्या केदा, भला काम ना करते नी, पण तु भगवान नी नामबद्दी कर र्यो, अने तु माणेह हय्न बी खुद ने भगवान बणावे।
ईसु तीमने जपाप आप्यो, ह़ुं तमारी सास्तर मे आसम नी लीखलु हय, मेत केदो, तमु देवता से? कदी तीहयो तीमने देवता केदो जीनी पांह भगवान आह़फा नो बोल पुगाड़लो, अने खरला सास्तर मे लीखलु कदी नी टळ सके। ता जीने बाह चोखलो बणावीन कळ मे मोकल्लो से, तमु तीने की र्या, तु नामबद्दी कर र्यो, एतरे के मेत केदो, मे भगवान नो बेटो से। कदीम मे मारा बाह नु काम नी करतो हय, ता मारी पोर भरहो ना करो। पण कदी मे काम करतो हय, ता भले मारी पोर भरहो ना बी करो, पण तीहया कामु पोर भरहो करो, काहाके तमु जाणो, अने ह़मजो, के बाह मारी मे से, अने मे बाह मे से।
तत्यार युहदी अळी ईसु ने धरवा हींड्या पण ईसु तीमना हात सी नीकळ ज्यो।
ईसु यरदन नंदी ना ह़ेली धेड़े जाय
ईसु यरदन नंदीन ह़ेली धेड़े तीहया जागे अळी ज्यो, जां युहन्नो पेले बपतीस्मा आप्या करतो हतो, अने तांत र्यो। अने घणा ढेरका माणहु ईसुन्तां आय्न केता हता, युहन्नो ते जुदा-काम नी सेलाणी नी देखाड़्यो, पण जे कंय ईसु ना बारा मे केदलो तीहयु आखु ह़ाचलीन हयलु। अने तां घणा ढेरका माणहु ईसु पोर भरहो कर्या।
Source notes (2)
- Cross-reference मत्ती 11:27; लुका 10:22
- Cross-reference युहन्ना 1:28
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.