Paliya Bible
युहन्ना 11
लाजर नी मोत
बेतन्या गाम मे तीन भाय-बेन्या रेता हता, लाजर अने तीनी बे बेनेह मारथा अने मरीयम। 2आहयी मरीयम मालीक ईसु ना पोगु पोर ईत्तर रेड़ीन नीम्बाळा वेते तीना पोगु नुसवा वाळी हती, आनोत भाय लाजर मांदलो हतो। लाजर ना बेन्या ईसुन्तां आहयु की मोकल्या, “ए मालीक! ह़मळ, जीने तु मोंग करे तीहयो मांदलो से।”
आहयी वात ह़मळीन ईसु केदो, आहयी मंदवाड़ मारवा नी नी हय, पण भगवान नी बड़ाय ना लेदे से, तीना लारे भगवान ना बेटा नी बड़ाय हये।
ईसु लाजर ने अने तीना बेन्या मारथा अने मरीयम ने मोंग करतो हतो। जत्यार ईसु ह़मळ्यो, के लाजर मांदलो से, ता ईसु जां हतो तां बे दाड़ा अळी री ज्यो। बे दाड़ा वीत ज्यान अळतेण ईसु चेला ने केदो, “चालो आपणु अळी युहद्या मे जता।”
चेला ईसु ने केदा, “हे गुरु! पेले ते युहदी दगड़ाटीन मारवा हींडता हता, अने तु अळी तात जवा हींड र्यो?”
ईसु जपाप आप्यो, “दीह़ु ना बारे घंटा नी हवे ह़ु? कदी कोय दीह़ु चाले, ता तीहयो ठेहवाय नी, काहाके तीनी जुगु देखवा ना लेदे कळी नु वीजाळु से। पण कोय अंदारला मे चाले, तीहयो ठेहवाय जाय काहाके तीनी जुगु देखवा करीन वीजाळु नी हय।” ईसु आहयी वात केदो, अने अळतेण तीमने केदो, आपणो दोस्तीदार लाजर ह़ुय जेलो से; पण मे तीने जगाड़वा जाम।
तत्यार चेला तीने केदा, “ए मालीक! कदी तीहयो ह़ुय र्यो हहे, ता आरगो हय जहे।”
ईसु ते लाजर नी मोत ना बारा मे केदलो, पण चेला ह़मज्या के लाजर नींदर मे ह़ुव्वा बाज र्यो हहे। ता ईसु तीमने चोखुझण की देदो, लाजर मर जेलो से। ते बी मे तमारीन करते खुस से, के मे लाजर मर्यो तीहयी टेमे तां नी हतो, काहाके तमु पक्को भरहो करो। पण हाव चालो आपणु तीनीन्तां जीया।
तत्यार थोमस जे दीदुमस केवातो हतो, आह़फा ना ह़ाती चेला ने केदो, चालो आपणु बी हीनी ह़ाते मरवा जता।
ईसु लाजर ना बेन्या ने सांती आप्यो
जत्यार ईसु बेतन्या गाम मे पुग्यो ता पतो चाल्यो के लाजर ने मड़ाट्या मे डाट्ला च्यार दाड़ा हय ज्या। बेतन्या गाम यरुसलेम गेथु तीन कीलोमीटर नी आड़े-धेड़े नाम्बे हतु। अने घणा ढेरका युहदी भाय लाजर नी मोत नी खबर ह़मळीन तीना बेन्या मारथा अने मरीयम ने सांती आपवा आय र्या हता।
जत्यार मारथा ह़मळी के ईसु आव्वा बाज र्यो, ता तीहयी तीने भेटवा करीन बारथी जी, पण मरीयम घोर मेत री। मारथा ईसु ने केदी, “ए मालीक! कदी तु आञे रेतो, ता मारो भाय कदी नी मरतो। अने मे जाणु के तु हमणे बी भगवान पांह जे मांगही तीहयुत तने आप देहे।”
ईसु मारथा ने केदो, “तारो भाय जीवतो हय जहे।”
मारथा ईसु ने केदी, मने पतो से, के आखरी दाड़े मारो भाय बी जीवतो हय जहे।
ईसु तीने केदो, मरला मे गेथा जीवता करन्यो अने अमर जीवाय आपण्यो मे से, पण जे मारी पोर भरहो करे तीहयो मरी बी जहे ते बी जीवतो हय जहे। अने जे कोय जीवत्लो से, अने मारी पोर भरहो करे तीहयो जलम लग नी मरे, तु आहयी वात पोर भरहो करे ह़ु?
मारथा केदी, होव मालीक! मे भरहो करु के आहयी कळी मे आव्वा वाळो भगवान नो बेटो मसी तु से।
लाजर ने जीवाड़नु
आहयु कीदीन तीहयी जत री, अने आह़फी नी बेनेह मरीयम ने बोलाय्न होगीत तीने केदी, मालीक! आय र्यो तीहयो तने बोलाय र्यो। आहयु ह़मळीन मरीयम छोटीत उठीन ईसुन्तां आयी। ईसु हजु गाम मे नी पुगलो हतो, पण तांत हतो, जां ह़ारीक तीने मारथा भेटली। तत्यार जे युहदी तीनी ह़ाते घोर मे हता, तीने सांती आपता हता, तीहया आहयु देख्या के मरीयम उचकाली उठीन बारी चाल पड़ी, ता तीहया आसम ह़मज्या के हीय्यी मड़ाट्या मे रड़वा करीन जती हहे, करीन तीहया बी तीनी पसळ चाल पड़्या।
मरीयम ते जागे पुगी, जां ईसु हतो, अने ईसु ने देखतेत तीना पोगु पोर पड़ी अने केदी, “ए मालीक! कदी तु आञे रेतो ता मारो भाय नी मरतो।”
जत्यार ईसु मरीयम अने तीनी ह़ाते आवला युहदी ने रड़त्ला देख्यो, ता ईसु आत्मा मे घणोत नराज हय ज्यो अने घबराय्न केदो, “तीने तमु कां ह़रा वगे करला से।” तीहया ईसु ने केदा, “ए मालीक! चाल आवीन देख ले।”
अने ईसु रड़्यो। ता युहदी केवा बाज ज्या, देखो! आहयो लाजर ने घणो मोंग करतो हतो।
पण थोड़ाक माणहु केदा, “आहयो ते आंदळा ना डोळा उगाड़्यो, ता आहयो लाजर ने काहा नी बचाड़्यो?”
ईसु लाजर ने जीवतो कर्यो
आहयु ह़मळीन ईसु मन मे अळी उदास हयो, अने तीहयो मड़ाट्यान्तां ज्यो अने तीहयो एक खाडो हतो, अने एक दगड़ो तीनी पोर मेकलो हतो। ईसु केदो, “दगड़ो हेड़ देवो।” मरला लाजर नी बेनेह मारथा केदी, “ए मालीक! लाजर ने मरलो च्यार दाड़ा हय ज्या, हाव ते तीनु धोड़ गंदातु हहे।”
ईसु मारथा ने केदो, ह़ुं मे तने नी केदो के, कदी तु भरहो करही, ता तु भगवान नी बड़ाय देखही। तत्यार तीहया ते दगड़ा ने हेड़ देदा, अने ईसु ह़रग भणी भाळीन केदो, “ए बाह, मे तने घणो जुगाळो केम के तु मारी वीन्ती ह़मळी लेदो। अने मे जाणु, के तु सदा मारी वीन्ती ने ह़मळे, पण जे आड़े-धेड़े उबा हय र्या, तीना कारण मे आहयु केदो, जीनी सी के आहया भरहो करे, के तुत मने मोकल्लो से।” आहयु कीदीन ईसु आड़ीन केदो, “ए लाजर! बारो नीकळ्याव!” तीहयो मरलो लाजर जीवतो हय्न बारथो नीकळ आयो। तीना मोडे अने हाते-पोगे लुगड़ा ना पाटा बांदला हता। ईसु तीमने केदो, हीना पाटा सोड़ देवो।
ईसु ने मारवा नी जाळसादी
तत्यार जे युहदी मरीयम ने तां आय र्या हता, तीहया आहयु जुदु काम देख्या, अने तीमनी मे गेथा ढेरेत जणा ईसु पोर भरहो कर्या। पण थोड़ाक जणा जाय्न फरीसी माणहु ने ईसु ना आहया जुदा-काम ना बारा मे की देदा। एतरे डायला पुंजारा अने फरीसी भेसकाय्न पंचु बहाड़ीन केदा, आपणु ह़ु करया? हीय्यो माणेह ते जुदा-काम देखाड़े। कदी आपणु हीने आसमेत करवा देह़ु, ता आखा हीनी पोर भरहो करवा बाज जहे, अने रोमी माणहु आवीन आपणा जागा पोर अने आपणी आखी जाती पोर हक जमाड़ लेहे।
तत्यार तीमनी मे गेथो एक जणो जीनु नाम केफा हतु, अने तीहयो ते साल नो डायलो पुंजारा हतो, तीहयो तीमने केदो, तमने जरीक बी मालम नी हय ह़ु? जरीक ते वीच्यार करो; आपणा माणहु जुगु एक माणेह मरहे, ता आपणी आखी जाती बच जहे, आपणी जुगु आहयु वारलु रेहे। आहयी वात तीहयो आह़फा भणी गेथी नी केदो, पण तीहया साल नो डायलो पुंजारो हय्न अगी हयवा वाळी वात केदो, के ईसु ते आखी जाती ना लेदे मरहे। ईसु युहदी जाती जुगु एतरोत नी, पण रीवण्या-तीवण्या हयला भगवान ना माणहु ने भेळा करवा करीन मरहे।
ते दाड़े गेथा तीहया ईसु ने मार नाखवा नो पक्को वीच्यार कर्या। करीन ईसु ते दाड़े गेथो युहद्या मे उजन्तो नी फीर्यो; पण तां गेथो बड़ा धेड़े वाळा एप्रेम नाम ना ह़ेर मे जाय्न तीना चेला ह़ाते रेवा बाज ज्यो।
अने युहदी नो फसह नो तीवार ह़ाते आय र्यो हतो, एतरे फसह ना तीवार ना पेले आह़फा ने चोखा करवा करीन घणा माणहु गाम-खेड़ा मे गेथा यरुसलेम ह़ेर मे आय र्या हता। तीहया ईसु ने ह़ोदवा बाज ज्या अने मंदीर मे उबा हय्न आह़फा-आह़फा केवा बाज ज्या, तमु ह़ुं ह़मजी र्या? ह़ुं तीहयो तीवार मे नी आवे? डायला पुंजारा अने फरीसी पेलेत आहयो हुकम आप देदला हता, के “तमारी मे गेथा कोयने बी मालम पड़ जाय के ईसु कां से ता आवीन की देजो आमु हीने धराय देह़ु।”
Source notes (2)
- Cross-reference लुका 10:38,39
- Cross-reference युहन्ना 12:3
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.