Skip to content
BibleKenya

Paliya Bible

युहन्‌ना 12

बेतन्‌या मे ईसु नु चोखु हयणु

ईसु फसह ना तीवार ना छोव दाड़ा पेले, बेतन्‌या मे लाजर ना घोर ज्‌यो, जे अदमी ने तीहयो मरला मे सी जीवाड़लो हतो। तां तीहया ईसु नी पोरणा-चाकरी कर्‌या। अने लाजर बी तीमनी ह़ाते खाणु खावा नी लेदे बह र्‌यो हतो। अने मारथा तीमने खाणु खवाड़ती हती। 1 तीहयी टेमे मरीयम आदो लीटर घणु मोगु ईत्‌तर लावीन ईसु ना पोगु पोर रेड़ देदी, अने आह़फी ना नीम्‌बाळा वेते तीना पोगु नुछी, अने ईत्‌तर नी ह़वादली गंद सी आखु घोर भराय ज्‌यु। पण ईसु नो एक चेलो, यहुदा ईस्‌करीयोती, जे ईसु ने धराव्‌वा वाळो हतो, तीहयो केवा बाज ज्‌यो। आहयु ईत्‌तर वेचीन तीन ह़ो दाड़ा ना दाड़की ना पय्‌हा लीन, गरीब ने काहा नी आपी? तीने गरीब नी फीकर हती, करीन आहयी वात तीहयो नी केदो, पण तीहयो चोट्‌टो हतो। अने तीनी पांह एक कोथळी रेती हती, अने तीनी मे जे कंय घालता हता, तीने तीहयो नीकाळ लेतो हतो।

ईसु केदो, मरीयम ते मने डाटवा नी तीयारी पेले गेथीत करवा बाज री, हीने कंय ना केय। काहाके गरीब तमारी ह़ाते जलम रेहे, पण मे तमारी ह़ाते जलम नी रेम।

लाजर ने मारवा नी योजना

युहदी माणहु आहयी वात ह़मळ्‌या के ईसु बेतन्‌या मे से, एतरे तीहया ईसु ने एतरात नी पण लाजर ने बी देखवा करीन तां ज्‌या, जीने ईसु मरला मे गेथो जीवतो करलो हतो। एतरे डायला पुंजारा लाजर ने बी मारवा नो वीच्‌यार कर्‌या। काहाके लाजर ना कारण सी घणा युहदी तीमने सोड़ीन ईसु पोर भरहो करता हता।

ईसु यरुसलेम मे राजा ना वेह मे आवे

बीजा दाड़े तीवार मे आवला माणहु नो टोळो आहयु ह़मळ्‌या, के ईसु यरुसलेम मे आव्‌वा बाज र्‌यो। एतरे तीहया माणहु ताड़ ना डाळ्‌या लीन तीने भेटवा करीन बारथा ज्‌या, अने आड़वा बाज ज्‌या, “भगवान नी बड़ाय हये! जुगाळो से ईस्‌रायल नो राजा, जे भगवान ना नाम सी आवे।”

ईसु ने पाठड़ु गदड़ु जड़्‌यु अने तीहयो तीनी पोर बह ज्‌यो, जीसम के सास्‌तर मे लीखलु से,

ए सीयोन ह़ेर, बीहे ना!

तारो राजा तारीन्‌तां पाठड़ु गदड़ु

पोर बठीन आव्‌वा बाज र्‌यो।

तीना चेला ने आहयी वात पेले पल्‌ले नी पड़ी, पण जत्‌यार ईसु नी बड़ाय उजन्‌ती हयी, ता तीमने पल्‌ले पड़्‌यु के ईसु ना बारा मे सास्‌तर मे आसम लीखलु से, अने माणहु तीनी सी तेम के तेम वेहवार कर्‌या।

ता मेळा ना माणहु जे तीहयी टेमे ईसु ह़ाते हता तीहया आहयी गवाय देदा के ईसु लाजर ने मड़ाट्‌या मे गेथो बोलाय्‌न, मरला मे गेथो जीवाड़्‌यो हतो। एतरे माणहु तीने मळवा करीन आया काहाके तीहया ह़मळला हता, के ईसु आहयु जुदा-काम करलो से। ता फरीसी माणहु आह़फा-आह़फा केदा, वीच्‌यार करो, आमने कंय नी बणतु, देखो, आखी कळी ईसु पसळ चाल पड़ी!

ईसु आह़फा नी मोत ना बारा मे केय

जे माणहु तीवार नी टेमे पुजा-पाट करवा करीन यरुसलेम मे आय र्‌या हता तीनी मे गेथा थोड़ाक युनानी हता। तीहया गलील ना बेतसेदा गाम मे रेण्‌या फीलीपुस ने तां ज्‌या अने केदा, “ए मास्‌तर! आमु ईसु ने देखवा से।”

फीलीपुस जाय्‌न अंदर्‌यास ने केदो, अने बेम जणा जाय्‌न ईसु ने केदा। ईसु तीमने केदो, “टेम आय जेली से के माणेह ना बेटा नी बड़ाय हये।” मे तमने ह़ाची-ह़ाची की र्‌यो, जत्‌यार लग गम नो दाणो कादा मे पड़ीन नी मरे, तत्‌यार लग तीहयो एखलो रेय, पण तीहयो मर जाय ता तीहयो घण ढेरका दाणा पयदा करे। 2जे कोय आह़फा ना जीव ने जादा मोंग करे, तीहयो आह़फा ना जीव ने खोवहे; पण जे कोय आहयी कळी मे आह़फा नो जीव लग आपवा तीयार से, तीहयो आह़फा ना जीव ने अमर जीवाय जुगु बचाड़ लेहे। कदी कोय मारु काम करवा हींडे, ता मारी पसळ चाले, अने जां मे रेही तांत मारो काम करन्‌यो बी रेहे, कदी कोय मारु काम करहे, ता मारो बाह तीनी ईज्‌जत करहे।

ईसु आह़फा नी मोत ना बारा मे देखाड़्‌यो

हाव मारो जीव कलपी र्‌यो अने मे ह़ुं केम? के “ए मारा बाह” मने आहयी दुख नी घड़ी मे गेथो बचाड़, पण मे आहयी कळ मे दुख वेठवान करतेत आवलो से। ए भगवान बाह तारा नाम नी बड़ाय उजन्‌ती कर!

तीहयी टेमे ह़रग गेथी आहयी अवाज ह़मळायी, “मे बड़ाय देखाड़लो से, अने अळी बी देखाड़ही।”

तत्‌यार आड़े-धेड़े उबा रेण्‌या माणहु अवाज ह़मळीन केदा, “वादळु गाज्‌यु।” थोड़ाक माणहु केदा, “एक ह़रगदुत हीनी ह़ाते वात कर्‌यो!”

ईसु तीमने केदो, “आहयो अवाज मारी जुगु नी आयो, पण तमारी जुगु ह़रगे गेथो आवलो से।” हाव आहयी कळी नो नीयाव हयवा नी टेम आय जेली से, हाव आहयी कळी ना राजा ने नीकाळ देहे। जत्‌यार माणहु मने उपर कुरुस पोर चड़ावीन मारहे, “ता मे आखा माणहु ने मारी भणी मनवी लेही।” आसम कीन ईसु आहयु उजन्‌तु कर देदो, के मारी मोत आसम हयवा वाळी से।

आहयी वात पोर माणहु तीने केदा, आमु कायदा नी आहयी वात ह़मळ्‌ळा से, के मसी सदा रेहे, अने तु काहा की र्‌यो, के माणेह ना बेटा ने उपर कुरुस पोर चड़ाव्‌वा जरुड़ी से? आहयो माणेह नो बेटो कोय से?

ईसु तीमने केदो, वीजाळु हमणे थोड़ीक वार लग तमारी वच मे से, जत्‌यार लग वीजाळु तमारी ह़ाते से तत्‌यार लग चालता रेवो; आसम नी हयवु जोवे के अंदारलु तमने आय्‌न घेरवी लेय; जे अंदारला मे चाले तीने नी मालम रेय के कंखर जाय र्‌यो। जत्‌यार लग वीजाळु तमारी पांह से, वीजाळु पोर भरहो करो। आसम करहु ता तमु वीजाळा नी अवल्‌यात बण जहु। ईसु आहयी वात कीदीन अळतेण, तीहयो तां गेथो जत र्‌यो अने खुद ने तीमनी सी ह़ताड़ लेदो।

युहदी माणहु नो वण-भरहो

अने ईसु माणहु अगळ घणा ढेरका जुदा-काम देखाड़लो, ते बी तीहया तीनी पोर भरहो नी कर्‌या। अनीन करते के भगवान वगे गेथी वात केण्‌यो यसायो जे वात केदलो हतो तीहयी वात पुरी हय सके,

“हे भगवान! कोय अमारा लारे देखाड़ली खबर पोर भरहो कर्‌यु?

कोय पोर भगवान नी सक्‌ती उजन्‌ती हयी।”

आनीन करते तीहया भरहो नी कर्‌या, काहाके यसायो आहयु बी केदलो हतो,

भगवान तीमना डोळा ने आंदळा कर देदो,

अने तीमनु मन वातड़ु कर देदलो से।

कंखर माय्‌न आसम नी हय जाय के

तीहया डोळा सी देख लेय,

अने मन सी ह़मजी लेय, अने मार भणी पासा आय लागे,

अने मे हीमने आरगा कर देम।

यसायो आहयी वात आनी लेदे केदो, के तीहयो तीनी बड़ाय ने देख्‌यो; अने तीना बारा मे वात कर्‌यो। ते बी युहदी मुखी मे गेथा घणात तीनी पोर भरहो कर्‌या, पण फरीसी माणहु नी धाके तीहया उजन्‌ता हय्‌न तीना बारा मे वात नी करता हता, आनीन करते के तीमने भक्‌ती ना घोर मे गेथा बारथा काड देहे। काहाके माणहु भणी गेथी जड़ण्‌याण ईज्‌जत तीमने भगवान वगे गेथी जड़ण्‌याण ईज्‌जत गेथी जादा मोंगाळ्‌ळी लागती हती।

ईसु नी वात ना बारा मे नीयाव

ईसु आड़ीन केदो, “जे मार पोर भरहो करे, तीहयो ह़ाचलीन तीनी पोर बी भरहो कर र्‌यो, जे मने मोकल्‌लो से। अने जे कोय मने देखे, तीहयो मने मोकलन्‌या ने देखे, मे कळी मे वीजाळु बणीन आवलो से; आनीन करते के जे मार पोर भरहो करे, तीहयो अंदारला मे नी रेवु जोवे। कदी कोय मारी वात ह़मळे अने तीने पाळ्‌या नी करे, ता मे तीनो नीयाव नी करु; काहाके मे आहयी कळी मे गुनाळ्‌ळा ठेराव्‌वा नी आयो, पण तीमने छुटकारो आपवा करीन आवलो से। जे मने नीचो ह़मजीन मारी ह़ीकापण ने नी माने, तीने गुनाळ्‌ळो ठेराव्‌वा वाळो ते एक से, जे बोलु मे केदलो से, तीहया बोलु तीने आखरी दाड़े, गुनाळ्‌ळो ठेराय देहे। मे मारी मरजी सी कंय बी नी केदो, पण ह़ु-ह़ु केवा जोवे अने ह़ु-ह़ु ह़ीकाड़वा जोवे तीहयु आखु, मारो बाह जे मने मोकल्‌लो से, तीहयोत मने हुकम आपलो से। मे जाणु के जे बोलु केवा करीन बाह मने हुकम आपलो से, तीनी मे अमर जीवाय से। एतरे जीसम मने बाह केदलो से तेमेत मे ह़ीकाड़ु।”

Source notes (2)
  1. Cross-reference लुका 7:37,38
  2. Cross-reference मत्‌ती 10:39; 16:25; मरकुस 8:35; लुका 9:24; 17:33

Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.