Paliya Bible
युहन्ना 13
ईसु ना लारे चेला ना पोगु धोवणु
फसह ना तीवार सी पेले जत्यार ईसु जाण लेदो, के मारी तीहयी टेम आय जेली से के कळ ने सोड़ीन भगवान बाह ने तां जाम, ता आह़फा ना माणहु सी, जे कळ मे हता, जीसम मोंग तीहयो करतो हतो, आखरी लग तीसमेत मोंग करतो र्यो।
अने जत्यार भुतड़ो सीमोन ना बेटा यहुदा ईस्करीयोती ना मन मे ईसु ने धराव्वा नो वीच्यार नाख देदलो, ता खावा नी टेमे ईसु जाणतो हतो के मे भगवान बाहन्तां गेथो आवलो से, अने भगवान बाह मारा हात मे आखु कंय आप देदलो से, अने मे पासो तीनीन्तां जवा वाळो से। खाणु खावा रेवा दीन उबो हय ज्यो, अने आह़फा ना लुगड़ा काड देदो, अने केड़्या मे फटकु बांद लेदो।
अने तीहयो टगारा मे पाणी हेड़ लेदो, अने आह़फा ना चेला ना पोगु धोवतो ज्यो, अने केड़्ये बांदला फटकु वेते तीमना पोगु नुसतो ज्यो। जत्यार ईसु सीमोन पतरस ने तां पोग धोव्वा करीन आयो, ता पतरस ईसु ने केदो, “ए मालीक! तु मारा पोगु धोव्वा हींड र्यो ह़ु?”
ईसु पतरस ने जपाप आप्यो, “मे जे करवा बाज र्यो, तीहयु तु हमणे नी ह़मजतो, बाखीन अळतेण तु ह़मजी जही।”
पतरस ईसु ने केदो, “मे तने मारा पोगु कदी नी धोव्वा देम।” ईसु पतरस ने केदो, “कदी मे तने नी धोवु, ता तने मारी ह़ाते रेवा नो हक नी जड़े।”
सीमोन पतरस ईसु ने केदो, “ए मालीक! आसम हय ता, तु मारा पोग एतरा नी पण मारा हात अने मुंडु लग धोय दे।”
ता ईसु पतरस ने केदो, “जे उंगळी लेय तीने पोगु एतरात धोव्वा नी जरवत से; तीनु आखु डील ते चोखलु से, तमु चोखला से, पण आखान-आखा चोखला नी हय।” ईसु ने मालम हतु के मने कोय धरावहे, एतरे तीहयो केदो, “तमु आखान-आखा चोखला नी हय।” 1
जत्यार ईसु तीमना पोग धोय देदो, ता लुगड़ा पेरीन पासो बह ज्यो, अने तीमने केदो, “मे जे वेहवार तमारी ह़ाते कर्यो तीहया वेहवार नो मतलब तमु ह़मजी ज्या ह़ु?” तमु मने गुरु अने मालीक की र्या, अने तमु तालेत की र्या, काहाके मे तीहयोत से। कदी मे तमारो मालीक अने गुरु हय्न बी तमारा पोगु धोयो; ता तमने बी एक-बीजा ना पोगु धोव्वा जोवे। मे दाखला नी सेलाणी देखाड़लो से; एतरे जीसम मे तमारी ह़ाते वेहवार करलो से तीसमेत तमु बी बीजा ह़ाते कर्या करो। 2मे तमने ह़ाची-ह़ाची केम, पावर्यो आपणा मालीक गेथो मोटो नी हय, अने नेवताळो बी मोकलन्या गेथो मोटो नी हय। कदी तमु आहयी वात ह़मजीन आना लारे जीवहु, ता जुगाळा से।
“मे तमु आखा ना बारा मे नी केतो, जीने मे टाळ लेदलो से, तीने मे जाणु, पण आहयु आनी लेदे, के खरली सास्तर नो बोल पुरो हये, जे मारो रोट्लो खादो, तीहयोत मने पटवाट्यो। हाव मे तमने पेलेत आहयु की देम, जीनी सी मारु केदलु पुरु हय जाय, ता तमु भरहो करजो, के मे तीहयोत से। 3मे तमने ह़ाची-ह़ाची केम, जे कोय मारा लारे मोकल्ला नो आव-भाव करे, तीहयो मारोत आव-भाव करे। अने जे मारो आव-भाव करे, तीहयो मने मोकलन्या नो आव-भाव करे।”
ईसु आह़फा ह़ाते अगो हयवा वाळा धोका ना बारा मे केदो
आहयी वात कीदीन ईसु जीव मे घण-जबर कलपी पड़्यो, “मे तमने ह़ाची-ह़ाची केम, तमारी मे नो एक जणो मने धराय देहे।”
चेला ने आहयु नी ह़मज पड़्यु के ईसु कोयना बारा मे केवा बाज र्यो। एतरे चेला वहराय्न एक-बीजा भणी भाळवा बाज ज्या। तीहया बारे चेला मे नो एक जणो ईसु नो लाडलो चेलो केवायतो हतो, तीहयो ईसु नी छाती भणी वळीन बह र्यो हतो। सीमोन पतरस तीने ईसारो करीन आहयु केदो, “ईसु ने पुछ तीहयो चेलो कोय से?”
तत्यार तीहयो हीसम ने हीसम ईसु नी छाती भणी वळीन बह रेलोत ईसु ने पुछ्यो, “ए मालीक! तीहयो कोय से?” ईसु जपाप आप्यो, “मे जीने रोट्ला नो कोळ बोळीन आपही, तीहयोत मने धरावण्यो से।” अने तीहयो रोट्ला नो कोळ बोळीन सीमोन ईस्करीयोती ना बेटा यहुदा ने आप्यो। अने रोट्ला नो कोळ लेतेत. यहुदा ना डील मे भुतड़ो भराय ज्यो, तत्यार ईसु यहुदा ने केदो, “जे काम तु करवा हींड र्यो, तीहयु छोटो कर।” पण तां ह़रा बह रेला चेला मे कोयने बी आहयी वात ह़मज मे नी पड़ी, के ईसु तीने आहयी वात काहा केदो। यहुदा पांह कोथळी रेती हती, एतरे काना-काना आहयु ह़मज्या के ईसु तीने आहयु केदो हहे, के आपणु ने तीवार नी करते जे कंय जोवे, तीहयु वेचातु ली ले नीता गरीब ने आप दे।
अळतेण रोट्ला नो कोळ खायलीन यहुदो तत्यारुत बारो जत र्यो। तीहयी रात नी टेम हती।
एक नवलो हुकम
तीने बारो जवादीन ईसु केदो, हाव मनख्या ना बेटा नी बड़ाय हयी, अने भगवान नी बड़ाय तीनी मे हयी। अने भगवान बी मनख्या ना बेटा ने ह़रग मे वाळी बड़ाय पासी आपीन ईज्जत करहे, अने छोटोत करहे। 4“ए मारा लाडला बेटा-बेटी! मे अळी जरीक वार तमारी ह़ाते से। अळतेण तमु मने ह़ोदहु, अने मे जीसम युहदी-पुडार्या ने केदलो हतो, तीसम हाव मे तमने बी केम, जां मे जवा बाज र्यो, तां तमु नी आय सको।” 5“मे तमने एक नवलो हुकम आपु, तमु एक-बीजा ने मोंग करो। जीसम मे तमने मोंग कर्यो, तेमेत तमु बी एक-बीजा ने मोंग करो। कदी तमु एक-बीजा ने मोंग करहु, ता आहयु देखीन आखा माणहु जाण लेहे, के तमु मारा चेला से।”
ईसु पतरस ना नीकारा ना बारा मे केय
(मत्ती 26:31-35; मरकुस 14:27-31; लुका 22:31-34)
सीमोन पतरस ईसु ने केदो, “मालीक! तु कां जवा बाज र्यो?”
ईसु पतरस ने केदो, “मे जां जवा बाज र्यो, तां तने हमणे नी अवाये, पण अळतेण तु तां आवही।”
पतरस तीने केदो, “ए मालीक! मने हमणे, तु जाय तां काहा नी अवाये? मे तारीन करते मारो जीव बी आप देही।”
ईसु पतरस ने जपाप आप्यो, “तु मारीन करते आह़फा नो जीव आप देही ह़ु? मे तने ह़ाची-ह़ाची आहयु केम, कुकड़ो वाहवान पेलेत तु तीन कावा बीजा अगळ आसम केही के ‘मे ईसु ने ओळखु लग नी।’”
Source notes (5)
- Cross-reference लुका 22:27
- Cross-reference मत्ती 10:24; लुका 6:40; युहन्ना 15:20
- Cross-reference मत्ती 10:40; मरकुस 9:37; लुका 9:48; 10:16
- Cross-reference युहन्ना 7:34
- Cross-reference युहन्ना 15:12,17; 1 युहन्ना 3:23; 2 युहन्ना 1:5
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.