Paliya Bible
युहन्ना 8
ईसु छीनाळ बयर ना पाप माफ करे
ईसु जेतुन ना बड़ा पोर ज्यो। अने ह़वारे मंदीर मे आयो, अने आखा माणहु ईसुन्तां आया, अने तीहयो बहीन तीमने ह़ीकाड़वा बाज ज्यो। तत्यार सास्तर ह़ीकाड़न्या अने फरीसी एक बयर ने धरीन लाया, अने तीने वच मे उबी कर देदा, काहाके तीने छीनाळु करतली देख पाड़ला, अने ईसु ने केदा, “ए गुरु!” आहयी बयर ने छीनाळु करतली देख पाड़ला से मुसा ना कायदा मे लीखलु से के आसवी छीनाळ्याण बयर ने दगड़ाटीन मार नाखवा जोवे। एतरे आहयी बयर ना बारा मे तारु ह़ु केणु पड़े। तीहया ईसु ने पारखवा करीन आहयी वात केदा, ईसु पोर गुनो लगाड़वा करीन कंय वात जड़ जाय, पण ईसु ढुंगो वळीन आगळ्ये करीन भोयमे लीखवा लाग्यो। जत्यार तीहया ईसु ने पुछता र्या, ता ईसु उबो हय्न तीमने केदो, “तमारी मे जे कोय पाप नी कर्यो हय, तीहयोत आखान पेले आहयी बयर ने दगड़ो देवो।” अने अळी ढुंगो वळीन धरती पोर लीखवा बाज ज्यो। अने आहयु ह़मळीन मोट्ला गेथा नान्ला लग, आखा एकीक करीन जत र्या। अने तां ईसु अने तीहयी बयर री जी। ईसु उबो हय्न तीहयी बयर ने केदो, “ए बाय जात! तीहया माणहु कां जत र्या? तने कोय बी डंड नी आप्यो ह़ु?”
तीहयी बयर केदी, ए मालीक!
कोय बी डंड नी आप्यो। ईसु तीने केदो, मे बी तने डंड नी आपतो। जा, अने अळी पाप नी करजे।
कळी नु वीजाळु ईसु से
तत्यार ईसु अळी माणहु ने केदो, कळ नु वीजाळु मेत से; जे कोय मारी पसळ आवहे, तीहयो अंदारला मे नी चाले, पण जीवाय नु वीजाळु हात करहे। 2
एतरे फरीसी ईसु ने केदा, “तु आह़फा ना बारा मे गवाय आह़फोत दी र्यो। एतरे तारी गवाय खरली नी हय।”
ईसु तीमने जपाप देदो, “मे जाणु के मे कां गेथो आवलो से, अने कां जवा बाज र्यो। पण तमु नी जाणता के मे कां गेथो आवलो से, अने कां जवा बाज र्यो। एतरे आह़फोत मे मारा बारा मे गवा देम; ते बी मारी गवाय खरली से। तमु कळ ना हीसाबे नीयाव कर र्या, पण मे कोयनो आसम नीयाव नी करु। अने कदीम नीयाव बी करु, ता मारो नीयाव खरलो से; काहाके मे एखलो नी, पण मारा बाह ह़ाते से, जे मने मोकल्लो से। तमारी कायदा नी सास्तर मे बी लीखलु से; के बे जणा नी गवाय खरली मनाये। मे मारा बारा मे गवा देम, अने मारो बाह बी मारा बारा मे गवाय देय, जे मने मोकल्लो से।”
तीहया ईसु ने केदा, कां से तारो बाह? ईसु तीमने जपाप आप्यो, तमु मने बी नी जाणता, अने मारा बाह ने बी नी जाणता।
कदी तमु मने जाणता, ता मारा बाह ने बी जाण लेता।
ईसु मंदीर मे, दान-पेटीन तां ह़ीकापण आपतो जाय्न आहयी वात केदो, ते बी कोय नी तीने धर्या, काहाके तीनी टेम हजु लग नी आवली हती।
आह़फा ना बारा मे नी वात
ईसु अळी माणहु ने केदो, “मे जाम, अने तमु मने ह़ोदहु, अने आह़फा ना पाप मेत मर जहु। जां मे जाम, तां तमने नी अवाय सके।”
आहयी वात पोर युहदी माणहु केदा, “आहयो आसम काहा की र्यो, जां मे जाम, तां तमु नी आय सको, ह़ुं आहयो आह़फा ने मार नाखहे?”
ईसु तीमने केदो, “तमु हेटला से, मे उपरलो से। तमु आहयी कळ ना से, मे आहयी कळ नो नी हय।” एतरे मे तमने केदलो, आह़फाम ना पाप मेत मर जहु; काहाके तमु तीहयोत से करीन भरहो नी करो, ता तमु आह़फाम ना पाप मेत मर जहु।
तीहया ईसु ने केदा, तु कोय से? ईसु तीमने केदो, मे तीहयोत से जे सुरु सी केतो आय र्यो। तमारा बारा मे मने घणु कंय केवा नु से, अने नीयाव करवा नो से। पण मने मोकलवा वाळो खरलो से; अने जे मे तीनी सी ह़मळु तीहयुत आहयी कळ ना माणहु ने केम।
ईसु तीमने भगवान बाह ना बारा मे केवा बाज र्यो हतो, पण तीहयी वात तीमने पल्ले नी पड़ी। ता ईसु केदो, के जत्यार तमु मनख्या ना बेटा ने उपर कुरुस पोर चड़ावहु, ता तमु जाण जहु के मे तीहयो से। अने मे मारी मरजी सी कंय बी नी केम, पण जेम मारो बाह मने ह़ीकाड़लो से, तेमेत आहयी वात केम। मने मोकलवा वाळो मारी ह़ाते से; तीहयो मने एखलो नी सोड़्यो; मे सदा तीहयुत काम करत्लो, जे काम तीने गमे।
ईसु आहयी वात केवा बाज र्यो हतो, ता ढेरेत माणहु तीनी पोर भरहो कर्या।
सच्चाय तमारो छुटकारो करहे
जे युहदी माणहु ईसु पोर भरहो कर्या, तीमने केदो, “कदी तमु मारी ह़ीकापण मे टेकला रेहु, ता ह़ाचली तमु मारा चेला बण जहु। अने सच्चाय ने ओळखी लेहु, अने तीहयी सच्चाय तमने सोड़ावहे।” 3
तीहया ईसु ने केदा, “आमु अब्राहम नी अवल्यात से, अने आमु कदी कोयना कब्जा मे नी हया। अने तु आसम कीसम केय के सच्चाय तमने कब्जा मे गेथा सोड़ाय देहे।”
ईसु तीमने केदो, “मे तमने ह़ाची-ह़ाची केम, जे पाप करे, तीहयो पाप नो गुलाम से। पावर्यो जलम घोर मे नी रेय, पण बेटो जलम घोर मे रेय। एतरे कदी बेटो तमने पाप नी गुलामी मे गेथो सोड़ाय लेय, ता तमु ह़ाचली पाप ना गुलाम मे गेथा छुट जहु। मे जाणु के तमु अब्राहम नी अवल्यात से; ते बी तमु मारी ह़ीकापण जुगु तमारा मन मे जागो नी हय, करीन तमु मने मारवा हंड र्या। मे तीहयुत केम अने करु, जे मारा बाहन्तां देखलो से, अने तमु तीहयुत कर र्या जे तमारा बाह सी ह़मळ्ळा से।”
तीहया ईसु ने केदा, अब्राहम अमारो बाह से।
एतरे ईसु तीमने केदो, “कदी तमु अब्राहम नी अवल्यात हता, ता तमु तीहयुत काम करता जे काम अब्राहम करत्लो।” मे तमने भगवान वगे गेथो सच्चाय नो बोल ह़मळायो; आहयु ह़मळीन बी तमु मने मारवा हींड र्या, तमारीन तेवा काम अब्राहम ते नी कर्यो। तमु तमारा बाह ने तेम काम कर र्या, तीहया ईसु ने केदा, “आमु छीनाळा सी पयदा नी हया; अमारो एकीत बाह से मतलब भगवान से।”
ईसु तीहया युहदी माणहु ने केदो, भगवान तमारो बाह नी हय कदीम तमारो बाह हतो ता तमु मने ओळखीन मोंग करता काहाके तमारी मरजी सी नी आयो पण मने भगवान मोकल्लो से करीन मे भगवान बाह मे गेथो नीकळीन आवलो से। तमु मारी वात काहा नी ह़मजता? एतरे के तमु मारी वात मन लगाड़ीन नी ह़मळता। काहाके तमु भुतड़ा नी अवल्यात से, तमारा बाह नी मरजी पुरी करवा हींड र्या। तीहयो ते सुरु गेथो हत्यारो से, अने तीहयो सच्चाय भणी कदी नी वळ्यो, अने काहाके सच्चाय तीनी मे हयेत नी। तीहयो जलम झुटेत मेक्या करे, काहाके तीहयो झुटो एतरोत नी, पण झुट नो बाह से। मे ह़ाची वात केम, करीन तमु मारी पोर भरहो नी करता। तमारी मे गेथा कोय मने पापी ठेरावे? अने कदी मे ह़ाची केम, ता तमु मार पोर भरहो काहा नी करता? जे भगवान वगे गेथो से, तीहयो भगवान नी वात ह़मळीन माने, आनीन करते तमु भगवान नी वात नी मान्ता; के तमु भगवान वगे गेथा हय।
ईसु अने अब्राहम
आहयी वात ह़मळीन युहदी माणहु ईसु ने केदा, “ह़ुं आमु ते तने वारु नी केता, के तु सामरी से, अने तने भुतड़ा चोट र्या।”
ईसु तीमने जपाप आप्यो, “मने भुतड़ा नी चोट्या। पण मे मारा बाह नु आबरु राख र्यो, अने तमु मारु आबरु ली र्या। मने मारी ईज्जत नी जोवती, पण एक जणो से जे, मारु आबरु राखवा नी हेर कर र्यो, अने नीयाव करन्यो से। मे तमने ह़ाची-ह़ाची आहयु केम, ‘जे कोय मारी ह़ीकापण ने मानीन पाळहे तीहयो जलम नी मरे।’”
युहदी माणहु ईसु ने केदा, के आमु जाण ज्या के तने भुतड़ा चोट र्या: अब्राहम मर ज्यो, अने भगवान वगे गेथा वात केण्या माणहु बी मर ज्या, अने तु की र्यो के जे कोय मारी ह़ीकापण मानीन पाळहे, तीहयो कदी नी मरे। अमारो बाह अब्राहम ते मर ज्यो, अने भगवान वगे गेथा वात केण्या माणहु बी मर ज्या, तु अब्राहम गेथो मोटो से ह़ु? तु आह़फा ने ह़मजी ह़ु र्यो।
ईसु तीमने जपाप आप्यो, कदी मे मारी बड़ाय करु, ता मारी बड़ाय कंय बी नी, पण मारी बड़ाय करवा वाळो मारो बाह से, जीने तमु केवो, के हीय्यो अमारो भगवान से। तमु तीने कदी नी ओळख्या; पण मे तीने ओळखु; अने कदी मे केम के तीने नी ओळखु, ता मे बी तमारीन तेम झुटो से, पण मे तीने ओळखु अने तीनी ह़ीकापण मानीन पाळु। तमारो बाह अब्राहम मने देखवा करीन मारा आव्वा ना दाड़ा नी वाट जोवीन खुस हय ज्यो, अने तीहयो मने देख बी लेदो अने खुस हय ज्यो।
युहदी माणहु ईसु ने केदा, “हजु लग तारी उमर पचाह साल बी नी हयी, ते बी तु अब्राहम ने देखलो से?”
ईसु तीमने केदो, “मे तमने ह़ाची-ह़ाची आहयु केम, अब्राहम पयदा नी हयो तीन गेथो पेल्नो, मे से।”
तत्यार युहदी माणहु ईसु ने मारवा करीन दगड़ा चुट लेदा, पण ईसु ह़ताय्न मंदीर मे गेथो जत र्यो।
Source notes (3)
- Cross-reference मत्ती 5:14; युहन्ना 9:5
- Cross-reference युहन्ना 5:31
- Cross-reference मत्ती 3:9; लुका 3:8
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.