Skip to content
BibleKenya

Paliya Bible

युहन्‌ना 7

ईसु अने तीना भायु नु तीवार मे जाणु

युहदी ईसु ने मार नाखवा नो वीच्‌यार कर र्‌या हता; करीन तीहयो युहद्‌या मे नी फीरवा हींडतो हतो। एतरे ईसु गलील मे सेवा करतो जाय्‌न फीरतो र्‌यो। अने युहदी माणहु नो तम्‌बु नो तीवार ह़ातेत आय र्‌यो हतो। एतरे ईसु ना भाय ईसु ने केदा, “आञे सी कंय करीन युहद्‌या मे जत रे के, जे काम तु करे, तीने तारा चेला बी देखे। काहाके आसवो कोय नी हहे जे मोटो बणवा हींडे, अने तीहयो ह़ताय्‌न काम करे, पण तु जुदा-काम करीत र्‌यो, ता आह़फा ने कळी मे उजन्‌तो कर दे।” काहाके ईसु ना भाय बी ईसु पोर भरहो नी करता हता।

तत्‌यार ईसु तीमने केदो, “मारी टेम हजु नी आयी; पण तमारी लेदे आखी टेमेत से। कळी ना माणहु तमारी सी रीह नी करे, पण तीहया मारी पोर रीह करहे, काहाके मे तीमना वीरोद मे गवाय देम, के तीमना काम बुरा से। तमु तीवार मे जावो, मे हमणे आहया तीवार मे नी जतो; काहाके हमणे मारी टेम नी आयी। आहयी वात तीमने कीन ईसु गलील मेत री ज्‌यो।”

तम्‌बु ना तीवार मे ईसु

पण तीना भाय तीवार मे ज्‌या, ता ईसु बी ज्‌यो पण उजन्‌तो नी ज्‌यो बाखीन होगलोत तां ज्‌यो। तीवार मे युहदी माणहु ईसु ने ह़ोदता जाय्‌न केता हता के “तीहयो माणेह कां से?”

अने माणहु ईसु ना बारा मे ह़ळ्‌ये-ह़ळ्‌ये ढेरेत वात केता हता, थोड़ाक केता हता, हीय्‌यो भलाय करवा वाळो माणेह से अने थोड़ाक केता हता, नी हीय्‌यो माणहु ने भंगलाड़ र्‌यो। पण कोय बी युहदी माणहु ना धाके ईसु ना बारा मे उजन्‌ता हय्‌न नी केतला।

अने जत्‌यार तीवार ना आदा दाड़ा वीत ज्‌या, ता ईसु मंदीर मे जाय्‌न ह़ीकाड़वा बाज ज्‌यो। युहदी माणहु वहराय्‌न केवा बाज ज्‌या के आने भण्‌या वगर आतरी वीद्‌या कां गेथी जड़ी?

ईसु तीमने जपाप आप्‌यो, “मारी ह़ीकापण मारी नी हय पण मने मोकलन्‌या नी से। कदी कोय भगवान नी मरजी पोर चालवा हींडे, ता ह़ीकापण ना बारा मे जाण जहे के आहयी भगवान भणी गेथी से के मारी भणी गेथी की र्‌यो। जे कोय आह़फा भणी गेथो कंय केय, तीहयो आह़फा नी बड़ाय कराव्‌वा हींडे; पण जे कोय आह़फा ने मोकलन्‌या नी बड़ाय कराव्‌वा हींडे तीहयो खरलो से, अने तीनी मे कंय बी खोट नी हय। मुसो तमने कायदा नी आप्‌यो ह़ु? ते बी तमारी मे गेथा कोय बी कायदा पोर नी चाले। ता तमु मने काहा मारवा हींड र्‌या?”

माणहु जपाप आप्‌या, “तारी मे भुतड़ो से! कोय तने मारवा हींडे?”

ईसु तीमने जपाप आप्‌यो, “मे एक काम करलो से, करीन तमु आखा भंगलाय र्‌या। आनीन करते मुसो तमने खतना करवा नी रीती नो कायदा आप्‌यो, पण आहयी मुसा ना लारे नी सुरु हयी, पण पेले गेथी आड़ा-बुड़ा नी टेमे गेथीत सुरु हयी, अने तमु अराम ना दाड़े माणेह नु खतनु कर र्‌या। 1जत्‌यार अराम ना दाड़े माणेह नु खतनु ना काम कर देत्‌ला काहाके मुसा ना कायदा नी टुटवा जोवे, ता अराम ना दाड़े मे एक माणेह ने पुरो आरगो कर देदो करीन तमु मार पोर काहा रीहवाय र्‌या? मोडा देखीन नीयाव ना करो, पण खरलो नीयाव करो।”

ईसुत मसी से ह़ुं?

ता यरुसलेम मे वाळा माणहु केवा बाज ज्‌या के आहयो तीहयोत माणेह नी हय जीने मार नाखवा नो वीच्‌यार कर र्‌या? पण देखो आहयो ते उजन्‌तो वात करवा बाज र्‌यो, अने पुडार्‌या आने कंय बी नी केता, कंय माय्‌न हीय्‌या हीने ह़ाचली आव्‌वा वाळो मसी ते नी मान लेदा? पण आमु ते हीने जाणये, के हीय्‌यो कां गेथो आवलो से; पण जत्‌यार मसी आवहे, ता कोय नी जाणे, के हीय्‌यो कां गेथो आवलो से।

तत्‌यार ईसु मंदीर मे ह़ीकाड़तो जाय्‌न आड़ीन केदो, “तमने आसम लागे के आमु हीने ओळखी र्‌या, अने आहयु बी जाणये के हीय्‌यो कां गेथो आवलो से। ते बी मारी मरजी सी नी आयो, पण जे मने मोकलवा वाळो खरलो से, तीने तमु नी जाणता।” मे तीने जाणु; काहाके मे तीनी वगे गेथो आवलो से, अने तीहयोत मने मोकल्‌लो से।

एतरे ईसु ने तीहया धरीन लीजवा हंडता हता, पण ईसु ने धरीन लीजवा नी कोयने हीम्‌मत नी आयी काहाके ईसु नी टेम हजु लग नी आवली हती। अने मेळा मे गेथा घणात ईसु पोर भरहो कर्‌या, अने केवा बाज ज्‌या, जीसम आहयो करलो से, “एतरा ढेरका वहराड़न्‌या काम ना सेलाण्‌या बीजो कोय बी नी देखाड़ सके; एतरे आहयोत मसी से?”

ईसु ने धरवा नी कोसीत

फरीसी पंथवाळा आहयु ह़मळ्‌या के माणहु ईसु ना बारा मे ह़ळ्‌ये-ह़ळ्‌ये वात करवा बाज र्‌या; ता डायलो पुंजारो अने फरीसी पंथवाळा ईसु ने धरीन लाव्‌वा करीन सीपायड़ा ने मोकल्‌या। ईसु केदो, “हाव मे थोड़ीक वार लग तमारी ह़ाते रेही। अळतेण मने मोकलन्‌यान तां पासो जत रेही। तमु मने ह़ोद्‌या करहु, पण मे तमने नी जड़ु। अने मे जां जवा बाज र्‌यो, तां तमु नी आय सकत्‌ला।”

युहदी माणहु आह़फा-आह़फात केवा बाज ज्‌या, आहयो कां जहे के आमु ईने ह़ोदी नी सकया? ह़ुं हीय्‌यो तीहया युहदी माणहुन तां जहे जे युनानी माणहु ना वच मे तीतर-बीतर हय्‌न री र्‌या, अने युनानी माणहु ने बी ह़ीकापण आपहे? आहयी ह़ुं वात से जे तीहयो केदो, के तमु मने ह़ोदहु, पण मे तमने नी जड़ु, अने जां मे जाम, तां तमु नी आय सकत्‌ला?

जीवाय ना पाणी नी नंदी

तीवार ना आखरी दाड़े, जे खास दाड़ो केवाय, ईसु उबो हयो, अने ज्‌योरेत आड़ीन केदो, “जे कोय तरहेलो हय तीहयो मारीन्‌तां आवो अने पीवो। खरला सास्‌तर मे लीखलु से, जे कोय मार पोर भरहो करे, तीनी मे गेथी जीवाय ना पाणी नी नंदी वय्‌न नीकळहे।” ईसु आहयी वात आत्‌मा ना बारा मे केदलो हतो, जे भरहो करवा वाळा नी जीवाय मे आव्‌वा वाळी हती; काहाके आत्‌मा हजु लग नी उतरली हती, काहाके हजु लग ईसु आह़फा नी बड़ाय मे पासो नी जेलो हतो।

माणहु ना वच मे बेरजाव

तत्‌यार मेळा मे वाळा काना-काना माणहु आहयी वात ह़मळीन केदा, “ह़ाचली आहयो भगवान वगे गेथो वात केण्‌यो माणेह से।”

थोड़ाक माणहु केदा, “आहयो ते मसी से।”

पण थोड़ाक माणहु केदा, “आहयो मसी नी हय। काहाके मसी गलील मे हय्‌न नी आय सके। खरला सास्‌तर मे लीखलु से के, मसी बेतलहम गाम मे दावुद नी अवल्‌यात मे पयदा हयहे।” आसम करीन माणहु मे बेरजाव पड़ ज्‌यो। तीमनी मे गेथा थोड़ाक माणहु ईसु ने धरीन लीजवा हींडता हता, पण तीने धरीन लीजवा नी कोयने हीम्‌मत नी आयी।

तत्‌यार सीपायड़ा पुंजारान तां अने फरीसी माणहु भणी पासा आया, अने तीहया केदा, “तमु तीने काहा नी लाया?”

युहदी अगवा नो वण-भरहो

सीपायड़ा केदा, कोय माणेह कदी आसवी वात नी कर्‌यु। जीसम तीहयो केय।

फरीसी केदा, तमु बी भंगलाय ज्‌या ह़ु? पुडार्‌या अने फरीसी माणहु मे ना कोय बी, ईसु पोर भरहो करला से ह़ु? पण आहया माणहु ने कायदा मालम नी हय, एतरे ईमनी पोर गरा से। 2

नीकुदेमुस, जे पेलेत ईसु ने भेटवा जेलो, तीहयो तीमनी मे गेथो एक हतो, तीहयो केदो। ह़ुं आपणा कायदा काना माणेह ने जत्‌यार लग पेले तीनी ह़मळीन जाणी नी लेय के तीहयो ह़ुं कर्‌यो, तीने गुनाळ्‌ळो बणावत्‌ला?

तीहया नीकुदेमुस ने केदा, “ह़ुं तु बी गलील वाळो से, खरला सास्‌तर मे ह़ोद, अने भणीन भाळ, के भगवान वगे गेथी वात केण्‌यो माणेह गलील मे गेथो आवण्‌यो नी हय।” तत्‌यार आखा आपणा-आपणा घोर जत र्‌या।

Source notes (2)
  1. Cross-reference युहन्‌ना 5:9
  2. Cross-reference युहन्‌ना 3:1,2

Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.