Paliya Bible
युहन्ना 6
ईसु पांच हजार माणहु ने खवाड़े
थोड़ाक दाड़ान अळतेण ईसु गलील नी दर्या मतलब तीबर्या नी दर्या ने सेकीन ज्यो। ईसु घणा मांदला माणहु ने आरगा करतो हतो। ईसु ना वहराड़न्या काम नी सेलाणी देखीन माणहु नो जुदो मोटो मेळो ईसु पसळ चाल पड़्यो। ईसु आह़फा ना चेला ह़ाते एक बड़ा पोर चड़ीन, तीमनी ह़ाते बह ज्यो। अने युहदी माणहु नो फसह नो तीवार ह़ाते आय रेलो हतो।
ईसु घण मोटो मेळो आह़फा भणी आवत्लो देख्यो, अने फीलीपुस ने केदो, “आपणु ईमने खवाड़वा करीन कां गेथा रोट्ला वेचाता लावहु?” पण तीहयो आहयी वात तीने पन्तारवा नी लेदे केदो, काहाके तीहयो खुद जाणतो हतो के तीहयो ह़ुं करहे?
फीलीपुस ईसु ने केदो, बे ह़ो दाड़ा नी दाड़की ना पय्हा ना रोट्ला लावहु अने थोड़ाक-थोड़ाक वाटहु ते बी तीमनी जुगु पुरती नी पड़े।
ईसु ना चेला मेथो सीमोन पतरस नो भाय अंदर्यास ईसु ने केदो। आञे एक सोरु से तीनी पांह जळगम ना पांच रोट्ला से अने बे माछला से, पण एतरा ढेरका माणहु ने ह़ु लागे।
तीहया जागे घणो चारो हतो, अने ईसु चेला ने केदो, माणहु ने पंगात मे बहाड़ देवो। तां अदमड़ा पांच हजार हता अने आखा माणहु बह ज्या। तत्यार ईसु रोट्ला ने ली लेदो, अने भगवान ने जुगाळो कीन बह रेला माणहु ने वाट देदा, अने माछला बी तेमेत वाट देदा जेतरु तीमने जोवे तेतरु वाट देदा। जत्यार माणहु खायलीन आफरी ज्या ता ईसु आह़फा ना चेला ने केदो बचला रोट्ला ना टुकड़ा भेळा कर लेवो थोड़ुक बी बगड़वा नी जोवे। एतरे चेला भेळा कर्या, अने जळगम ना पांच रोट्ला ना टुकड़ा जे खायलीन बचला हता, तीना बारे चार्या भराय ज्या।
माणहु ईसु ना वहराड़न्या काम नी सेलाणी देखीन की पड़्या, “ह़ाचली आहयो भगवान वगे गेथो खबर लावण्यो कळी मे आव्वा वाळो हतो तीहयो आहयोत से।” ईसु आहयु जाणीन के माणहु आवीन मने जबराण राजा बणाव्वा हींडे, एतरे तीहयो एखलोत बड़ा पोर जत र्यो।
ईसु नु पाणी पोर चालनु
(मत्ती 14:22-27; मरकुस 6:45-52)
ह़ांती टेमे ईसु ना चेला दर्या धेड़े ज्या। अने ढुंड्यु मे बहीन ह़ेली धेड़े कफरनहुम भणी जवा बाज ज्या। अंदारु हय जेलु हतु, अने ईसु हजु लग तीमनीन्तां नी आयो। अने आंजी ना कारण झलक बी दर्या मे ज्योरेत आव्वा बाज जी। जत्यार तीहया तीन च्यार मील जत र्या, ता तीहया ईसु ने दर्या पोर चालीन ढुंड्यु भणी आवतलो देख्या अने तीमने बीक लागी। पण ईसु तीमने केदो, बीहो ना मेत से। तत्यार तीहया ईसु ने ढुंड्यु मे बहाड़वा करीन तीनीन्तां ढुंड्यु ने ली ज्या।
माणहु ईसु ने ह़ोदे
बीजा दाड़े, दर्या नी ह़ेली धेड़े उबो हय रेलो माणहु नो टोळो देख्यो के, आञे एकीत ढुंड्यु हतु, बीजा नान्ला ढुंड्या हता नी, अने ईसु चेला ह़ाते ढुंड्या मे नी चड़्यो, पण तीना चेला एतरा जत रेला हता। ता अळी बीजा नान्ला ढुंड्या तीबर्या गेथा तीहया जागा धेड़े आया, जां तीहया भगवान ने जुगाळो केदला अने रोट्ला खादला हता। जत्यार भीड़ मे वाळा माणहु देख्या, के आञे नी ते ईसु हय, अने नी ते तीना चेला हय, ता तीहया माणहु नान्ला ढुंड्या मे बहीन ईसु ने ह़ोदवा करीन कफरनहुम मे पुग्या।
ईसु जीवाय नो रोट्लो से
अने तीहया दर्यान ह़ेली धेड़े कफरनहुम मे ईसु ने भेटीन केदा, ए गुरु! तु आञे कत्यार आयो?
ईसु तीमने जपाप आप्यो, मे तमने ह़ाची-ह़ाची केम, तमु मने आनीन करते नी ह़ोद र्या के तमु वहराड़न्या काम देख्या, पण रोट्ला खायलीन आफरी ज्या करीन ह़ोद र्या?
खत्तम हयण्या खाणान करते मेहनत ना करो, पण तीहया खाणान करते मेहनत करो, अने तीहयु खाणु अमर जीवाय जुगु जलमकु टेकलु रेहे, अने आसवु खाणु तमने मनख्या नो बेटो आपहे, काहाके बाह भगवान मनख्यान बेटा पोर सीलटप्पो लगाड़ देदलो से।
तीहया माणहु ईसु ने पुछ्या, “भगवान ने गमे एवु कानु काम करवा ना लेदे आमु ह़ुं करया?”
ईसु तीहया माणहु ने जपाप आप्यो, “भगवान ने गमे एवु काम आहयु से, के जीने भगवान मोकल्लो से, तीनी पोर भरहो करो।”
तीहया माणहु केदा, “तु काना काम नी सेलाणी देखाड़ही, के सेलाणी देखीन आमु तार पोर भरहो करया? अने तु आमने कानु काम करीन देखाड़ही? अमारा डाह-डाहा बड़ा मे मन्ना खादा; जीसम के लीखलु से, के तीहयो तीमने खावा करीन ह़रगे गेथा रोट्ला आप्यो।”
ईसु तीमने केदो, मे तमने ह़ाचली केम, के रोट्ला ह़रगे गेथा मुसो नी आप्यो, पण मारो बाह तमने ह़रगे गेथो खरला रोट्ला आपे। भगवान नो रोट्लो तीहयोत से, जे ह़रगे गेथो उतरीन मनख्या ने अमर जीवाय आपे।
तीहया ईसु ने केदा, “ए मालीक! आहयो रोट्लो आमने जलम आप्या कर।”
ईसु तीमने केदो, अमर जीवाय नो रोट्लो मेत से: अने जे मारीन्तां आवहे तीहयो कदी भुकलो नी रेय अने मार पोर भरहो करहे तीहयो तरहेलो नी रेय। पण मे तमने केदो, के तमु मने देखी बी लेदला से, ते बी भरहो नी करता। बाह जीने बी मने आप देहे, तीहया आखा मारीन्तां आवहे, अने मे तीमने मारीन्तां गेथो कदी नी नीकाळु। काहाके मे मारी मरजी पुरी करवा करीन नी, पण मने मोकलन्या नी मरजी पुरी करवा करीन ह़रगे गेथो उतरलो से। अने मने मोकलन्या नी मरजी आहयी से के जीने तीहयो मने आपलो से, तीमनी मे गेथा एक ने बी खोवाव्वा नी देम, पण तीमने आखरी दाड़े मर्या-ह़र्या मे गेथो जीवता कर देही। काहाके मारा बाह नी मरजी आहयी से के, जे कोय तीना बेटा ने देखे, अने तीनी पोर भरहो करे, ता तीनी पांह अमर जीवाय रेहे, तीने मे आखरी दाड़े मर्या-ह़र्या मे गेथो पासो जीवतो कर देही।
ईसु तीमने केदलो, के ह़रगे गेथो उतरलो रोट्लो मेत से। आहयी वात पोर युहदी माणहु ईसु पोर कुर-कुर करवा बाज ज्या। अने तीहया केदा, “आहयो युसुफ नो सोरो ईसु नी हय, आमु आना आह्य-बाहा ने जाणये, ता हीय्यो आसम काहा की र्यो के मे ह़रगे गेथो उतरलो से?”
ईसु तीमने जपाप आप्यो, के तमु-तमुत ना कुर-कुर करो। कोय मारीन्तां नी आय सकत्लु, जत्यार लग बाह, जे मने मोकलो से, तीने हापकीन नी लावे, अने मे तीने आखरी दाड़े अळी जीवतो करही। भगवान वगे गेथा केवा वाळा नी कीताप मे आहयु लीखलु से, तीहया आखा भगवान वगे गेथा ह़ीकाड़ला रेहे, जे कोय बाह सी ह़मळला अने ह़ीकला से, तीहया मारीन्तां आवहे।1 आहयु नी, के कोय बाह ने देखला से पण जे भगवान वगे गेथो आवलो से, तीहयोत भगवान बाह ने देखलो से। मे तमने ह़ाची-ह़ाची केम, “जे कोय भरहो करे, अमर जीवाय तीनीत से।” अमर जीवाय नो रोट्लो मेत से। तमारा आड़ा-बुड़ा बड़ा मे मन्ना खादा, अने तीहया मर ज्या। आहयो तीहयो रोट्लो से जे ह़रगे गेथो उतरलो से काहाके माणहु तां गेथा खाय अने नी मरे। ह़रगे गेथो उतरलो अमर जीवाय नो रोट्लो मेत से, कदी कोय आहयो रोट्लो खाहे, तीहयो जलम जीवत्लो रेहे। अने जे रोट्लो मे कळी नी जीवाय जुगु आपही, तीहयो रोट्लो मारु माह से।
एतरे युहदी माणहु आहयु कीन झगड़वा बाज ज्या, के “आहयो माणेह आह़फा नु माह खावा करीन कीसम आप सके।”
ईसु तीमने केदो, “मे तमने ह़ाची-ह़ाची केम, जत्यार लग तमु मनख्या ना बेटा नु माह नी खावो, अने तीनु लोय नी पीवो, तां लग तमारी मे जीवाय नी हय। जे कोय मारु माह खाय, अने मारु लोय पीतो हय, अमर जीवाय तीनीत से, अने आखरी दाड़े तीने मे मर्या-ह़र्या मे गेथो पासो जीवतो कर देही। मारु माह खरलु खाणु से, अने मारु लोय पीवा नी खरली चीज से। जे मारु माह खाया करहे, अने मारु लोय पीया करहे, तीहयो मारी मे रेहे, अने मे तीनी मे रेही। जीसम जीवत्लो बाह मने मोकल्यो अने मे बाह नी मरजी ना लारे जीवत्लो से, तीसमेत जे मने खाहे, तीहयो मारी मरजी ना लारे जीवत्लो रेहे। ह़रगे गेथो उतरलो रोट्लो मेत से। आहयो रोट्लो ते रोट्लान तेवो नी हय जीने आड़ा-बुड़ा खादा अने मर ज्या; पण जे कोय आहयो रोट्लो खाहे तीहयो जलम जीवत्लो रेहे।”
कफरनहुम मे भक्ती ना घोर मे ईसु ह़ीकापण आपतो जाय्न आहयी आखी वात केदो।
जलम जीवाय ना बोलु
एतरे तीना चेला मे गेथा घणात आहयु ह़मळीन केदा, “आहयी ते वातड़ी ह़ीकापण से। आने कोय मान सकत्लु?”
ईसु आह़फा ना मन मे आहयु जाणीन के मारा चेला आह़फा-आह़फात आहयी वात पोर कुर-कुर कर र्या, तीमने पुछ्यो, ह़ुं आहयी वात सी तमने ठोकर लाग री? अने कदी तमु माणहु ना बेटा ने जां तीहयो हतो, तां उपर जते देखहु, ता ह़ुं हयहे? आत्मा ते जीवाय आपण्याण से, डील सी कंय फायदो नी हय, जे वात मे तमने केदलो से तीहयी आत्मा से, अने जीवाय बी से। पण तमारी मे गेथा काय केतरा आसवा से जे भरहो नी करे। काहाके ईसु ते पेले सीत जाणतो हतो के, जे भरहो नी करे, तीहया कोय से, अने कोय मने धरावहे। अने ईसु केदो, एतरे मे तमने केदलो के जत्यार लग बाह तीने मारीन्तां आव्वा लायक नी बणावे तत्यार लग तीहयो मारीन्तां नी आय सके।
आनीन करते ईसु ना ढेरेत चेला ईसुन्तां गेथा जत र्या, अने ईसु नी वात ने सोड़ देदा। एतरे ईसु बारे चेला ने केदो, “तमु बी जवा हींड र्या ह़ु?” 2
सीमोन पतरस ईसु ने केदो, “ए मालीक, आमु कोयने तां जीया? अमर जीवाय आपण्या बोलु ते तारी पांह से। आमु जाण ज्या अने भरहो कर लेदा के भगवान नो चोखलो माणेह तुत से।”
ईसु तीमने जपाप आप्यो, “मे तमने बारे जणा ने नी टाळ्यो ह़ु? ते बी तमारी मे एक जणो भुतड़ो से।” ईसु आहयी वात सीमोन ईस्करीयोती ना बेटा यहुदा ना बारा मे केदो। हीय्योत बारे चेला मे एक हतो, जे ईसु ने धराव्वा हींडतो हतो।
Source notes (2)
- Cross-reference यसाया 54:13
- Cross-reference मत्ती 16:16; मरकुस 8:29; लुका 9:20
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.