Paliya Bible
ईब्रानीयो 10:23
Verse 23 is marked below, with the whole chapter around it. Read from the start
कायदो, ते आव्वा वाळी वारली वात नो साहळो एतरोत से, पण तीहया ते खरली वातु मे अने भरहा नी लायक ईज्जत नी हय। करीन तीहयात बादा नी लारे जीमने लगातार हर साल कदी नी खत्तम हये तीनीन तेम आपे। बड़ाय नी जुगु ह़ाते आव्वा वाळा ने जलमको पुरुन-पुरु चोखो नी कर सकता। कदीम आसम हय सकतु ता तीमनु बादा चड़ाव्वा नु बंद नी हय जतु? काहाके अळतेण ते उपाह़ पाळवा वाळा एक कावा मे जलमका चोखा हय जता, अने आह़फाम ना पापु नी लेदे खुद ने कदी पापी नी ह़मजता। पण हर साल चड़ाव्वा वाळी बादा माणहु ने तीमना पापु फोम करावे। काहाके बोळद्या अने बोकड़ा नु लोय पाप ने छेटु कर देय, आहयु हय नी सके।
एतरे जत्यार ईसु मसी आहयी कळी मे आव्वा वाळो हतो ता तीहयो केदलो हतो,
“तु कोय भेट अने बादा नी चाहतो,
पण तु मारी जुगु एक डील तीयार करलो से।
तु होम-बादा अने पाप नी बादा सी तु
खुस नी हयो।
तत्यार अळतेण मे केदो,
‘अने जेम कायदा नी कीताप मे बी लीखलु से, मे आञे से,
ए भगवान तारी ईच्छा पुरी करवा करीन आवलो से।’”
तीहयो पेले केदलो हतो, “बादा अने भेट अने होम-बादा अने पाप नी बादा तु नी चाहतो, अने तु तीनी सी खुस नी हयो।” ते बी कायदा आहयु चाहे के आहयु चड़ावे। अने अळतेण आहयु बी केय, “मे आञे से, मे तारी मरजी पुरी करवा आवलो से” ता तीहया पेल्ना कायदा ने खत्तम करवा करीन, बीजा कायदा ने तीयार करे। भगवान नी मरजी सी आपणु ईसु मसी ना डील ना एकीत कावा बादा चड़ाव्वा नी लारे चोखला करला से।
एक-एक पुंजारो ते उबो हय्न दाड़ीन आह़फा ना धरमी वायदा पुरा करे, अने एकीत भातीन बादा ने जे पाप ने कदी बी सेटो नी कर सके, वळी-वळीन चड़ावे। पण मसी ते पुंजारा ना रुप मे पापु नी जुगु, जलमको एकीत बादा चड़ावीन भगवान नी जमणी ह़ोड़ जाय्न बह ज्यो। अने तीहयी टेमे सी आह़फा ना वीरोदी ने भगवान नी लारे तीना पुगु तळे नो पाटलो बणाय देवा नी वाट जोय र्यो। काहाके तीहयी एकीत भेट नी लारे तीमने जे चोखला करला से, हमेसा नी लेदे चोखो कर देदला से।
अने चोखली आत्मा बी आपणु ने आहयी गवाय देय; के तीहयो पेले केदलो हतो,
“मालीक केय के जे वायदो मे तीहया दाड़ान बाद
तीमनी सी करही तीहयो आहयो से के
मे आपणा कायदा ने तीमना मन पोर लीखही
अने मे तीमनी मे बहाड़ही।”
अळतेण तीहयो आहयु केय, “मे तीमना पाप ने तीमना बुरा कामु ने अळी कदी फोम नी करु।” अने कदीम जत्यार ईमनी माफी हय जेली से, ता पाप नी बादा नी री।
आवो आपणु भगवान नी ह़ाते जीया
एतरे ए भायु, अने बेन्या काहाके ईसु ना लोय नी लारे तीहया मोट्ला चोखला जागा मे भराय्वा नी खुद पोर भरहो अने हीम्मत से, जीने तीहयो पड़दा नी लारे मतलब आह़फा ना डील नी लारे एक नवली अने जीवत्ली वाट नी लारे उगाड़ देदलो से। अने एतरे अमारो एसवो मोट्लो पुंजारो से, जे भगवान ना घोर नो हकदार्यो से, ता आवो, आपणु खरला मन अने पुरा पक्का भरहा नी ह़ाते, अने मन ना गुना नी ईच्छा ने सेटी करवा करीन मन पोर लोय छीटीन, अने डील ने चोखला पाणी सी धोवाड़ीन भगवान ह़ाते जावो। आवो आपणु आपणी आह ने मानीन वातड़ा धरीन रेवो, काहाके जे वायदो करलो से, तीहयो ह़ाचो से; अने आवो, आमु धीयान राखया के मोंग अने भला कामु नी जुगु एक-बीजा ने बड़ावो आप सकया। अने एक-बीजा नी ह़ाते एकठा हयवा नी सोड़े, जीसम के केतरा नी रीती से, पण एक-बीजा ने ह़मजाड़ता रेवो; अने जीसम-जीसम तीहया दाड़ा ने ह़ाते आवत्लो देखो तीसम-तीसम अळी बी जादा आहयु कर्या करो।
काहाके सच्चाय नी ओळखाण ह़ात करवान बाद कदी आपणु जाण बुजीन पाप करता रीया, ता पाप नी लेदे अळी कानी बादा नी री। पण अळतेण ते आव्वा वाळा नीयाव घण-जबर आक्ठु नी बीक नी ह़ाते वाट जोव्वात बच जाय जे भगवान ना वीरोदी ने खत्तम कर देहे। जे कोय मुसा ना कायदा ने माने तीने दया देखाड़्या वगर बे नीता तीन माणहु नी गवाय पोर मार देय। ता सोच लेवो के तीहयो केतरा अळी भारी डंड नी लायक ठेरहे, जे भगवान ना सोरा ने अने वायदा नु लोय ने, नीकारो करे जीनी लारे तीहयो चोखो हयलो से, अने गीण-दया नी आत्मा नो वाक काडे। काहाके आमु तीने जाणया, जे केदलो हतो, “बदलो लेवा मारु काम से, मेत बदलो लेही।” अने अळी, “मालीक आह़फा ना माणहु नो नीयाव करहे।” जीवत्ला भगवान ना हात मे पड़ जवा एक घणी मोटी वात से।
पण तीहया पाछला दाड़ा ने फोम करो, जीमनी मे तमु भगवान नु वीजाळु हात करीन काठी मेहनत टणकाय सी टेकीन र्या, तत्यार कदी ते आखा माणहु नी अगळ नामबद्दी कर्या अने वेला पाड़्या अने कदी जीमनी ह़ाते एवो वेहवार करता हता तमु तीमनो सात देदा। काहाके तमु केदड़ा ना दुख मे साजल्या बण्या, अने खुद नु धन बी खुसी से लुटवा देदा; आहयु जाणीन के तमारी पांह एक अळी वारु अने जलमकु रेवा वाळु धन से। एतरे खुद नी हीम्मत ना सोड़ो काहाके हीनु फोळ मोटु से। काहाके तमने गम राखवा जरुड़ी से, काहाके तमु भगवान नी मरजी ने पुरी कर सको, अने जे वायदो तीहयो करलो से तीने तमु हात कर सको।
काहाके जेम सास्तर केय,
“थोड़ीकेत टेम मे जे आव्वा वाळो से तीहयो आवहे।
तीहयो वार नी लगाड़े।
पण मारा धरमी माणहु भरहा सी जीवत्ला रेहे,
अने कदी तीमनी माय्न कोय पाछु ह़रकी जाय
ता मे तीमनी सी खुस नी हयु।”
पण आमु पासा पड़वा वाळा नी हय के खत्तम हय जाय, पण तीमनी माय्न से जे भरहो करे अने जीव ने बचाड़ लेय।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.