Skip to content
BibleKenya

Paliya Bible

उबजणाय कीताप 49

याकुब ना आखरी बोलु

तत्‌यार याकुब आह़फा ना सोराम ने बोलावीन तीमने केदो, एकठा हय जावो, मे तमने देखाड़ही के आखरी दाड़ा मे तमारी पोर ह़ु-ह़ु हयहे:

ए याकुब ना सोरा एकठा हय्‌न ह़मळो,

तमारा बाह याकुब1 भणी कांटा लगाड़ो।

ए रुबेन, तु मारो मोट्लो सोरो,

मारी ताखत अने माणेह हयवा ना नाते पेलो फोळ से;

तु मोटाय नो धनी,

अने सक्‌ती नो बी वारु वाटो से।

तु जे पाणीन तेम उकळवा वाळो से,

एतरे बीजा सी वारु नी रेही;

काहाके तु मारी पावर्‌याण लाडी ह़ाते ह़ुयो,

तत्‌यार तु तीने वीटाळ देदो;

तीहयो मारा आथरणा पोर चड़्‌यो।

सीमोन अने लेवी ते भाय-भाय से,

तीमनी तलवार मारवा वाळी हत्‌यार से।

ए मारा जीव, तीमना पल्‌ला मे ना पड़,

ए मारी बड़ाय, हीमनी बठक मे ना जाय;

काहाके रीह सी माणेह ने मार नाख्‌या,

अने आह़फीत मरजी पोर चालीन,

बोळद्‌याम ने लंगड़ो बणाया।

गरा तीमनी रीह ने, जे घणी मोटी हती;

अने तीमनी रीह ने, जे वण-दयाळ्‌ळो हतो;

मे तीमने याकुब सी अलग-अलग,

अने ईस्‌रायल मे तीतर-बीतर कर देही।

ए यहुदा तारा भाय तने वारु से केहे,

तारो हात मारा वेरी नी बोची पोर पड़हे;

तारा बाह ना सोरा तने वांदहे।

यहुदा नाहर ना बच्‌चा से। ए मारा सोरा,

तु सीकार करीन दोर मे जेलो से,

तीहयो नाहार नीता नाहार ने तेम ह़ताय्‌न बह ज्‌यो;

बाद मे कोय हीने टुचलीन उठाड़ सकत्‌लो।2

जत्‌यार लग सीलो नी आवे,

तत्‌यार लग नी ते यहुदा सी राजगादी छुटे,

नी ते तीनी अवल्‌यात सी कायदो आपवा वाळो अलग हयहे;

अने राज्‌य-राज्‌य ना माणहु तीना हक मे हय जहे।

तीहयो आह़फा ना जवान गदड़ा ने अंगुर ना वेला मे,

अने आह़फी गदड़ी ना बच्‌चा ने,

वारली जाती ना अंगुर ना फोळ मे बांद्‌या करहे;

तीहयो आह़फा ना लुगड़ा अंगुर ना रोह3 मे,

अने आह़फी पागड़ी अंगुर ना रोह मे धोया करहे।

तीना डोळा अंगुर ना रोह ने तेम राता,

अने तीना दात दुद सी धोळा रेहे।

जबुलुन दर्‌या धेड़े रीया करहे,

तीहयो ढुंड्‌या नी लेदे रेवा नो जागो बणहे,

अने तीनी काकड़ सीदोन देस लग पुगहे।

ईस्‌साकार एक मोट्लो अने ताखत वाळो गदड़ो से,

जे जानवरु ना वाड़ा मे ह़ताय्‌न रेय।

तीहयो एक अराम नो जागो देखीन,

के वारु से, अने देस वारु से,

आह़फा ना खबा ने भार उचलवा नी लेदे हेटो कर्‌यो,

अने पावर नु काम करवा गुलाम बण ज्‌यो।

दान ईस्‌रायल नो एक कुळ हय्‌न

आह़फा ना जाती भायुम नो नीयाव करहे।

दान वाट्‌ये नो एक गड़हो,

अने ह़ड़क मे नो एक फेण वाळो गड़हो हयहे,

जे घोड़ा ना पोगु ने चाय देय,

जीनी सी तीनी पोर बहण्‌यो पासली ह़ोड़ पड़ जाय।

ए यहोवा, मे तारी सी छुटकारो हात करवा करीन

वाट जोवतो आय र्‌यो।

गाद पोर एक टोळो हमलो करहे;

पण तीहयो तीहया टोळा पोर पछळ गेथो हमलो करहे।

“आसेर सी जे अन पाकहे तीहयु वारु हयहे,

अने तीहयो राजान तेम ह़वादु खाणु खवाड़्‌या करहे।

नप्‌ताली एक सुटली हयणी से;

तीहयो घटाळी वात केय।

युसुफ फालवा वाळी डाळ से,

तीहयो झोर ने तां लागली फोळ वाळी एक डाळ से;

तीनी डाळ्‌या भीतड़ा पोर चड़ीन फेल जाय।

धंदली वाळा माणहु तीनी ह़ाते घणा झुमाया,

अने तीना पोर बीलखा देदा,

अने तीनी पछळ पड़ला से।

पण तीनी धंदली वातड़ी री,

अने तीना खबा अने हात याकुब ना

तीहया जोरभर्‌या भगवान ना हात ना लारे उतवाळ्‌या हया,

जीनी पांह सी तीहयो गुवाळ्‌यो आवहे,

जे ईस्‌रायली माणहु जुगु चाफर्‌यो ठेरहे।

आहयु तारा बाह ना तीहया भगवान नु काम से,

जे तारी मदत करहे, आखा मे जोर-भर्‌या भगवान नी लारे,

जे तने उपर सी ह़रग नी बरकत,

अने हेटो मोट्‌ला दर्‌या नी बरकत,

अने धायुम अने गरब नी बरकत आपहे।

तारा बाह नी बरकत मारा आड़ा-बुड़ा नी बरकत सी

जादा बड़ जेली से

अने पेल्‌ना वारा ना बड़ाम नी चीजु नी तेम बणीन रेहे

तीहया युसुफ ना मुंडा पोर,

जे आह़फा भायुम सी अलग करला हता,

तीनात मुंडा नी पागड़ी पोर फुलहे-फालहे।

“बीन्‌यामीन फाड़वा वाळो लेंड्‌यो से,

ह़वारे ते तीहयो सीकार ने फाड़हे,

अने ह़ांती वेळा लुट नो माल वाट लेहे।”

ईस्‌रायल ना बारा कुळ आहयात से अने ईमनो बाह जे-जे बोली सी तीमने बरकत आप्‌यो, तीहया आहयात से; एक-एक ने तीमना बरकत नी अनसारे बरकत आप्‌यो।

याकुब नी मोत अने वगे करनु

तत्‌यार तीहयो तीमने आहयु कीन हुकम आप्‌यो, “मे आपणा आड़ा-बुड़ा मे जाय्‌न भेस्‌कायवा वाळो से: एतरे मने हीत्‌ती एप्‌रोन नी जागा वाळा दोर मे मारा आड़ा-बुड़ा नी ह़ाते गाड़ देजो, मने तीहया दोर मे जे कनान देस मे मम्‌रे नी अगळ वाळी मकपेला नी जागा मे से; तीहयी जागा ने अब्‌राहम हीत्‌ती एप्‌रोन ना हात सी आनीन करे वेचाती लेदो हतो, के तीहयो मड़ाट्‌या जुगु तीनी आह़फी जागा हये।4 तां अब्‌राहम अने तीनी लाडी सारा ने गाड़ला हता; अने तांत ईसाक अने तीनी लाडी रीबका ने बी गाड़ला हता; अने तांत मे लीवा ने बी गाड़लो।5 तीहयी जागा अने तीनो मोट्लो दोर हीत्‌तीम नी हात सी वेचाती लेदली।” याकुब जत्‌यार आह़फा ना सोराम ने आहयु हुकम आप देदलो हतो, तत्‌यार आह़फा पोग खाटली पोर करीन जीव छोड़ देदो, अने आह़फा ना आड़ा-बुड़ा मे जाय्‌न भेसकाय ज्‌यो।6

Source notes (6)
  1. Footnote याकुब जीनु नाम ईस्‌रायल हतु
  2. Cross-reference परकासीतवाक्‌य 5:5; गीनती 24:9
  3. Footnote अंगुर ना रोह लोय
  4. Cross-reference नेवताळा ना काम 23:3-20
  5. Cross-reference उबजणाय कीताप 35:29
  6. Cross-reference नेवताळा ना काम 7:15

Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.