Paliya Bible
उबजणाय कीताप 48
याकुब नु मनस्से अने एप्रेम ने बरकत आपणु
आहयी वात नी अळतेण कानो युसुफ ने केदो, “ह़मळ तारो बाह मांदलो से।” तत्यार तीहयो मनस्से अने एप्रेम नाम ना बेम सोराम ने ह़ाते लीन तीनी पांह जत र्यो। कानो याकुब ने की देदो, के तारो सोरो युसुफ तारीन्तां आव्वा बाज र्यो, तत्यार याकुब आह़फा ने ह़माळीन खाटलु पोर बह ज्यो। अने याकुब युसुफ सी केदो, “आखा मे जोर-भर्यो भगवान कनान देस ना लुज ह़ेर नी पांह मने दरसन आपीन बरकत आप्यो,1 अने केदो, ‘ह़मळ, मे तने ढेरेत सोरा आपीन वदाड़ही, अने तने राज्य-राज्य नी पीड़ी नो मुख्यो बणावही, अने तारीन अळतेण तारी अवल्यात ने आहयु देस आपही, जीनी सी के तीहयी हमेसा लग तीमनी खुद नी जागा बणीन रेहे।’”
“अने हाव तारा बेम सोरा, जे मीस्र देस मे मारी आव्वा सी पेले पयदा हयला से, तीहया मारात ठेरहे; जे रीते रुबेन अने सीमोन मारा से, तीहयी रीती सी एप्रेम अने मनस्से बी मारा ठेरहे। अने तीमनी बाद तारा जे बी सोरा पयदा हये, तीहया तारा ते ठेरहे; पण वाटो पाड़वा नी टेम तीहया आह़फाम ना भायुम ना घोराणा मे गीणायहे। जत्यार में पद्दान सी आव्वा बाज र्यो हतो, तत्यार एप्राता पुगवा सी थोड़ुक नाम्बे हतु ने पेले राहेल कनान देस मे, वाट्ये, मार अगळ मर जी; अने मे तीने तांत, एप्राता जे बेतलहम बी केवाये, तीहयीत वाट्ये मे गाड़ देदो।” 2
तत्यार याकुब ने युसुफ ना सोरा देखाव पड़्या, अने तीहयो पुछ्यो, “आहया कोयना सोरा से?”
युसुफ आह़फा ना बाह सी केदो, “आहया मारा सोरा से, जे भगवान मने आञे आपलो से।” तीहयो केदो, “हीमने मारी पांह ली आवो के मे तीमने बरकत आपु।” याकुब ना डोळा डायावारा ना कारण धुंदळा हय जेला हता, आञे लग के तीने कम देखातु हतु। तत्यार युसुफ तीमने तीनी पांह ली ज्यो; अने याकुब तीमने गोळो दीन गळे लगाड़ लेदो। तत्यार याकुब युसुफ सी केदो, “मने हेर नी हती, के मे तारु मुख अळी देखही: पण देख, भगवान मने तारी अवल्यात बी देखाड़लो से।” तत्यार युसुफ तीमने आह़फा बाह ना मांडा ना वचे गेथो छेटा करीन आह़फो ढुंगो वळीन वांद्यो।
तत्यार युसुफ तीहया बेम ने लीन, एप्रेम ने आह़फा ना जमणा हात सी, के तीहयो याकुब ना डाखर्या हात भणी पड़े, अने मनस्से ने आह़फा ना डाखर्या हात सी, के याकुब ना जमणी हात भणी पड़े, तीमने तीनी पांह ली ज्यो। तत्यार याकुब आह़फा नो जमण्यो हात अगो करीन एप्रेम ना मुंडा पोर जे नानलो हतो, अने आह़फा नो डाखर्यो हात अगो करीन मनस्से ना मुंडा पोर मेक्यो; तीहयो ते जाण बुजीन आसम कर्यो; नीता मोट्लो मनस्सेत हतो। बाद मे तीहयो युसुफ ने बरकत आपीन केदो, “भगवान जीनी अगळ मारा आड़ा-बुड़ा अब्राहम अने ईसाक चालता हता तीहयोत भगवान मारी पयदावारी सी लीन आज ना दाड़े लग मारो गुवाळ्यो बणीन र्यो। के तीहयोत दुत मने आखी बुराय सी छोड़ावतो आय र्यो, तीहयीत हाव आहया सोरा ने बरकत आपे; अने आहया मारा अने मारा आड़ा-बुड़ा अब्राहम अने ईसाक ना केवाये; अने धरती पोर जादा सी जादा वदे।”
जत्यार युसुफ देख्यो के मारो बाह आह़फा नो जमण्यो हात एप्रेम ना मुंडा पोर मेकलो से, तत्यार आहयी वात तीने बुरी लागी; एतरे तीहयो आह़फा ना बाह नो हात आहया वीच्यार सी धर लेदो, के एप्रेम ना मुंडा पोर सी चुटीन मनस्से ना मुंडा पोर मेल देय। अने युसुफ आह़फा ना बाह सी केदो, “ए बाह, आसम नी; काहाके मोट्लो आहयोत से; आह़फा नो जमण्यो हात आना मुंडा पोर मेक।”
तीनो बाह केदो, “नी, ह़मळ, ए मारा सोरा, मे आहयी वात ने वारुत जाणु आनी सी बी माणहुम नी एक पीड़ी पयदा हयहे, अने आहयो बी मोटो हय जहे, ता बी आनो नान्लो भाय आनी सी जादा मोटो हय जहे, अने आनी अवल्यात सी ढेरेत राज्य नीकळहे।”
अळतेण तीहयो ते दाड़े आहयु कीन तीमने बरकत आप्यो, “ईस्रायली माणहु तारु नाम ली लीन आसम बरकत आप्या करहे, ‘भगवान तने एप्रेम अने मनस्से नी तेम बणाय देय,’” अने तीहयो मनस्से सी पेले एप्रेम नु नाम लेदो।
तत्यार याकुब युसुफ सी केदो, “देख, मे ते मरवा पोर से पण भगवान तमारी ह़ाते रेहे, अने तमने तमारा आड़ा-बुड़ा ना देस मे पाछो पुगाड़ देहे। अळी मे तमने तारा भायुम गेथो जादा जागा नो वाटो आपु, जीने मे एमोरीम ना हात मे गेथो मारी तलवार अने धंदली नी ताखत सी ली लेदलो से।”
Source notes (2)
- Cross-reference उबजणाय कीताप 28:13,14
- Cross-reference उबजणाय कीताप 35:16-19
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.