Paliya Bible
उबजणाय कीताप 47
तत्यार युसुफ फीरोन नी पांह जाय्न आहयी खबर आप्यो, “मारो बाह अने मारा भाय, अने तीमना गाडरा अने बोकड़्या, गाय अने बोळद्या अने जे कंय तीमनु से, आखा कनान देस सी आय जेला से; अने हमणे ते तीहया गोसेन देस मे से।” अळतेण तीहयो आह़फा भायुम मे सी पांच जणा ने लीन फीरोन नी अगळ उबो कर देदो। फीरोन युसुफ ना भायुम ने पुछ्यो, “तमारु काम ह़ु से?” तीहया फीरोन ने केदा, “तारा पावर्या गुवाळ्या से, अने अमारा आड़ा-बुड़ा बी गुवाळ्या हता।” अळतेण तीहया फीरोन सी केदा, “आमु आहया देस मे परदेसीन तेम रेवा नी लेदे आवला से; काहाके कनान देस मे जुदो काळ हयवा नी कारण तारा पावर्याम ना गाडरा अने बोकड़्याम नी लेदे चारो नी र्यो; एतरे आह़फाम ना पावर्याम ने गोसेन देस मे रेवा नो हुकम आप।” तत्यार फीरोन राजा युसुफ सी केदो, “तारो बाह अने तारा भाय तारी पांह आवला से, अने मीस्र देस तारी अगळ से; आहया देस नो जे आखा गेथो वारु जागो हय, तीनी मे आह़फा ना बाह अने भायुम ने वहाड़ दे; नीता तीमने गोसेन देस मेत रेवा दे; अने कदी तु जाणतो हय, के तीमनी मे मेहनती माणहु हय, ता तीमने मारा जानवरु ना अदीकारी ठेराय दे।”
तत्यार युसुफ आह़फा ना बाह ने फीरोन नी अगळ उबो कर्यो; अने याकुब फीरोन ने बरकत आप्यो। तत्यार फीरोन याकुब सी पुछ्यो, “तारी उमर केतरी से?”
याकुब फीरोन सी केदो, “मे ते एक ह़ोव तीस वरहु परदेसी हय्न मारी जीवाय जीव लेदलो से; मारी जीवाय ना दाड़ा थोड़ाक दुख सी बी भरला हता, अने मारा आड़ा-बुड़ा परदेसी हय्न जेतरा दाड़ा लग जीवत्ला र्या तेतरा दाड़ा नो मे बी हजु नी हयो।” अने याकुब फीरोन ने बरकत आपीन तीनी अगळ सी जत र्यो। तत्यार युसुफ आह़फा ना भायुम ने वहाड़ देदो, अने फीरोन ना हुकम नी अनसारे मीस्र देस ना वारु सी वारु जागा मे, मतलब रामसेस नाम ना ह़ेर मे जागो आपीन तीमने ह़ोप देदो। अने युसुफ आह़फा ना बाह नी, अने आह़फा ना भायुम नी, अने बाह ना आखा घोराणा नी, एक-एक ना सोरा सोरी नी गीनती नी अनसारे, खाणु अपाड़ी-अपाड़ीन तीमनु पालन-पोसण करवा बाज ज्यो।
काळ
तीहया आखा देस मे खावा नी लेदे कंय नी र्यु; काहाके काळ घणु भारी हतु, अने काळ नी कारण मीस्र अने कनान बेम देस खत्तम हय ज्या हता। अने जेतरा रुप्या मीस्र अने कनान देस मे हता, आखाम ने युसुफ तीहया अन ना बदले, जे तां रेवा वाळा वेचातु लेता हता एक्ठु करीन फीरोन ना घोर मे पुगाड़ देदो। जत्यार मीस्र अने कनान देस ना रुप्या खत्तम हय ज्या, तत्यार आखा मीस्र ना माणहु युसुफ नी पांह आवीन केवा बाज ज्या, “आमने खावा नु अन आप, ह़ु आमु रुप्या नी रेवा सी तारा रेते मर जीया?”
युसुफ केदो, “कदी रुप्या नी हय ता आह़फाम ना जानवरु आपो, अने मे तीमनी बदले तमने अन आलही।” तत्यार तीहया आह़फाम ना जानवरु युसुफ पांह ली आया; अने युसुफ तीमने घोड़ा, गाडरा अने बोकड़्या, गायु अने बोळद्या अने गदड़ा नी बदले अन आपवा बाज ज्यो। तीहया साल मे तीहयो आखा जाती ना जानवरु नी बदले अन आपीन तीमनो पालन-पोसण करतो र्यो।
तीहयो साल ते जत र्यो; तत्यार अगला साल मे तीहया तीमनी पांह आवीन केदा, “आमु अमारा मालीक सी आहयी वात ह़ताड़ नी सकता के अमारा रुप्या खत्तम हय जेला से, अने अमारा आखा भाती ना जानवरु अमारा मालीक ना हय जेला से; एतरे हाव अमारा मालीक नी अगळ अमारो डील अने जागा छोड़ीन अळी कंय नी र्यु। आमु अने अमारा खेतर तारी रेते ह़ुका खत्तम हये? आमने अने अमारी जागा ने अन नी बदले वेचाता ली ले, के आमु अमारी जागा भेळ फीरोन ना पावर्या हय जाय अने आमने बीज आप, के आमु मरीया नी, पण जीवत्ला रीया, अने जागा नी उजड़े।”
तत्यार युसुफ मीस्र देस नी आखी जागा ने फीरोन नी लेदे वेचाती लेदो; काहाके तीहया घणो काळ पड़वा सी मीस्र ना माणहु ने आह़फा-आह़फा खेतरु वेच देदा आहयी रीते आखी जागा फीरोन नी हय जी। अने मीस्र देस नी एक काकड़ सी बीजी काकड़ लग जे माणहु रेता हता, युसुफ तीमने ह़ेरु मे वहाड़ लेदो। पण पुंजाराम नी जागा तीहयो वेचाती नी लेदो; काहाके पुंजाराम नी लेदे फीरोन नी पांह गेथु दाड़ीन अन जड़तु हतु, अने फीरोन जे अन दाड़ीन आपतो हतो तीहयुत खाता हता; आहया कारण तीमने आह़फाम जागा वेचवा नी पड़ी। तत्यार युसुफ माणहुम सी केदो, “ह़मळो, मे आज तमने अने तमारी जागा ने फीरोन नी लेदे वेचाता लेदलो से; देखो, तमारी जुगु आञे बीज से, अने खेतरु मे वेरो। अने जे कंय पाके तीनो पांचवो वाटो फीरोन ने आपजो, बीजा चार वाटा तमारा रेहे के तमु आह़फाम ना खेतर मे वेरो, अने आह़फा-आह़फाम ना सोरा-सोरी अने घोर ना बीजा माणहु ह़ाते खाया करो।”
तीहया केदा, “तु आमने बचाड़ लेदो; अमारा मालीक नी दया नी नींगा अमारी पोर बणीन रेय, अने आमु फीरोन ना पावर्या बणीन रेहु।” आहयी रीते युसुफ मीस्र देस नी जागा ना वारा मे आसम नेम ठेरायो, जे आज ना दाड़े लग चालतो आय र्यो के पांचवो वाटो फीरोन ने जड़्या करे; पण पुंजारा नी जागा एतरी फीरोन नी, नी हयी।
याकुब नी आखरी ईच्छा
ईस्रायल ना माणहु मीस्र ना गोसेन परदेस मे रेवा बाज ज्या; अने तां नी जागा तीमना हक मे हती, अने तीहया फाल्या-फुल्या अने वदता ज्या। मीस्र देस मे याकुब सत्तर साल जीवत्लो र्यो आहयी रीते याकुब नी आखी उमर एक ह़ोव संयताळीस साल नी हयी। जत्यार याकुब ने मरवा ना दाड़ा हाते आया, तत्यार तीहयो आह़फा ना सोरा युसुफ ने ह़ाते बोलावीन केदो, “कदी तारी दया मारी पोर से, ता आह़फा नु हात मारा ह़ातळ्या नी हेटो मेलीन ह़ाम खा, के तु मार ह़ाते दया अने खरलो काम करही, के मने मीस्र देस मे नी गाड़जे।1 जत्यार मे मारा आड़ा-बुड़ा नी ह़ाते ह़ुय जही, ता तु मने मीस्र देस सी उचलीन तीमनात मड़ाट्या मे गाड़जे।” तत्यार युसुफ केदो, “मे तारा बोल नी अनसारे करही।”
अळतेण तीहयो केदो, “मार सी ह़ाम खा।” तत्यार युसुफ याकुब सी ह़ाम खादो। तत्यार याकुब खाट्लु ना मुंडा भणी मुंडु हेटु करीन वीन्ती कर्यो।
Source notes (1)
- Cross-reference उबजणाय कीताप 49:29-32; 50:6
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.