Paliya Bible
उबजणाय कीताप 46
याकुब नु आखा घोरबाल्या भेळ मीस्र मे जाणु
तत्यार याकुब आह़फा नु आखु कंय लीन बेर्सेबा ज्यो, अने तां आह़फा ना बाह ईसाक ना भगवान ने बादा चड़ायो। तत्यार भगवान याकुब सी राते दरसन मे केदो, “ए याकुब ए याकुब।” तीहयो केदो, “ह़ु हुकम।”
तीहयो केदो, “मे भगवान तारा बाह नो भगवान से, तु मीस्र मे जवा सी ना बीहे; काहाके मे तारी सी तां एक मोट्लु राज्य बणावही। मे तारी ह़ाते-ह़ाते मीस्र आवही; अने मे तने तां सी अळी पक्को ली आवही; अने युसुफ आह़फा ना हात सी तारा डोळा ने बंद करहे।”
तत्यार याकुब बेर्सेबा गेथो ज्यो; अने जे गाड्या फीरोन याकुब ने लाव्वा नी लेदे मोकल्लो हतो, तीमनी मे याकुब ना सोरा तीमनो बाह याकुब, अने आह़फा ना सोरा-सोरी, अने बयराम ने बहाड़्या अने लीन ज्या। तीहया आह़फा ना गाडरा अने बोकड़्या, गाय अने बोळद्या, अने कनान देस मे आह़फा नु एकठु करलु आखु धन ने लीन मीस्र देस मे आया।1 अने याकुब आह़फा ना सोरा-सोरी, अने तीमना सोरा-सोर्याम ना सोराम ने, अने आह़फा ना आखा घोराणा ने आह़फा ह़ाते मीस्र देस मे ली आयो।
याकुब ह़ाते जे ईस्रायली, मतलब तीमना सोरा, अने तीमना सोरा-सोरी आखा मीस्र देस मे आया, तीमना नाम आहया से याकुब नो मोट्लो सोरो रुबेन हतो। अने रुबेन नो सोरो हनोक, पल्लु हेस्रोन, अने कर्मी हता। सीमोन ना सोरा, यमुएल, यामीन, ओहद, याकीन, सोहर, अने एक कनानी बयर सी पयदा हयलो साउल बी हतो। लेवी ना सोरा गेर्सोन, कहात, अने मरारी हता। यहुदा ना सोरा एर, ओनान, सेला, पेरेस, अने जेरह नाम ना सोरा हयला ते हता; पण एर अने ओनान कनान देस मे मर जेला हता; अने पेरेस ना सोरा, हेस्रोन अने हामुल हता। ईस्साकार ना सोरा, तोला, पुव्वा, योब अने सीम्रोन हता। जबुलुन ना सोरा, सेरेद, एलोन, अने यहलेल हता। लीवा ना सोरा, जे याकुब सी पदनराम पयदा हयलो हतो, तीमना सोरा अळी तीमना सोरा आहयात से, अने आनी गेथो जादा तीहयो एक सोरी दीना ने बी पयदा कर्यो। आञे लग ते याकुब नी आखी पीड़ी तयतीस माणहु हया।
अळी गाद ना सोरा, सपोन हाग्गी, सुनी, एसबोन, एरी, अरोदी, अने अरेली हता। आसेर ना सोरा, यीम्ना, यीस्वा, यीस्वी, अने बरीवा, हता, अने तीमनी बेनेह सेरह हती; अने बरीवा ना सोरा, हेबेर अने मल्कीएल हता। जील्पा, जीने लाबान आह़फी सोरी लीवा ने आपलो हतो, तीमना सोरा अने तीमना सोरा आहयात हता; अने तीनी लारे याकुब ना ह़ोळ्ळे माणहु पयदा हया।
अळतेण याकुब नी लाडी राहेल ना सोरा युसुफ अने बीन्यामीन हता। अने मीस्र देस मे ओन ह़ेर ना पुंजारा पोतीपेरा नी सोरी आसनत सी युसुफ ना आहया सोरा मनस्से अने एप्रेम पयदा हया।2 बीन्यामीन ना सोरा, बेला, बेकेर, अस्बेल, गेरा, नामान, एही, रोस, मप्पीम, हुप्पीम, अने अर्द हता। राहेल ना सोरा याकुब सी पयदा हयला तीहया आहयात सोरा हता; तीमना आहया आखा सोरा अने तीमना सोरा चोवदे माणहु हया।
अळतेण दान नो सोरो हुसीम हतो। नप्ताली ना सोरा, यहसेल, गुनी, सेसेर, अने सील्लेम हता। बील्हा पावर्याण, जीने लाबान आह़फी सोरी राहेल ने आप्यो, तीमना सोरा अने तीमना सोरा आहयात से; तीनी लारे याकुब नी अवल्यात मे सात माणहु हया।
याकुब नी अवल्यात ना आखा माणहु, जे तीमनी ह़ाते मीस्र देस मे आवला हता, याकुब नी आखी ववेह़ ने छोड़ीन, आखा छीयासठ माणहु हता। अळी युसुफ ना सोरा, जे मीस्र मे तीनी से पयदा हया, तीहया बे माणहु हता; आहयी रीते याकुब ना घोराणा ना जे माणहु मीस्र देस मे आया तीहया आखा मेळीन सत्तर हया।3
याकुब अने तीनु घोराणु मीस्र देस मे पुगे
अळतेण याकुब यहुदा ने आह़फा अगळ युसुफ नी पांह मोकल देदो के तीहयो तीमने गोसेन नी वाट देखाड़े; अने तीहया गोसेन देस मे आया। तत्यार युसुफ आह़फा नी घोड़ागाडी जोपाड़ीन आह़फा ना बाह याकुब सी भेट करवा नी लेदे गोसेन देस मे ज्यो, अने तीनी सी भेट करीन तीने गळे लाग्यो, अने ढेरेत वार लग तीने गळे लागीन रड़तो र्यो। तत्यार याकुब, युसुफ सी केदो, “मे हाव मरवा सी बी खुस से, काहाके तने जीवत्लो देख्यो अने हाव तारु मोडु देख लेदो।”
तत्यार युसुफ आह़फा ना भायु सी अने आह़फा ना बाह ना घोराणा सी केदो, “मे जाय्न फीरोन ने आहयी खबर आपही, ‘मारा भाय अने मारा बाह ना आखा घोराणा ना माणहु जे कनान देस मे रेता हता, तीहया मारी पांह आय जेला से; अने तीहया माणहु गुवाळ्या से, काहाके तीहया जानवरु ने पाळता आय र्या; एतरे तीहया आह़फा गाडरा अने बोकड़्या, गाय अने बोळद्या, अने जे कंय तीमनु से, आखा ली आवला से।’ जत्यार फीरोन तमने बोलावीन पुछे, ‘तमारु ह़ु काम से?’ तत्यार आहयु केजो, तारा पावर, आमु, अने अमारा आड़ा-बुड़ा नान्ला ने हजु लग जानवरु पाळता आवला से, जीनी सी तमु गोसेन देस मे री सको।” काहाके मीस्र ना माणहु गुवाळ्या सी ह़ीगी करे।
Source notes (3)
- Cross-reference नेवताळा ना काम 7:15
- Cross-reference उबजणाय कीताप 41:50-52
- Cross-reference नेवताळा ना काम 7:14
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.