Paliya Bible
उबजणाय कीताप 44
चांदी नो कटवरो
तत्यार युसुफ आह़फा ना घोर ना अदीकारी ने हुकम आप्यो, “आहया माणहुम ना ठेला मे जेतरु खावा नु अन ह़माय सके तेतरु भर दे, अने एक-एक जणा ना रुप्या ने तीमना ठेला ना मोडा पोर मेक दे। अने मारो चांदी नो कटवरो नान्ला भाय ना ठेला ना मोडा पोर तीना अन ना रुप्या भेळ मेक दे।” युसुफ ना आहया हुकम नी लारे तीहयो कर्यो। ह़वारे वीजाळु हयतेत तीहया माणहु आह़फाम ना गदड़ा भेळ वळाय देदा। तीहया ह़ेर सी नीकळलात हता, अने नाम्बे नी जेला हता के युसुफ आह़फा ना घोर ना अदीकारी ने केदो, “तीहया माणहु नी पछळ जा, अने तीमने हात करीन तीमने के, तमु भलाय नी बदले बुराय ह़ुका कर्या? काहा तमु मारा मालीक नो चांदी नो कटवरो चोरी कर्या? ह़ु आहयी तीहयी चीज नी हय जीनी मे मारो मालीक पाणी पीतो हतो अने ह़तायली वात ने करतो हतो? जे काम तमु कर्या, तीहयु बुरु काम से।”
तत्यार तीहयो तीमने जाय्न धर लेदो, अने तीहयो युसुफ ना भायुम ने तीहयी वात केदो। तीहया तीने केदा, “ए अमारा मालीक तु आसवी वातु ह़ुका केय? आमु ह़ाम खाया के आसवु काम आमु नी कर्या। देख जे रुप्या अमारा ठेला ना मोडा पोर मेकला जड़ला हता, तीने आमु कनान देस सी तारी पांह पाछा लावला हता। तत्यार ह़ुका आमु तारा मालीक ना घोर मे सी ह़ोना नीता चांदी नी चीज चोरी कर सकया? तारा पावर्याम मे सी जीनी पांह बी तीहयु नीकळे, तीने मार नाखजे, अने आमु बी आपणा तीहया मालीक ना पावर्या बण जहु।”
घोर नो अदीकारी तीमने केदो, “तमारुत केवु संय से, जीनी पांह तीहयो कटवरो नीकळे ते मारो पावर हयहे; अने तमु वण-गुनाळ्ळा ठेरहु।” तीहया ममार आह़फा-आह़फाम ना ठेला भोय्मे उतार्या अने तीने छोड़वा बाज ज्या। तत्यार घोर नो अदीकारी ह़ोदवा बाज ज्यो, अने मोट्ला ना ठेला सी लीन नान्ला ना ठेला लग ह़ोद्यो: अने कटवरो बीन्यामीन ना ठेला मे जड़्यो। तत्यार तीहया आह़फा-आह़फाम ना लुगड़ा फाड़ीन दुखी हया, अने गदड़ा पोर ठेला मेकीन ह़ेर भणी पाछा ज्या।
जत्यार यहुदा अने तीना भाय युसुफ ना घोर पुग्या, ता युसुफ तांत हतो, तत्यार तीहया तीनी अगळ भुय्मे पड़्या। युसुफ तीमने केदो, “तमु आहयु केवु काम करला से? ह़ु तमु नी जाणता हता के मारीन तेवु माणेह ह़तायली वात बी जाण सके?”
यहुदा केदो, “आमु आपणा मालीक सी ह़ु कीया? आमु ह़ु कीन आह़फाम ने वण गुनाळ्ळा ठेरावया? भगवान तारा पावर्याम ना गलत काम ने धर लेदलो से। आमु, अने जीनी पांह कटवरो नीकळ्ळो तीहयो बी, आमु आखान आखा आपणा मालीक ना पावर्यात से।” युसुफ केदो, “आसम करवा मारी सी नाम्बे रेय, जे माणेह पांह कटवरो नीकळ्ळु से, तीहयोत मारो पावर हयहे; अने तमु आह़फा बाह नी तां सांती सी जत रेवो।”
बीन्यामीन नी लेदे यहुदा नी वीन्ती
तत्यार यहुदा तीनी पांह जाय्न केवा बाज ज्यो, “ए मारा मालीक, तारा पावर ने आपणा मालीक सी एक वात केवा नो हुकम हये, अने तारी रीह तारा पावर पोर नी हये; काहाके तु फीरोन राजा नी तेवो से। मारो मालीक आह़फा पावर्याम सी पुछलो हतो, ‘ह़ु तमारो बाह नीता भाय से?’ अने आमु आपणा मालीक सी केदा, ‘ह़ोव, अमारो डायलो बाह से, अने तीना डायावारा नो एक नानलो सोरो बी से, पण तीनो भाय मर जेलो से, एतरे तीहयो हाव आह़फी आय्ह नो एखलोत री जेलो से, अने तीनो बाह तीनी सी मोंग राखत्लो से।’ तत्यार तु आह़फा पावर्याम सी केदलो हतो, ‘तीने मारीन्तां ली आवो, जीनी सी मे तीने देखु।’ तत्यार आमु आपणा मालीक सी केदला हता, ‘ह़ेलो सोरो आह़फा बाह ने नी छोड़ सकतो; नी ता तीनो बाह मर जहे।’ अने तु आह़फा पावर्याम सी केदो, ‘कदी तमारो नानलो भाय तमारी ह़ाते नी आवे, ता तमु मारी अगळ अळी नी आय सकत्ला।’
“एतरे जत्यार आमु अमारा बाह तारा पावर नी तां ज्या, तत्यार आमु तीनी सी आपणा मालीक नी वात केदा। तत्यार अमारो बाह केदो, ‘अळी जाय्न अमारी लेदे थोड़ुक खावा नु अन वेचातु ली आवो।’ आमु केदा, ‘आमु नी जाय सकत्ला, ह़ोव, कदी अमारो नानलो भाय अमारी ह़ाते जाय, तत्यार आमु जहु; काहाके कदी अमारो नानलो भाय अमारी ह़ाते नी रेय, ता आमु तीहया अदमी ना अगळ नी जाय सकत्ला।’ तत्यार तारो पावर मारो बाह अमारी सी केदो, ‘तमु ते जाणत्ला से के मारी बयर सी बे सोरा पयदा हया। अने तीनी मे सी एक ते मने छोड़ीत देदो, अने मे पक्को कर लेदो, के तीने फाड़ देदा हहे; अने तत्यार सी मे तीनु मुख नी देख सक्यो। कदी तमु आने बी मारा डोळा गेथा छेटा ली जावो, अने कानी वेला आनी पोर पड़े, ता तमारी कारण मे आहया डायावारा नी हालत मे दुख भेळ मरला नी कळी मे जत रेही।’
“एतरे जत्यार मे आपणा बाह तारा पावर नी तां पुग्यो, अने आहयो सोरो ह़ाते नी रेय, तत्यार तीनो जीव जे आनी पोर अटकी रेय, आहया कारण, आहयु देखीन के सोरु नी हय, तीहयो तेतरीत घड़ी मर जहे। तत्यार तारा पावर्याम नी कारण तारो पावर अमारो बाह, जे डायावारा नी हालत मे से, दुख भेळ मरला नी कळी मे जत रेहे। अळी तारा पावर आह़फा बाह नी तां आहयु कीन आहया सोरा नु जामनी रेलो से, ‘कदी मे आने तारी पांह नी पुगाड़ु, तत्यार ते मे हमेसा नी लेदे तारो गुनाळ्ळो ठेरही।’ एतरे हाव तारो पावर आहया सोरा नी बदले आपणा मालीक नो पावर हय्न रेवा नु हुकम मांगे, अने आहयु सोरु आह़फा भायुम नी ह़ाते जवा देय। काहाके सोरा वगर मे कीसम अमारा बाह नी पांह जाय सकही; आसम नी हये के मारा बाह पोर जे दुख पड़े तीहयु मने देखवा पड़े।”
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.