Paliya Bible
उबजणाय कीताप 43
बीन्यामीन नी ह़ाते मीस्र देस जवा
कनान देस मे काळ अळी बी घणु-जुदु हय ज्यु। जत्यार तीहयु अन जे मीस्र देस सी लावलु हतु, खुट ज्यु तत्यार तीमनो बाह तीमने केदो, “अळी जाय्न अमारी लेदे खावा नु कंय अळी अन वेचातु ली आवो।”
तत्यार यहुदा तीनी सी केदो, “तीहयो अदमी आमु ने चेतावणी आपीन केदो, कदी तमारो भाय तमारी ह़ाते नी आयो, ता तमु मारी अगळ नी आय सकता। एतरे कदी तु अमारा भाय ने अमारी ह़ाते मोकले, तत्यार ते आमु जाय्न तारी जुगु खावा नु अन वेचातु ली आवहु; पण कदी तीने नी मोकले, ता आमु नी जीया, काहाके तीहयो अदमी अमारी सी केदो, कदी तमारो भाय तमारी ह़ाते नी हय, ता तमु मारीन्तां नी आय सको।”
तत्यार याकुब केदो, “तमु तीहया अदमी ने आहयु देखाड़ीन के अमारो एक अळी भाय से, ह़ुका मार ह़ाते गलत कर्या?”
तीहया केदा, “जत्यार तीहयो अदमी अमारी अने अमारा कुटुम नी हालत ना बारा मे आहयी रीती सी पुछ्यो, ‘ह़ु तमारो बाह हाव लग जीवत्लो से? ह़ु तमारा कोय अळी भाय से? तत्यार आमु आहयी वात नी अनसारे तीने जपाप आप्यो, बाद मे ह़ु जाणता हता के तीहयो केहे, आह़फा भाय ने आञे ली आव’।”
अळतेण यहुदा आह़फा बाह याकुब सी केदो, “सोरा ने मार ह़ाते मोकल दे, के आमु जत रीया; आनी सी आमु, अने तु, अने अमारा सोरा-सोरी मरे नी, पण जीवत्ला रेहे। मे बीन्यामीन नो जामनी से; मारात हात सी तु हीने पाछो लेजे। कदी मे हीने तारीन्तां पुगाड़ीन अगळ नी उबो कर देम, तत्यार ते मे हमेसा नी लेदे तारो गुनाळ्ळो ठेरही। कदी आमु वार नी लगाड़ता, ता हजु लग बे कावा पाछा आवती रेता।”
तत्यार तीनो बाह याकुब तीमने केदो, “कदी ह़ाचलीन आसवी वात से, ता आहयु करो; आहया देस नी वारु-वारु चीज मे गेथु कंय-कंय आह़फाम ना ठेला मे तीहया अदमी जुगु भेट ली जावो: जीसम के थोड़ोक चीक, अने थोड़ुक मोद, अने गंदायण्यु तेल, पीस्ता, बदाम। अळी आह़फा-आह़फाम नी ह़ाते दुणा रुप्या ली जावो; अने जे रुप्या तमारा ठेला ना मोडा पोर मेकीन पाछा कर देदला हता, तीहया बी लेता जावो; कंखर माय्न आहयु भुल सी हयु हय। आह़फाम ना भाय ने बी ह़ाते लीन तीहया अदमीन्तां अळी जावो, अने आखा मे जोर-भर्यो भगवान तीहया अदमी ने तमारी पोर दयाळ्ळो करहे, जीनी सी के तीहयो तमारा बीजा भाय ने अने बीन्यामीन ने बी आव्वा देय: अने कदी मे वण-अवल्यात नो हयु ता हयवा देवो।”
तत्यार तीहया माणहु तीहयी भेट, अने दुणा रुप्या, अने बीन्यामीन ने बी ह़ाते लीन, चाल देदा अने मीस्र मे पुगीन युसुफ नी अगळ उबा हया, तीमनी ह़ाते बीन्यामीन ने देखीन युसुफ आह़फा ना घोर ना अदीकारी सी केदो, “ह़ेला माणहुम ने घोर मे पुगाड़ दे, अने जानवर ने मारीन खाणु तीयार करो; काहाके हीय्या माणहु बोपरी वळे मार ह़ाते खाणु खाहे।” तत्यार तीहयो अदीकारी माणेह युसुफ ना केवा नी अनसारे तीहया माणहुम ने युसुफ ना घोर मे ली ज्यो।
जत्यार तीहया युसुफ ना घोर पुगाड़ देदा तत्यार तीहया आह़फा-आह़फा बीहीन केवा बाज ज्या, “जे रुप्या पेली वार अमारा ठेला मे पाछा कर देदला हता, तीहया कारण सी आमु ने मोय पुगाड़ देदा; जीनी सी के तीहयो माणेह अमारी पोर गुनो लगाड़े, अने आमने हक मे करीन आह़फा ना पावर बणावे, अने अमारा गदड़ाम ने बी हापकी लेय।” तत्यार तीहया युसुफ ना घोर ना अदीकारी नी ह़ाते जाय्न घोर ना झापला पोर आहयी रीते केवा बाज ज्या, “ए अमारा मालीक, जत्यार आमु पेली वार अन वेचातु लेवा आवला हता, तत्यार आमु घोर जता हता ता वाट्ये धरम साहळा मे पुगीन अमारा ठेला छोड़्या, ता ह़ु देख्या के एक-एक जणा ना पुरा-पुरा रुप्या तीना ठेला ना मोडा पोर मेकला हता; एतरे आमु तीने अमारी ह़ाते अळी लेता आवला से। अने बीजा रुप्या बी खावा नु अन वेचातु लेवा नी लेदे लावला से; आमु नी जाणता के अमारा रुप्या अमारा ठेला मे कोय मेल देदलु हतु।”
अदीकारी केदो, “तमारु वारु हये, ना बीहो: तमारो भगवान, जे तमारा बाह नो बी भगवान से, तीहयोत तमने तमारा ठेला मे धन आप्यो हहे, तमारा रुप्या ते मने जड़ जेला हता।” अळतेण तीहयो सीमोन ने नीकाळीन तीमनी ह़ाते कर देदो।
तत्यार तीहयो अदीकारी तीहया माणहुम ने युसुफ ना घोर मे ली जाय्न पाणी आप्यो, तत्यार तीहया आह़फाम ना पोगु धोया; बाद मे तीहयो गदड़ा नी लेदे चारो आप्यो। तत्यार आहयु ह़मळीन, के आज आमु ने आञेत खाणु खावा पड़हे, तीहया युसुफ ने आव्वा नी टेम लग, मतलब बोपरी वळे लग, तीहयी भेट ने आपवा करीन एक्ठी करीन मेक्या। जत्यार युसुफ घोर आयो तत्यार तीहया ते भेट ने, जे तीमना हात मे हती, तीनी अगळ घोर मे ली ज्या, अने भोयमे पड़ीन तीने वांद्या। युसुफ तीमने वारु से के पुछ्यो अने केदो, “ह़ु तमारो डायलो बाह, जीनी तमु वात करला हता तीहयो वारलो से? ह़ु तीहयो हजु लग जीवत्लो से?”
तीहया केदा, “होव तारो पावर अमारो बाह वारलो से अने हजु लग जीवत्लो से।” तत्यार तीहया मुंडु हेटु करीन अळी वांद्या।
तत्यार तीहयो डोळा उचा करीन आह़फा सग्गा भाय बीन्यामीन ने देखीन पुछ्यो, “ह़ु आहयो तमारो नानलो भाय से जीनी वात तमु मार सी करला हता, आहयोत से? तीहयो बीन्यामीन सी केदो, ए मारा सोरा, भगवान तारी पोर दया करे।” तत्यार आह़फा ना भाय ना मोंग सी मन भरायवा नी कारण अने आहयु सोचीन के में कां जाय्न रड़ु, युसुफ ममार आह़फा ना कोपरा मे ज्यो, अने तां रड़ पड़्यो। बाद मे आह़फु मोडु धोवीन नीकळी आयो, अने आह़फा ने होगो करीन केदो, “खाणु आपो।” तत्यार तीहया तीनी जुगु ते अलग, अने भायुम नी लेदे बी अलग, अने जे मीस्री माणहु तीनी ह़ाते खाता हता, तीमनी लेदे बी अलग, खाणु आप्या; आनीन करते के मीस्री माणहु ईब्रानी माणहु ह़ाते खाणु नी खाय सकत्ला, मीस्री आसम करवा गलत ह़मजता हता। युसुफ ना भाय तीनी अगळ, मोट्ला-मोट्ला पेले, अने नान्ला-नान्ला पछळ, आपणी-आपणी उमर नी अनसारे, लाय्न सी बहाड़्या; आहयु देखीन तीहया वहराय ज्या अने एक बीजा भणी देखवा बाज ज्या। तत्यार युसुफ आह़फा अगळ गेथु खाणु चुटी-चुटीन तीमनी पांह मोकलवा बाज ज्यो, अने बीन्यामीन ने आह़फा भायुम नी गेथी पांच गुना खाणु जड़्यु। अने तीहया तीनी ह़ाते मन-भावतु खादा-पीदा।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.