Paliya Bible
उबजणाय कीताप 40
केदड़ाम ना ह़पनु नु मतलब देखाड़वा
आहयी वातु नी बाद ईसम हयु, के मीस्र ना राजा ना पीवाड़वा वाळो अने रांदवा वाळो आह़फा मालीक ना वीरोद कंय गुनो कर्यो। तत्यार फीरोन राजा आह़फा बेम अदीकार्या, मतलब पीवाड़वा वाळा ना मुख्या, अने रांदवा वाळा ना मुख्या, पोर खीजवाय्न तीमने धरीन करावीन माणहु नी रखवाळी ना मुख्या ना घोर ना तीना जेल मे, जां युसुफ केद मे हतो, तां बंद कर देदा। तत्यार माणहु नी रखवाळी करन्यो मुख्यो तीमने युसुफ ना हात मे ह़ोप्यो, अने तीहयो तीमनी सेवा-चाकरी करवा बाज ज्यो; पण तीहया थोड़ाक दाड़ा लग जेल मे र्या।
मीस्र ना राजा नो पीवाड़वा वाळो अने रांदवा वाळो, जेल मे बंद हतो, तीहया बेम जणा एकीत रात मे, आह़फा–आह़फा हुनर नी लारे ह़पनु देख्या। ह़वारे जत्यार युसुफ तीमनी पांह मोय ज्यो, तत्यार तीमनी पोर तीहयो जेम नजर नाखीन देख्यो ता ह़ु देख्यो के तीहया नराज से। एतरे तीहयो फीरोन राजा ना तीहया अदीकार्याम सी, जे तीमनी ह़ाते तीमना मालीक ना घोर ना जेल मे हता, पुछ्यो, “आज तमारा मोडा ह़ुका नराज से?”
तीहया तीने केदा, “आमु बेम जणा ह़पनु देखला से, अने तीमना बारा मे देखाड़वा वाळु कोय बी नी हय।” युसुफ तीमने केदो, “ह़ु ह़पना बारा मे केवा भगवान नु काम नी हय? मने आपणु-आपणु ह़पनु देखाड़ो।”
तत्यार पीवाड़वा वाळाम नो मुख्यो आह़फा नु ह़पनु युसुफ ने आसम देखाड़वा लाग्यो: “मे ह़पना मे देख्यो के मार अगळ एक अंगुर नो वेलो से; अने तीहया अंगुर ना वेला मे तीन डाळ्या से; अने तीमनी मे डीरा फुट्या; अने तीमनी मे फुल लाग्या अने तीहया फुल मे अंगुर ना घुड़का फालीन पाक ज्या। फीरोन राजा नो वाटवा मार हात मे हतु; अने मे तीहया अंगुर ने लीन फीरोन ना वाटका मे नीचव्यो, अने वाटका ने फीरोन ना हात मे आप्यो।”
तत्यार युसुफ तीने केदो, “आनु मतलब आहयु से: तीन डाळ्या नु मतलब तीन दाड़ा से; एतरे हमणे सी तीन दाड़ा ना मोय फीरोन तारु मुंडु उचु करहे, अने फीर सी तारा जागा पोर तने ठेरावहे, अने तु पेले नी तेम फीरोन नो पीवाड़वा वाळो बणीन तीनो कटवरो तीना हात मे अळी आप्या करही। जत्यार तारु भलु हय जाय तत्यार मने फोम करजे, अने मारी पोर दया करीन फीरोन सी मारी वात करजे, अने आहया जेलखाना सी मने छोड़ाय देजे। काहाके ह़ाचलीन ईब्रानीयो ना देस सी मने चोरी करीन लावला से। अने आञे बी मे कोय आसवु काम नी कर्यो, जीनी कारण मे आहया जेलखाना मे नाखे।”
आहयु देखीन के तीना ह़पना नु मतलब वारु नीकळ्यु, रांदवा वाळा नो मुख्यो युसुफ सी केदो, “मे बी ह़पनु देखलो से, तीहयु आहयु से: मे देख्यो के मारा मोडा पोर धोळ्ळा रोट्ला ना तीन टोपल्या से। अने उपर नी टोपली मे फीरोन नी लेदे आखा भातीन रांदली चीज से; अने चड़ा मारा मुंडा पोर नी टोपली मे सी तीहयी चीज ने खावा बाज र्या।”
युसुफ केदो, “आनु फोळ आहयु से: तीन टोपल्या नु मतलब तीन दाड़ा से। हाव सी तीन दाड़ा नी मोय फीरोन राजा तारा मुंडा ने वडाड़ीन तने एक झाड़ पोर टंगाड़ देहे, अने चड़ा तारा माह ने तातड़ी-तातड़ीन खाहे।”
अने तीसरे दाड़े फीरोन राजा नो पयदा हयवा नो दाड़ो हतो, तीहयो आह़फा आखा अदीकारीम ने खावा आप्यो, अने तीमनी मे सी पीवाड़वा वाळा ना मुख्या, अने रांदवा वाळा ना मुख्या बेम जणा ने जेलखाना सी नीकाळ्या। पीवाड़वा वाळा नो मुख्यो ने ते पीवाड़वा वाळा ना जाग पोर पाछो बहाड़्यो, अने तीहयो फीरोन ना हात मे कटवरो आपवा बाज ज्यो। पण रांदवा वाळा ना मुख्या ने टंगाड़ देदो, जीसम के युसुफ तीना ह़पना नु मतलब तीने केदलो हतो। ता बी पीवाड़वा वाळा नो मुख्यो युसुफ ने फोम नी राख्यो; पण तीने भुल ज्यो।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.