Paliya Bible
उबजणाय कीताप 39
युसुफ अने पोतीपर नी लाडी
जत्यार युसुफ ने मीस्र देस पुगाड़ देदा, तत्यार पोतीपर नाम नो एक मीस्री, जे फीरोन नो अदीकारी अने सीपायड़ा नो मुख्यो हतो, तीने ईस्माएली माणहु ना हात सी जे तीने तां लीजला हता, वेचातो लेदो। युसुफ आह़फा ना मीस्री मालीक ना घोर मे रेतो हतो, अने यहोवा तीनी ह़ाते हतो; एतरे तीहयो कीस्मत वाळो अदमी हय ज्यो1 अने युसुफ नो मालीक देख्यो, के यहोवा तीनी ह़ाते रेय, अने जे काम तीहयो करे तीने यहोवा तीना हात सी पुरु कर देय। तत्यार तीनी दया नी नींगा तीनी पोर हयी, अने तीहयो तीनी सेवा चाकरी करवा करीन ठेरायो; अळतेण तीहयो तीने आह़फा घोर नो अदीकारी बणावीन आह़फा नु आखु कंय तीना हात मे ह़ोप देदा। जत्यार गेथो तीने आह़फा घोर नो अने आह़फी आखी धन-दवलत नो अदीकारी बणायो, तत्यार गेथो यहोवा युसुफ नी कारण तीहया मीस्री ना घोर पोर संयबरकत आपवा बाज ज्यो; अने ह़ु घोर मे, ह़ु खेतर मे, तीनु जे कंय हतु, आखा पोर यहोवा नी संयबरकत हयवा बाज जी। एतरे तीहयो आह़फा नु आखु कंय युसुफ ना हात मे आञे लग छोड़ देदो के आह़फा खावा ना रोट्ला ने छोड़ीन, तीहयो आह़फी धन-दवलत नु हाल कंय नी जाणता हतो। युसुफ घटाळो अने रुपाळो हतो। आहयी वात नी अळतेण आसम हयु, के तीना मालीक नी लाडी युसुफ भणी भाळी अने केदी, “मार ह़ाते ह़ुव।” पण तीहयो नीकारो करतो जाय्न आह़फा ना मालीक नी लाडी ने केदो, “ह़मळ, जे कंय आहया घोर मे मारा हात मे से; तीने मारो मालीक कंय नी जाणतो, अने तीहयो आह़फा नु आखु कंय मारा हात मे ह़ोप देदलो से। आहया घोर मे मार गेथो मोटो कोय बी नी हय; अने तीहयो तने छोड़ीन, जे तीनी लाडी से; मार सी कंय नी ह़ताड़ीन मेक्यो; एतरे भलो, मे आसवो मोटो गुनो करीन भगवान नो गुनाळ्ळो ह़ुका बणु?” अने आसम हयु के तीहयी दाड़ीक युसुफ सी वात करती री, पण तीहयो तीनी नी मान्यो के तीनी ह़ाते ह़ुवे नीता तीनी ह़ाते रेय।
एक दाड़े ह़ु हयु के युसुफ आह़फा नु काम-काज करवा करीन घोर मे ज्यो, अने घोर ना पावर्या मे सी कोय बी घोर ना मोय नी हतो। तत्यार तीहयी बयर तीनु लुगड़ु धरीन केदी, “मार ह़ाते ह़ुव,” पण तीहयो आह़फा नु लुगड़ु तीना हात मे रेवा दीन नाह्यो, अने बारो नीकळी ज्यो। आहयु देखीन के तीहयो आह़फा नु लुगड़ु मार हात मे रेवा दीन बारो नाह ज्यो, तीहयी बयर आह़फा घोर ना पावर्याम ने बोलावीन केदी, “देखो, तीहयो एक ईब्रानी माणेह ने मने बदनाम करवा करीन अमारी पांह ली आवलो से। तीहयो ते मारी ह़ाते ह़ुव्वा ना मतलब सी मारीन्तां मोय आवलो हतो अने मे ज्योरेत आड़ी पड़ी। अने मने ज्योरेत आड़त्ली ह़मळीन तीहयो आह़फा नु लुगड़ु मारी पांह रेवा दीन नाह ज्यो, अने बारो नीकळी ज्यो।”
अने तीहयी तीनु लुगड़ु तीना मालीक ने घोर आवते लग आह़फी पांह राखी। तत्यार तीहयी तीना सी आहयी रीते वात केदी, “तीहयो ईब्रानी पावर जीने तु आपणीन तां ली आवलो से, तीहयो मार सी ह़ाही करवा करीन मारी पांह आवलो हतो; जत्यार मे ज्योरेत आड़ी पड़ी, तत्यार तीहयो आह़फा नु लुगड़ु मारी पांह रेवा दीन बारो नाह ज्यो।”
आह़फी लाडी नी आहयी वातु ह़मळीन के तारो पावर मारी सी आसम-आसम काम कर्यो, युसुफ ना मालीक नी रीह वद जी। अने युसुफ नो मालीक तीने धरीन जेलखाना मे जां राजा ना केदड़ा बंद हता, नखाड़ देदो; बाद मे तीहयो तीहया जेलखाना मे र्यो।2 पण यहोवा युसुफ नी ह़ाते-ह़ाते र्यो, अने तीना पोर दया नी, अने जेलखाना ना मुख्या सीपायड़ा नी दया नी नींगा तीनी पोर हयी।3 एतरे जेलखाना नु मुख्यु सीपायड़ु तीहया आखा केदड़ा ने, जे जेलखाना मे हता, युसुफ ना हात मे ह़ोप देदु; अने जे-जे काम तीहया तां करता हता, तीहयु तीना हुकम सी हयतु हतु। युसुफ ना हक मे जे कंय हतु तीनी मे सी जेलखाना ना मुख्या सीपायड़ा ने कानी बी चीज देखवा नी पड़ती हती; काहाके यहोवा युसुफ नी ह़ाते हतो; अने जे कंय तीहयो करतो हतो, यहोवा तीने तीनी मे पुरु करतो हतो।
Source notes (3)
- Cross-reference नेवताळा ना काम 7:9
- Cross-reference भजन सहीता 105:18
- Cross-reference नेवताळा ना काम 7:9
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.