Paliya Bible
उबजणाय कीताप 38
यहुदा अने तीनी ववेह तामार
तीहया दाड़ा मे आसम हयु के यहुदा आह़फा ना भायुम नी पांह सी जत र्यो, अने हीरा नाम नी एक अदुल्लाम मे रेवा वाळा अदमी नी तां पड़ावो नाख्यो। तां यहुदा सुवा नाम ना एक कनानी अदमी नी सोरी ने देख्यो; अने तीनी सी वेवा करीन तीनी पांह ज्यो। तीहयी भारेपोगे हयी अने तीहयी एक सोरु ने पयदा करी। यहुदा तीनु नाम एर पाड़्यो। तीहयी अळी भारेपोगे हयी, अने तीनु एक अळी सोरु पयदा हयु। आह्य तीनु नाम ओनान पाड़ी। अळतेण तीहयी एक अळी सोरु ने पयदा करी। आह्य तीनु नाम सेला पाड़ी। अने जीनी टेमे आहयु पयदा हयु तीहयी टेमे यहुदा कजीब ह़ेर मे रेतो हतो।
अने यहुदा तामार नाम नी एक बयर सी आह़फा ना मोट्ला सोरा एर ना वेवा कर देदो। पण यहुदा नो मोट्लो सोरो एर यहोवा नींगा बुरो अदमी हतो, एतरे यहोवा तीने मार नाख्यो। तत्यार यहुदा ओनान सी केदो, “तु आह़फा ना भाय नी लाडी ह़ाते सहवास कर, अने देवरु नु धरम पुरु करीन आह़फा ना भाय नी लेदे सोरो पयदा कर।” ओनान ते आहयी वात जाणतो हतो के सोरो मारो नी केवाये; एतरे आसम हयु के जत्यार तीहयो आह़फा भाय नी लाडी सी सहवास कर्यो ता पाणी ने भुय्मे पाड़ देदो जीनी सी तीहयो आह़फा मरला भाय जुगु अवल्यात अगी नी वदे। आहयु काम जे तीहयो कर्यो आनी सी यहोवा खुस नी हयो अने भगवान तीने बी मार नाख्यो। तत्यार यहुदा आहयी बीक नी करते के कंखर आसम नी हय के आह़फा भायुम नी तेम सेला बी मरे, आह़फी ववेह तामार सी केदो, “जत्यार लग मारो सोरो सेला जवान नी हय जाय ता लग आह़फा बाह ना घोर मे रंडायलीत रेजे।” एतरे तामार आह़फा बाह ना घोर मे जाय्न रेवा बाज जी।
ढेरेत दाड़ा वीतवा बाद यहुदा नी लाडी जे सुवा नी सोरी हती, तीहयी मर जी; अळतेण यहुदा दुख ना दाड़ा वीतवान बाद आह़फा ह़ाती हीरा अदुल्लाम भेळ आह़फा गाडरा अने बोकड़ाम ना नीम्बाळा वाडवा वाळाम नी पांह तीम्नाह ज्यो। अने तामार ने आहयी खबर जड़ी, “तारो ह़ाहरो आह़फा गाडरा अने बोकड़ाम ना नीम्बाळा कतराव्वा नी लेदे तीम्नाह ह़ेर जवा बाज र्यो।” तत्यार तीहयी आहयु वीच्यारीन के सेला जुवान ते हय ज्यो पण मे हीनी बयर नी हयी; ता तीहयी रंडायली ना लुगड़ा नीकाळ देदी अने बीजा लुगड़ा पेरीन लुगड़ु ओडीन आह़फी ढकाय जी, अने एनेम ह़ेर ना झापला नी ह़ाते, जे तीम्नाह ह़ेर नी वाट्ये से, जाय्न बह जी।
जत्यार यहुदा तीने देख्यो, तीहयो तीने रंडी ह़मज्यो; काहाके तीहयी आह़फी नु मोडु ढाक री हती। तीहयो वाट्ये तीनी भणी ज्यो, अने तीने केवा बाज ज्यो, “मने तारीन्तां आव्वा दे,” काहाके तीने मालम नी हतु के तीहयी हीनी ववेह से। अने तीहयी केवा बाज जी, “कदी मे तने मारी ह़ाते सहवास करवा देम, ता तु मने ह़ु आलही?”
तीहयो केदो, “मे मारी बोकड़्याम नी मे गेथी बोकड़ी नु एक बच्चु तारी पांह पुगाड़ देही।” ता तीहयी केदी, “भलु तीने मोकलते लग ह़ु तु मारी पांह गीरवी रेवा जोवे करीन मेकही?”
यहुदा पुछ्यो, “मे ह़ु सेलाणी तारी पांह मेल जाम?” तीहयी केदी, “तारो सीलठप्पो, अने गळाम नी दोरी, अने आह़फा ना हात नी लाकड़ी।” तत्यार तीहयो तीने तीहयी चीज आप देदो, अने तीनी ह़ाते सहवास कर्यो, अने तीनी सी तामार भारेपोगे हयी। तत्यार तीहयी जत री, अने आह़फी नु लुगड़ु छेटु करीन आह़फा ना रंडायली ना लुगड़ा अळी पेर लेदी।
तत्यार यहुदा बोकड़ी नु बच्चु आह़फा ह़ाती तीहया अदुल्लाम ना हात मे मोकली देदो के तीहयी सेलाणी चीज तीहयी बयर ना हात सी छोड़ाय लेय; पण तीहयी बयर तीने नी जड़ी। तत्यार तीहयो तां वाळा माणहु सी पुछ्यो, “तीहयी रंडी जे एनेम नी वाट्ये एक धेड़े बह री हती, कां से?” तीहया केदा, “आञे ते कोय रंडी नी हती।”
एतरे तीहयो यहुदा नी तां पाछो जाय्न केदो, “मने तीहयी नी जड़ी; अने तीहया जागे वाळा माणहु केदा, आञे ते कोय रंडी नी हती।” तत्यार यहुदा केदो, “वारु, सेलाणी नु ह़मान तीनी पांह रेवा दे, नी ता आपणु गांडा गणायहु; देख, मे बोकड़ी नो आहयु बच्चु मोकली देदलो हतो, पण तीहयी तने नी जड़ी।”
लग-भग तीन मयना नी बाद यहुदा ने आहयी खबर जड़ी, “तारी ववेह तामार छीनाळु करली से; अने तीहयी छीनाळु सी भारेपोगे बी हय जेली से।” तत्यार यहुदा केदो, “तीने बारी ली आवो के तीने धपाड़ दीया।”
जत्यार तीने बारी नीकाळवा बाज रेला हता, तत्यार तीहयी, आह़फा ह़ाह़रा नी पांह आहयु केवाड़ मोकली, जीना अदमी नी आहयी चीज से, तीना सी मे भारेपोगे से, अळी तीहयी आहयु बी केवाड़ी, “ओळख ते खरो के आहयो सीलठप्पो, अने गळाम नी दोरी अने हात मे नी लाकड़ी कोयनी से।”
यहुदा तीने ओळखीन केदो, “तीहयी ते मार गेथी बी कम गुनाळ्ळी से; काहाके मे तीनु मारा सोरा सेला सी वेवा नी कर्यो” अने तीहयो तीनी सी कदी सहवास नी कर्यो।
जत्यार तीनु पोखड़ायवा नी टेम आयी, तत्यार आहयु मालम पड़्यु के ईना गरब मे जोवळ्या सोरा से। अने जत्यार तीहयी पोखड़ायवा बाज जी तत्यार एक सोरा नु हात बारु आयु, अने ह़ोयाणी रात्लो सुत लीन तीना हात आहयु केती जाय्न बांद देदी, “पेले आहयु पयदा हयु।” जत्यार तीहयो हात पाछो लीत्ती र्यो, तत्यार तीनु भाय पयदा हय ज्यु। तत्यार ह़ोयाणी केदी, “तु ह़ुका छाटोत नीकळी आयो?” एतरे तीनु नाम पेरेस1 पाड़्या।2 पसळ तीनो भाय जीना हात मे रात्लो सुत बांदलो हतो पयदा हयो, अने तीनु नाम जेरह 3पाड़्या।
Source notes (3)
- Footnote पेरेस नीकळवा नी वाट
- Cross-reference मत्ती 1:3
- Footnote जेरह रात्लो नीता चमक
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.