Paliya Bible
उबजणाय कीताप 33
याकुब नु एसाव ने भेटवु
याकुब डोळा उचा करीन आहयु देख्यो, के एसाव चार ह़ोव अदमी ह़ाते लीन चालीन आव्वा बाज र्यो। तत्यार तीहयो सोराम ने अलग-गलक वाटीन लीवा अने राहेल अने बेम पावर्याण ने आप देदो। अने तीहयो आखान अगळ बेम पावर्याण अने तीमना सोराम ने, तीमनी पछळ लीवा ने तीना सोराम ने, अने आखान पछळ राहेल अने युसुफ ने मेक्यो, अने आह़फो तीमनी आखा अगळ बड़्यो अने सात वार भोयमे पड़ीन वांद्यो, अने आह़फा ना भाय ने तां पुग्यो। तत्यार एसाव तीने भेट करवा करीन दवड़्यो, अने तीने बाथ मे धरीन गळे लगाड़ीन गोळो देदो, अळतेण बेम जणा रड़ पड़्या। तत्यार तीहयो डोळा उचा करीन बयराम ने अने सोराम ने देख्यो; अने पुछ्यो, “आहया जे तारी ह़ाते से कोय से?” तीहयो केदो, “आहया तारा पावर ना सोरा से, जीमने भगवान दया करीन मने आपलो से।” तत्यार सोराम नी भेळ पावर्याण ह़ाते आवीन वांद्या। अळतेण सोराम नी भेळ लीवा ह़ाते आवी, अने तीहया बी एसाव ने वांद्या; आखरी मे युसुफ अने राहेल बी ह़ाते आवीन वांदी।
तत्यार तीहयो पुछ्यो, “तारो आहयो मोट्लो टोळो मने भेट्यो, तीनु ह़ु मतलब से?” तीहयो केदो, “आहयु के मारा मालीक नी दया नी नींगा मार पोर हये।”
एसाव केदो, “ए मारा भाय, मारी पांह ते रेट से; जे कंय तारु से तीने तारीत पांह रेवा दे।”
याकुब केदो, “नी-नी, कदीम तारी दया मार पोर हय, ता मारी भेट आवरी ले: काहाके मे तारो दरसन हात करीन, मानो भगवान नो दरसन कर्यो, अने तु मारी सी खुस हयलो से। एतरे आहयी भेट, जे तने आपली से, आवरी ले; काहाके भगवान मने बरकत आपलो से, अने मारी पांह ढेरेत से।” जत्यार तीहयो तीने ढेरेत कावा केदो, तत्यार तीहयो भेट आवरी लेदो।
अळतेण एसाव केदो, “आव, आपणु अगा बड़या: अने मे तारी अगळ-अगळ चालही।”
याकुब केदो, “ए मारा मालीक, तु जाणे के मार ह़ाते घटाळा सोरा, अने दुद आपवा वाळा गाडरा अने बोकड़्या से अने गायु से; कदी आसवा जानवरु एक दाड़ो बी जादा चालहे, ता आखान-आखा मर जहे। एतरे मारा मालीक मार गेथो अगो जत रे, अने मे आहया जानवरु नी चाल नी अनसारे जे मारी अगळ से, अने सोराम नी चाल नी अनसारे धीरो-धीरो चालीन सेईर ह़ेर मे मारा मालीक ने तां पुगही।”
एसाव केदो, “ता मारा ह़ातीम मे गेथा थोड़ाक ने तारी ह़ाते रेवा देम।” तीहयो केदो, “आहयु ह़ुका? एतरुत ढेरेत से के मारा मालीक नी दया नी नींगा मार पोर बणीन रेय।” तत्यार एसाव तेत दाड़े सेईर ह़ेर जवा करीन आह़फा नी वाट्ये लाग्यो। पण याकुब तां गेथो नीकळीन सुक्कोत भणी ज्यो, अने तां आह़फा जुगु एक घोर, अने जानवरु नी लेदे खोपड़्या बणायो। आहया कारण तीहया जागा नु नाम सुक्कोत1 पड़्यु।
याकुब जे पदनराम गेथो आवलो हतो, तीहयो कनान देस ना सकेम ह़ेर नी ह़ाते कुसल सेम सी पुगीन हेर नी अगळ पड़ावा उबा कर्यो। अने धरती ना जे जागा पोर तीहयो आह़फा नु तम्बु उबो कर्यो, तीने तीहयो सकेम ना बाह हमोर ना सोरा पांह गेथी चांदी ना सीक्का मे वेचातु लेदो।2 अने तां तीहयो एक वेदी बणावीन तीनु नाम “एल-एलोहे” पाड़्यो मतलब ईस्रायल नो भगवान।
Source notes (2)
- Footnote सुक्कोत खोपड़्या नु घोर
- Cross-reference युहन्ना 4:5
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.